"ރަށްރަށުގެ ތާރީޚު ލިޔެ، އާންމުކުރުން މުހިންމު"
-
ކޮންމެ ރަށެއްގެ ކައުންސިލުންވެސް ތާރީޚު ފޮތް ނެރުމަށް އެދިލެއްވި
ރާއްޖޭގެ ކޮންމެ ރަށެއްގެ ތާރީޚުވެސް ފޮތެއްގެ ސިފައިގައި އެކުލަވާލައި ޝާއިޢުކުރުމަކީ ނުހަނު މުހިންމު ކަމެއްކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ކ. ގުރައިދޫގެ އައު އެރައިވަލް ޖެޓީ ހުޅުވުމަށާއި އެރަށުގެ ތާރީޚާ ގުޅޭގޮތުން ލިޔެފައިވާ ފޮތް ނެރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ވާހަކަފުޅު ދައްކަވަމުން މަޖިލިސް ރައީސް ވިދާޅުވީ، ގުރައިދޫގެ ތަރައްޤީއަށްޓަކައި އެރަށު ކައުންސިލުން ގިނަގުނަ މަސައްކަތްތަކެއް ކުރަމުންދާ ކަމަށެވެ. އަދި ފެނިގެންދަނީ ރަށުގެ ތަރައްޤީއަށް ކުރެވޭ މަސައްކަތްތަކާ އެއްވަރަށް، ގުރައިދޫގެ މާދަމާއާމެދު ކައުންސިލާއި ރަށުގެ އިސްރަށްވެހިން ދެކޭ ފޮނި އުންމީދުތައް ކަމުގައި އެމަނިކުފާނު ފާހަގަކުރެއްވިއެވެ.
ފުޅާދާއިރާއެއްގައި ލޯކަލް ޓޫރިޒަމް ކުރިއަރަމުން އަންނަ ގުރައިދޫގެ އައު ތަޞައްވުރުތަކެއް ކައުންސިލުން ގެންގުޅޭކަން ފާހަގަކުރައްވައި ޢަބްދުއްރަޙީމް ވިދާޅުވީ، ކައުންސިލުގެ އަމާޒަކީ އުފެއްދުންތެރި ވިސްނުމަކާއެކު އަންނަން އޮތް ޖީލުތަކަށް ތަރައްޤީވެފައިވާ ފުރިހަމަ ރަށެއް ހޯދައިދިނުން ކަމަށެވެ. އަދި އަލަށް ހުޅުވުނު އެރައިވަލް ޖެޓީއަށް އަލިއަޅުއްވާލައްވަމުން، މިއީ މިހާތަނަށް ރާއްޖޭގެ ރަށެއްގައި ޤާއިމުކުރެވުނު މިފަދަ އެންމެ ފުރިހަމަ ބިނާ ކަމުގައިވެސް އެމަނިކުފާނު ވިދާޅުވިއެވެ.
ދިވެހި އަދަބިއްޔާތާއި ޅެންވެރިކަމުގެ ދާއިރާގައި ފުންނާބުއުސް ޝަހުޝިއްޔަތެއް ކަމަށްވާ ކަނީރު ޢަބްދުއްރަހީމް ލިޔުއްވާފައިވާ ގުރައިދޫގެ ތާރީޚީ ފޮތް ނެރެދެއްވައި ވާހަކަފުޅު ދައްކަވަމުން މަޖިލީހުގެ ރައީސް ވިދާޅުވީ، ކޮންމެ ރަށަކީ ވެސް ފަޚުރުވެރި ވަރުގަދަ ތާރީޚެއްއޮތް ރަށެއް ކަމަށެވެ. އެހެންކަމުން، ޒިންމާދާރު މަޤާމުތަކުގައި ތިއްބެވި ފަރާތްތަކުގެ ވާޖިބަކީ އަންނަން އޮތް ޖީލުތަކަށްޓަކައި އެ ތާރީޚު ފޮތެއްގެ ސިފައިގައި ޗާޕުކޮށް ޝާއިއުކުރުން ކަމަށް ވިދާޅުވިއެވެ.
"އަޅުގަނޑު ދެކޭގޮތުގައި އަޅުގަނޑުމެންނަށް ދިމާވެފައި އޮތް އެންމެ ބޮޑު މައްސަލައަކީ އަޅުގަނޑުމެންނަކީ ކޮންބައެއްކަން ނޭނގުން. އަޅުގަނޑުމެންގެ ތާރީހަކީ ކޮބައިކަން އަޅުގަނޑުމެންގެ ސަގާފަތަކީ ކޮބައިކަން، އަޅުގަނޑުމެންގެ ކާބަފައިން ދިރިއުޅެނީ ކިހިނެތްކަން އެމީހުންގެ ދިރިއުޅުން ބައްޓަން ކުރުމުގައި މައިގަނޑު ގޮތެއްގައި އެމީހުން ގެންގުޅު ހަމައަކީ ކޮބައިކަން މިކަންކަން އަޅުގަނޑުމެންނަށް އޮޅިފައި އޮތުން" ޢަބްދުއްރަޙީމް ޢަބްދުﷲ ވިދާޅުވިއެވެ.
މީގެއިތުރުން ދިވެހިންނަކީ ކޮން ބައެއްކަމާއި ދިވެހިންގެ މުއްސަނދި ތާރީޚަކީ ކޮބައިކަން އަދި މިހިސާބަށް ޤައުމު ވާސިލުވުމުގައި ކާބަފައިންނާއި ރަށްރަށުގެ އިސްރަށްވެހިން އަދާކުރި މުހިންމު ދައުރު އެނގެންޖެހޭ ކަމަށް ޢަބްދުއްރަހީމް ވިދާޅުވިއެވެ. އެ ބޭފުޅުން ތަހައްމަލުކުރެއްވި ބުރަޔާއި ދަތި އުނދަގޫތަކާއެކު ކޮށްދެއްވި އަގުހުރި ޚިދުމަތްތަކަށް ހައްޤު ޝުކުރު އަދާކުރެވޭނީ، އެ މަޢުލޫމާތުތައް ފޮތެއްގެ ސިފައިގައި އަންނަން އޮތް ޖީލުތަކަށް ފޯރުކޮށްދީގެން ކަމުގައި ފާހަގަކުރެއްވިއެވެ. އަދި ގުރައިދޫ ނަމޫނާއަކަށް ބަލައިގެން، ކޮންމެ ރަށެއްގެ ކައުންސިލުން ވެސް މިފަދަ އަގުހުރި މަސައްކަތްތަކެއް ކޮށްދެއްވުމަށް މަޖިލީހުގެ ރައީސް ވަނީ އިލްތިމާސްކުރައްވާފައެވެ.