ރާއްޖޭގެ ސަރަހައްދުގައި ގަވާއިދާ ޚިލާފަށް އުޅުނު މަސްބޯޓެއް އަތުލައިގެންފި

ރާއްޖޭގެ ޚާއްޞަ އިޤްތިޞާދީ ސަރަހައްދުގައި ޤާނޫނާ ޚިލާފަށް ހަރަކާތްތެރިވަމުން ދިޔަ ބޭރުގެ މަސްބޯޓެއް އަތުލައިގަނެފިއެވެ.

އެމްއެންޑީއެފުން ވިދާޅުވީ ކޯސްޓްގާޑުން ހިންގި ޚާއްޞަ އޮޕަރޭޝަނެއްގައި މި ބޯޓު މިހާރު ކޯސްޓްގާޑް ޝިޕް ޢިމާދުއްދީނުގެ ބެލުމުގެ ދަށަށް ގެނެސްފައިވާކަމަށެވެ.

އެމްއެންޑީއެފުން ވިދާޅުވީ، ބޯޓު އަތުލައިގަތްއިރު ބޯޓުގައި 7 މީހުން ތިބިކަމަށެވެ. މިބޯޓު އެމްއެންޑީއެފް ކޯސްޓްގާޑް ޝިޕް ޢިމާދުއްދީނުގެ ބެލުމުގެ ދަށަށް ގެންގޮސްފައިވަނީ ހއ.ތުރާކުނުގެ ހުޅަނގު އުތުރުން 46 ނޯޓިކަލް މޭލު ބޭރުންނެވެ. މިއޮޕަރޭޝަނުގައި ބޭރުގެ މިމަސް ބޯޓު އަތުލައިގަނެވިފައިވަނީ ބުދަދުވަހުގެ 18:34 ހާއިރުއެވެ. މިބޯޓު ނިސްބަތްވަނީ ކޮން ޤައުމަކަށްކަން އަދި ހާމަކޮށްފައިނުވާއިރު ބޯޓުގައި ތިބީ ކޮން ޤައުމެއްގެ ރައްޔިތުންކަމެއްވެސް އެމްއެންޑީއެފްއިން އަދި ހާމަކުރައްވާފައި ނުވެއެވެ.

އެމްއެންޑީއެފް ކޯސްޓްގާޑުން ހިންގި ޚާއްޞަ އޮޕަރޭޝަނެއްގައި ރާއްޖޭގެ ޚާއްޞަ އިޤްތިޞާދީ ސަރަހައްދުގައި ޤާނޫނާޚިލާފަށް ހަރަކާތް ތެރިވަމުންދިޔަ ބޭރުގެ މަސްބޯޓެއް، އެމްއެންޑީއެފް ކޯސްޓްގާޑް ޝިޕް ޢިމާދުއްދީނުގެ ބެލުމުގެ ދަށަށް ގެނެސްފި.https://t.co/CesxlXZf3c pic.twitter.com/VPxMxMBUo2

— Maldives National Defence Force (@MNDF_Official) September 30, 2026

މިމަސްބޯޓު ހދ. ކުޅުދުއްފުއްޓަށް ގެންދިއުމުގެ މަސައްކަތް ކުރަމުން އަންނަކަމަށް އެމްއެންޑީއެފުން ވިދާޅުވެއެވެ.

ރާއްޖޭގެ ކަނޑުގެ ސަރަޙައްދު ބެލެހެއްޓުމަށް އަވައްޓެރި ޤައުމުތަކާއި ގުޅިގެން އެމްއެންޑީއެފުންދަނީ މުހިއްމު މަސައްކަތްތަކެއް ކުރައްވަމުންނެވެ.