އޭޝިއަން ކަޕް: ފައިނަލުގެ ފަހު ޖާގަ އިންޑިއާއަށް

ސްރީލަންކާ 124 ލަނޑުން ބަލިކޮށް އޭޝިއަން ގޭމްސް ކްރިކެޓް މުބާރާތުގެ ފައިނަލުގެ ފަހު ޖާގަ އިންޑިއާ ހޯދައިފިއެވެ.

މުބާރާތުގެ ފައިނަލުގައި އިންޑިއާ ނުކުންނާނީ ޕާކިސްތާނާ ދެކޮޅަށެވެ. އެ ގައުމު ފައިނަލުން ޖާގަ ހޯދީ މިއަދު ކުޅުނު ސެމީ ފައިނަލް ފުރަތަމަ މެޗުގައި ބަނގްލަދޭޝް ބަލިކޮށްގެންނެވެ.

މި މެޗުގައި ފުރަތަމަ ކުޅެން ނުކުތީ އިންޑިއާ އެވެ. 20 އޯވަރުގެ ތެރޭގައި އިންޑިޔާއިން ހެދީ ހަތް ކުޅުންތެރިން ނުބައިވެގެން 169 ލަނޑެވެ. ޖަވާބުގައި ކުޅެން ނުކުމެ ލަންކާ އަށް 9.5 އޯވަރުން ހެދުނީ 45 ލަނޑެވެ. މި ހިސާބުން މެޗުން މޮޅުނުވާނެކަން ކަށަވަރުވުމުން މެޗު ނިންމާލީއެވެ.

މި މެޗުގައި އިންޑިއާއިން އެންމެ ރަނގަޅަށް ކުޅުނީ ނުބައިނުވެ 80 ލަނޑު ހެދި އިޝާން ކިޝާން އެވެ. އޭނަ އަށް ފަހު ވައިބްހާވް ސޫރަޔަވަންޝީ 21 ބޯޅައިން 38 ލަނޑު އަދި ކެޕްޓަން ޝްރޭޝް އިޔާ ވެސް 13 ބޯޅައިން 13 ލަނޑު ހެދިއެވެ. އިންޑިއާއިން އެންމެ ރަނގަޅަށް އުކާފައިވަނީ ދެ ވިކެޓް ނެގި ޖޭޖޭ ބުމްރާ އާއި އޭއާރު ޕަޓޭލް އާއި އަބީޝެކް ޝަރްމާއެވެ.

ލަންކާއިން އެންމެ ރަނގަޅަށް އުކާފައިވަނީ ކޭއެޗް ރަތްނަޔަކަ އާއި އެސްއެސްޑީ އަރަޗިގޭ އެވެ. މިއިން ކޮންމެ ކުޅުންތެރިއަކު ދެ ވިކެޓް ނެގި އެވެ. ލަންކާއިން އެންމެ މޮޅަށް ކުޅުނީ 11 ބޯޅައިން 15 ލަނޑު ހެދި އެމްއެންކޭ ފެނާންޑޯއެވެ.

ސެމީ ފައިނަލުން ބަލިވި ދެ ޓީމު މުބާރާތުގެ ތިން ވަނަ ހޮވާ މެޗުގައި ކުޅޭނެއެވެ.

ޖަޕާނަށް ވިއްސާރަވެ ބޯކޮށް ވާރެ ވެހުމުގެ ސަބަބުން އޭޝިއަން ގޭމްސް ކްރިކެޓް މުބާރާތުގެ ސެމީ ފައިނަލަށް ހޮވީ މުބާރާތުގެ އެންމެ ގަދަ ހަތަރު ޓީމެވެ. އެއީ މި މުބާރާތުގެ ގަވާއިދު ބުނާ ގޮތުން މެޗެއް ނުކުޅެ ހުއްޓާލަން ޖެހޭ ފަދަ ހާލަތެއް މެދުވެރިވެއްޖެނަމަ މުބާރާތުގެ ކުރިއަށް އޮންނަ ބުރަށް ދާނީ އޭސީސީގެ ރޭންކިންގެ ކުރީގައިވާ ގައުމު ކަމަށްވާތީއެވެ.

މި ގޮތުގެ މަތީން ސެމީ ފައިނަލަށް އިންޑިއާ އާއި ޕާކިސްތާން އަދި ބަންގްލަދޭޝް އާއި ސްރީލަންކާ ހޮވިއިރު މިއީ ދުނިޔޭގެ ކްރިކެޓްގައި ވެސް އެންމެ ގަދަ ގައުމުތަކުގެ ތެރޭގައި ހިމެނޭ ހަތަރު ގައުމެވެ.