ނިމިދިޔަ ސެޕްޓެމްބަރު މަހުގެ ތެރޭގައި ޔަހޫދީ އަސްކަރިއްޔާއާއި ޔަހޫދީ ވަޒަންވެރިން ގުޅިގެން، ފަލަސްޠީނުގެ ރައްޔިތުންނަށާއި އެމީހުންގެ މުދަލާއި ބިންތަކަށް އަމާޒުކޮށް 2,051 ހަމަލާއެއް ދީފައިވާ ކަމަށް ފަލަސްޠީނުގެ ކަމާބެހޭ އިދާރާއިން ހާމަކޮށްފިއެވެ.
ފަލަސްޠީނުގެ 'ވޯލް އެންޑް ސެޓްލްމަންޓް ރެސިސްޓެންސް ކޮމިޝަން' އިން ނެރުނު ތަފާސްހިސާބުތަކަށް ބަލާއިރު، ސެޕްޓެމްބަރު މަހު ރެކޯޑުކުރެވުނު ހަމަލާތަކުގެ ތެރެއިން 1,404 ހަމަލާއަކީ ޔަހޫދީ އަސްކަރިއްޔާއިން ދިން ހަމަލާތަކެވެ. އަދި ބާކީ 647 ހަމަލާއަކީ ހައްދުފަހަނައެޅި ވަޒަންވެރިން ދީފައިވާ ހަމަލާތަކެވެ. މި ހަމަލާތައް އެންމެ ގިނައިން ރެކޯޑުކުރެވިފައިވަނީ ރާމަﷲ އަދި އަލްބީރާ ސަރަޙައްދުންނެވެ 240. މީގެ އިތުރުން ނާބުލުސްއިން 129 ހަމަލާ، އަލްޚަލީލް (ހެބްރޮން) އިން 122 ހަމަލާ، ޖެނީންއިން 17 ހަމަލާ، ބައިތުލަޙަމްއިން 48 ހަމަލާ، ޤުދުސްއިން 28 ހަމަލާ ރެކޯޑުކުރެވިފައިވެއެވެ.
ހައްދުފަހަނައެޅި ޔަހޫދީ ވަޒަންވެރިންގެ މި އަނިޔާވެރި ހަމަލާތަކުގައި ސެޕްޓެމްބަރު މަހު އެކަނިވެސް ފަލަސްޠީނުގެ 3 މީހަކު ވަނީ ޝަހީދުކޮށްލާފައެވެ. މިއާއެކު، އަހަރުގެ މިހާތަނަށް ވަޒަންވެރިންގެ ހަމަލާތަކުގައި ޝަހީދުވި ފަލަސްޠީނު ރައްޔިތުންގެ ޢަދަދު ވަނީ 29 އަށް އަރާފައެވެ. އަދި ސެޕްޓެމްބަރު މަހު 7 ކުޑަކުދިންނާއި 6 އަންހެނުން ހިމެނޭހެން 88 މީހަކަށް އެކިވަރުގެ ޒަޚަމްތައް ލިބިފައިވާއިރު، ފަލަސްޠީނު ދަނޑުވެރިންގެ 9,334 ޒައިތޫނި ގަސް ހިމެނޭ ގޮތަށް ޖުމްލަ 14,600 ގަސް ވަނީ ކަނޑައި ސުންނާފަތިކޮށްފައެވެ. އަހަރު ފެށުނީއްސުރެ ސެޕްޓެމްބަރުގެ ނިޔަލަށް ވަޒަންވެރިން ވަނީ ޖުމްލަ 5,561 ހަމަލާދީފައެވެ.
ފަލަސްޠީނުގެ ބިންތައް ފޭރިގަތުމުގެ ޢަމަުތަކުގެ ތެރެއިން ސެޕްޓެމްބަރު މަހު އެކަނިވެސް ވަޒަންވެރިން ވަނީ ޣައިރުޤާނޫނީ 21 ޖަގަހަ ހެދުމަށް މަސައްކަތްކޮށްފައެވެ. މީގެ ތެރޭގައި ރާމަﷲ އަދި އަލްބީރާގައި ހެދި 10 ޖަގަހައާއި ނާބުލުސްގެ 5 ޖަގަހަ ހިމެނެއެވެ. މީގެ އިތުރުން ޔަހޫދީ ސަރުކާރުން ވަނީ އަސްކަރީ އަމުރުތަކާއި ބިންތައް ދައުލަތަށް ނެގުމުގެ ނަމުގައި، ހުސްވި ސެޕްޓެމްބަރު މަހު އެކަނިވެސް އެތައް ސަތޭކަ ހެކްޓަރުގެ ބިން ފޭރިގަނެފައިވެއެވެ.
އިމާރާތްތައް ތަޅައި ސުންނާފަތިކުރުމުގެ ހަމަލާތަކުގެ ތެރެއިން ސެޕްޓެމްބަރު މަހު ފަލަސްޠީނުގެ 254 އިމާރާތްތަކަކަށް ވަނީ އެކިވަރުގެ ގެއްލުން ދީފައެވެ. މީގެ ތެރޭގައި މީހުން ދިރިއުޅޭ 89 ގެއާއި 133 ދަނޑުވެރިކަމުގެ ވަސީލަތް ހިމެނޭއިރު، 164 ކުޑަކުދިންނާއި 64 އަންހެނުން ހިމެނޭހެން ޖުމްލަ 320 މީހުންގެ ގެދޮރު ވަނީ ގެއްލިފައެވެ. އެންމެ ގިނަ ތަންތަން ތަޅާލާފައިވަނީ އަލްޚަލީލުން (91 އިމާރާތް) އަދި ޤުދުސްއިން (60 އިމާރާތް) ފަލަސްޠީނު ރައްޔިތުންގެ ގެދޮރު ސުންނާފަތި ކުރަމުންދާއިރު، ޔަހޫދީން ވަނީ ހުޅަނގު އައްސޭރިއާއި ޤުދުސްގައި ޣައިރުޤާނޫނީ 3,821 ވަޒަންވެރި ޔުނިޓު ބިނާކުރުމަށް 16 ޕްލޭނެއް ކުރިއަށްގެންގޮސް، އިތުރު 400 ޔުނިޓު އެޅުމުގެ ބީލަންވެސް އިޢުލާންކޮށްފައެވެ.