"ވޯލްޑް ޓްރެވަލް މާކެޓް ފެއަރ"ގައި ރާއްޖޭގެ ފަރާތުން ބައިވެރިވާ މަންދޫބުންނަށް، ފެއަރއާއި ގުޅޭގޮތުން އަދި ރާއްޖޭގެ ސްޓޭޑުން ލިބެން ހުރި ފުރުޞަތުތަކާއި ގުޅޭގޮތުން މަޢުލޫމާތުދިނުމުގެ ބައްދަލުވުމެއް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯރޕަރޭޝަން، އެމް.އެމް.ޕީ.އާރ.ސީއިން ބާއްވަވައިފިއެވެ.
"ވޯލްޑް ޓްރެވަލް މާކެޓް" ނުވަތަ ޑަބްލިޔު.ޓީ.އެމް ފެއަރއަކީ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް އަމާޒުކޮށްގެން ދުނިޔޭގެ ފެންވަރުގައި ބާއްވާ އެންމެ ފާހަގަކޮށްލެވޭ އެއް ފެއަރއެވެ. މިފެއަރ ބޭއްވުމަށް ހަމަޖެހިފައިވަނީ އަންނަ މަހުގެ 7 އިން 9 އަކަށް އިނގިރޭސިވިލާތުގެ ލަންޑަނުގައެވެ. މިއީ މިފެއަރ ބާއްވާ 37 ވަނަ އަހަރެވެ. މިފަހަރުގެ ފެއަރ އިންތިޒާމްކޮށްފައި ވަނީ އިވެންޓް އޯގަނައިޒްކުރުމުގައި ދުނިޔޭގެ ލީޑިން ކުންފުންޏެއްކަމަށްވާ "ރީޑް އެގްޒިހިބިޝަން" ގެ ފަރާތުންނެވެ.
މިއަހަރު ފާހަގަކުރަމުން އަންނަ ވިޒިޓް މޯލްޑިވްސް އިޔަރއާއި ގުޅުވައިގެން ޑަބްލިޔު.ޓީ.އެމް ފެއަރގައި ރާއްޖޭގެ ފަރާތުން ބައިވެރިވުމަށް ވާންޖެހޭ އެންމެފަހުގެ ތައްޔާރީތައް އެމް.އެމް.ޕީ.އާރ.ސީއިން މިހާރު ގެންދަވަނީ ކުރައްވަމުންނެވެ. އެގޮތުން މިފަހަރުގެ ފެއަރގައި ރާއްޖޭގެ ފަރާތުން ބައިވެރިވާ މަންދޫބުންނަށް، މިފެއަރއާއި ގުޅޭގޮތުންނާއި، ރާއްޖޭގެ ސްޓޭޑުން ލިބެން ހުރި ފުރުޞަތުތަކާއި ގުޅޭގޮތުން މަޢުލޫމާތުދިނުމުގެ ބައްދަލުވެމެއް އެމް.އެމް.ޕީ.އާރ.ސީއިން ވަނީ ބާއްވަވާފައެވެ. މި ބައްދަލުވުމުގައި، ފެއަރގެ ބައިވެރިންނަށް ރާއްޖޭގެ ސްޓޭންޑް ފަރުމާކޮށްފައިވާގޮތުގެ ޑިޒައިން ދައްކާލުމުގެ އިތުރުން، ފެއަރ ވީހާވެސް ކާމިޔާބުކަމާއެކު ކުރިއަށްގެންދެވޭނެގޮތްތަކާއި ގުޅޭގޮތުން ބައިވެރިންގެ ހިޔާލާއި، މަޝްވަރާ ހޯދާފައެވެ.
ޑަބްލިޔި.ޓީ.އެމް ފެއަރއަށް ވަމުންދާ ތައްޔާރީތަކާއި ގުޅޭގޮތުން ޕީ.އެސް.އެމް ނިއުސްއަށް މަޢުލޫމާތުދެއްވަމުން އެމް.އެމް.ޕީއާރ.ސީގެ ޑެޕިއުޓީ ޑައިރެކްޓަރ ފާތުމަތު ރާހިލް ވިދާޅުވީ، މިފެއަރއަކީ ދަތުރުފަތުރުގެ ދާއިރާގައި ހަރަކާތްތެރިވާ ފަރާތްތަކަށް އަމާޒުކޮށްގެން ބާއްވާ ފެއަރއެއްކަމުން، ރާއްޖޭގައި ހުރި ފުރުޞަތުތަކާގުޅޭގޮތުން ބޭރު ފަރާތްތަކަށް މަޢުލޫމާތުދިނުމަށް ޚާއްސަ މަސައްކަތްތަކެއް ކުރައްވާނެކަމަށެވެ. އެގޮތުން މިފަހަރު ފެނިގެންދާނެ އެންމެ ޚާއްސަ ހަރަކާތްތަކުގެ ތެރޭގައި، އޮފިޝަލް މޯލްޑިވްސް އެކަމަޑޭޝަން ގައިޑް ލޯންޗްކުރުމާއި، އައްޑޫ ސިޓީގައި ސީޕްލޭންގެ ޚިދުމަތް ރަސްމީކޮށް ފެށުމުގެ އިތުރުން، ގަން އިންޓަރނޭޝަނަލް އެއަރޕޯޓްގެ ތަރައްޤީ ކުރުމުގެ މަޝްރޫޢުއާއި ގުޅޭ މަޢުލޫމާތުދިނުން ހިމެނޭކަމަށް ރާހިލް ވިދާޅުވިއެވެ.
"މިފަހަރު ބޮޑަށް ހައިލައިޓް މިކޮށްލަނީ އޮފިޝަލް މޯލްޑިވްސް އެކަމަޑޭޝަން ގައިޑް ލޯންޗްކުރުމާއި، އައްޑޫ ސިޓީގައި ސީޕްލޭންގެ ޙިދުމަތް ރަސްމީކޮށް ފެށުމުގެ އިތުރުން، ގަން އިންޓަރނޭޝަނަލް އެއަރޕޯޓް ތަރައްޤީކުރުމުގެ ޕްލޭންއާއި ގުޅޭ ޕްރޮމޯޝަނަލް ވީޑިއޯ ކްލިޕެއް އާއްމުކުރުން. މީގެ އުތުރުންވެސް މިފެއަރއަކީ ޓްރެވަލް ޓްރޭޑަށް ޚާއްސަ ފެއަރއެއްވީމަ، އަޅުގަނޑުމެންގެ ސްޓޭންޑުގައި ބައިވެރިވާ ކޯ-އެގްޒިހިބިޓަރޒްއަށް އެބޭފުޅުންގެ ޕާޓްނަރުންނާއި ބައްދަލުކޮށް، ވަރަށް ގިނަ ބިޒްނަޒް ޑީލްތައް ނިމިގެންދާނެ މިފެއަރއިން" ފާތުމަތު ރާހިލް ވިދާޅުވިއެވެ.
މިފެއަރގައި ރާއްޖޭގެ ފަރާތުން ބައިވެރިކުރާ ސްޓޭޑުން ފެނިގެންދާނެ ޚާއްސަ ކަންތައްތަކާއި، ފެއަރގެ ބައިވެރިންނަށް ހުރި ފުރުޞަތުތަކާއި ގުޅޭގޮތުންވެސް ރާހިލް ވަނީ ޕީ.އެސް.އެމްއާއި މަޢުލޫމާތު ހިއްސާކޮށްފައެވެ.
"ޑަބްލިޔު.ޓީ.އެމް މިފަހަރުގެ ސްޓޭންޑުގައި މިދިޔައަހަރެކޭވެސް އެއްގޮތަށް ޕްރައިވެޓް މީޓިންތައް ބޭއްވުމަށް ވަކި ޓޭބަލްތަކެއް އެބަ ޚާއްސަކުރަން. އެއީ ވިޔަފާރި އުސޫލުން ވިއްކާގޮތަށް. އޭރުން އެ ޓޭބަލްތައް ގަންނަ ފަރާތްތަކަށް ލިބޭނެ އެބޭފުޅުން ބޭނުންވާ ޕްރައިވެސީ. އޭގެ އިތުރުން، އެބޭފުޅުން ވަރަށް ބޮޑަށް އިޝްތިހާރުވެގެންދާނެ. ހަމައެހެންމެ މިފަހަރު އަޅުގަނޑުމެންގެ ސްޓޭންޑުގައި ބަހައްޓާ ސްކްރީންގައި ހުރިހާ ކޯ-އެގްޒިހިބިޓަރޒްގެ ޕްރޮމޯޝަނަލް ކްލިޕެއް އެބަ ޕްލޭކޮށްދެން. މިއީ އަދި އަލަށް އަޅުގަނޑުމެން ކޮށްދޭކަމެއް" ޕީ.އެސް.އެމްއާއި ވާހަކަދައްކަވަމުން ރާހިލް ވިދާޅުވިއެވެ.
ޑަބްލިޔި.ޓީ.އެމް ފެއަރގައި ރާއްޖޭގެ ފަރާތުން 66 ކުންފުންނަކުން 168 މަންދޫބުން ބައިވެރިވުމަށް ހަމަޖެހިފައިވާކަމަށް އެމް.އެމް.ޕީ.އާރ.ސީއިން މަޢުލޫމާތުދެއްވައެވެ. މީގެ ތެރޭގައި ރާއްޖޭގެ ފަތުރުވެރިކަމުގެ ދާއިރާގައި ޙަރަކާތްތެރިވާ ޓްރެވަލް އެޖެންޓުންނާއި، ޓޫރިސްޓް ރިސޯޓްތަކާއި، ގެސްޓްހައުސްތަކުގެ އިތުރުން، ދަތުރުފަތުރު ކުރުމުގެދާއިރާގައި ހަރަކާތްތެރިވަމުން އަންނަ ބޮޑެތި ކުންފުނިތައް ހިމެނެއެވެ.