ފަތުރުވެރިކަމާއި އެއްވަރުގެ މާލީ އުފެއްދުންތައް ބޭނުންވޭ: ޝަރީފް

ބައިނަލްއަގުވާމީ ފަތުރުވެރިކަމެއް ދިވެހިރާއްޖޭގައި އޮންނައިރު، ހަމަ އެފެންވަރުގެ ފައިނޭންޝަލް ޕްރޮޑަކްޓްތައްވެސް ރާއްޖޭގައި އޮތުން މުހިންމު ކަމަށް ބޭންކް އޮފް މޯލްޑިވްސް، ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވެއްޖެއެވެ.

ޝަރީފް މިހެން ވިދާޅުވީ، ސްވައިޕް ރަސްމީކޮށް އިފްތިތާހުކުރުމަށް ބޭއްވި ރަސްމިއްޔާތު ނިންމާލުމަށްފަހު ޕީއެސްއެމް ނިއުސްއަށް ދެއްވި ޚާއްސަ އިންޓަރވިއުއެއްގައެވެ.

ބޭންކް އޮފް މޯލްޑިވްސްގެ ޑިޖިޓަލް ވޮލެޓް ސްވައިޕަކީ، ވިޒިޓް މޯލްޑިވްސްގެ ރަސްމީ ވޮލެޓެވެ. މި ވޮލެޓް ރަސްމީކޮށް އިފުތިތާޙު ކުރީ، މިހާރު ޖަރުމަނުގައި ކުރިއަށްދާ އައިޓީބީ ބާލިންގެ ތެރެއިން ބޭއްވި ޚާއްޞަ ރަސްމިއްޔާތެއްގައެވެ. މި ރަސްމިއްޔާތުގައި މި ޑިޖިޓަލް ވޮލެޓް ރަސްމީކޮށް އިފްތިތާޙު ކޮށްދެއްވީ، މަޓީގެ ޗެއަރމަން ޙުސެއިން އަފީފެވެ.

ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައި ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވީ، އައިޓީބީ ބާލިންގެ ތެރެއިން މިވޮލެޓް ލޯންޗުކުރުމުގެ މައިގަނޑު ބޭނުމަކީ ރާއްޖޭގެ ފަތުރުވެރިކަމުގެ ސިނާޢަތަށް ވަރަށް ބޮޑު ފައިދާތަކެއް ލިބޭނެ ވޮލެޓެއް ކަމަށް ގަބޫލުކުރެވޭތީ ކަމަށެވެ.

"މިއީ ހަމަ ދުނިޔޭގެ ފެންވަރުގެ ވޮލެޓެއް. އަޅުގަނޑު ގަބޫލުކުރަނީ އެހެނިހެން ވޮލެޓްތަކާ އެއްހަމައެއްގައި ފައިތިލަ ސާބިތުކޮށްދޭ ވޮލެޓަކަށް މި ވޮލެޓު ވާނެކަން. އެހެންނުވާންވީ ސަބަބެއް ނެތް، ރާއްޖޭގައި މިއޮންނަނީ މުޅި ދުނިޔޭގައިވެސް މިއޮންނަ އެންމެ ބޮޑު ޓޫރިޒަމް. އަދި އެންމެ ބޮޑެތި ރިސޯޓުތައް. އެހެންވެއްޖެއްޔާމު މިފަދަ ފައިނޭންޝަލް ޕްރޮޑަކްޓްތައްވެސް އަޅުގަނޑުމެން ދެކެނީ މިފަދަ ވަރުގަދަ ބައިނަލްއަގުވާމީ ޕްރޮޑަކްޓުތަކަަކަށް ވެގެން އެހެން ބައިނަލްއަޤުވާމީ ވޮލެޓްތަކާއި ކޮމްޕީޓުކުރުން މުހިންމުކަމަށް." ޝަރީފް ވިދާޅުވިއެވެ.

ޝަރީފް ވިދާޅުވީ، މި ވޮލެޓުގެ ސަބަބުން ރިސޯޓުތަކަށް ލިބޭނެ އެންމެ ބޮޑު ފައިދާއަކީ ޚަރަދު ކުޑަވުމާއި ވަގުތުން ފައިސާ ލިބުން ކަމަށެވެ. އެގޮތުން އެހެން ވޮލެޓުތަކާއި ކްރެޑިޓް ކާޑުތަކުން މިހާރު ފައިސާ ދައްކާއިރު 2.5 އިންސައްތައަށްވުރެ މަތިން ކޮމިޝަން ނެގި ނަމަވެސް، ސްވައިޕް މެދުވެރިކޮށް ހަދާ މުއާމަލާތްތަކުން ނަގާނީ އެންމެ 1 އިންސައްތަ ކަމަށް ޝަރީފް ފާހަގަކުރެއްވިއެވެ. މީގެ އިތުރުން ކާޑު ހޯލްޑަރުގެ އަތުންވެސް އަދި މާޗެންޓު އަތުންވެސް އެއްވެސް އިތުރު ފީއެއް ނުނަގާނެކަމަށް ވިދާޅުވިއެވެ.

ސްވައިޕަކީ 100 އިންސައްތަ ދިވެހިން ފަރުމާކޮށް ޑިޒައިންކޮށްފައިވާ، އެންމެ ޒަމާނީ ވަސީލަތްތައް ހިމެނޭ ވޮލެޓެއްކަން ފާހަގަކުރައްވާ ޝަރީފް ވިދާޅުވީ، މި ވޮލެޓް މެދުވެރިކޮށް ރާއްޖޭން ބޭރު ފަރާތްތަކުންވެސް ފަސޭހަކަމާއެކު ފައިސާ ފޮނުވޭނެ އިންތިޒާމު މިހާރު ހަމަޖެހިފައިވާ ކަމަށެވެ. އެގޮތުން އެޕް ޑައުންލޯޑުކޮށް ވޮލެޓަށް ފައިސާ އެޅުމުން، ރާއްޖޭގައި ހުންނަ ފަރާތްތަކަށް ވަގުތުން ފައިސާ ލިބޭނެ ކަމަށެވެ.

ސްވައިޕް ރަސްމީކޮށް އިފްތިތާޙު ކޮށްފައިވަނީ، މިދިޔަ އަހަރުގެ އޮކްޓޯބަރު މަހުގެ ތެރޭގައެވެ. އަދި އެއަހަރުގެ ޑިސެންބަރު މަހުގެ ތެރޭގައި މި ޑިޖިޓަލް ވޮލެޓުގެ ބީޓަރ ޓެސްޓިން ކުރިއަށް ގެންގޮސްފައިވެއެވެ. މީގެއިތުރުން، މިދިޔަ ޖަނަވަރީ މަހު ލިމިޓެޑް ރިލީޒަށް ހުޅުވާލުމަށްފަހު ސްވައިޕް ބޭނުންކުރާ ފަރާތްތަކަށް މި ވޮލެޓުގެ މައިގަނޑު ފީޗަރތައް ތަޖުރިބާ ކުރުމުގެ ފުރުޞަތު ވަނީ ދީފައެވެ. އެގޮތުން ޕަރސަން-ޓު ޕަރސަން ޓްރާންސްފަރތަކާއި، ކިއުއާރު ޕޭމަންޓް އަދި އެކައުންޓުން ކުރާ ޚަރަދުތަކުގެ ތަފާސް ހިސާބުތައް އަމިއްލައަށް ބަލާލެވޭނެ ގޮތާއި، ޕޭމަންޓް ލިންކް ޝެއާކޮށް، ފަސޭހައިން ޓޮޕް އަޕްކޮށް ފައިސާ ނެގުން ފަދަ ޚިދުމަތްތައް ބޭނުން ކުރުމުގެ ފުރުޞަތު ކަސްޓަމަރުންނަށް ވަނީ ހުޅުވާލާފައެވެ.