ޔަހޫދީންނާއި އެމެރިކާ ގުޅިގެން އީރާނަށް ދެމުންދާ ނިރުބަވެރި ޙަމަލާތަކުގައި އެ ޤައުމުގެ ދެކުނުގެ ސިޓީއެއް ކަމަށްވާ މީނާބްގައި ހުންނަ އަންހެން ކުދިންގެ މަދަރުސާއަކަށް ދިން ޙަމަލާގެ ފުރިހަމަ ތަޙުޤީޤެއް ހިންގަން އދގެ އިންސާނީ ޙައްޤުތަކާބެހޭ އޮފީހުން ގޮވާލައިފިއެވެ.
އެ އޮފީހުގެ ތަރުޖަމާނު ވިދާޅުވީ، އެ ޙަމަލާ ހިނގަން މެދުވެރިގޮތް ހޯދަން މިނިވަން އަދި އިންސާފުވެރި ތަޙުޤީޤެއް ހިންގުމަކީ، އެ ޙަމަލާދިން ފަރާތްތަކުގެ ޒިންމާއެއް ކަމަށެވެ. ނަމަވެސް، ތަރުޖަމާނު ނެރުއްވި ބަޔާނުގައި އެމެރިކާ ނުވަތަ ޔަހޫދީންގެ ނަމެއް ގަނެފައެއްނުވެއެވެ.
އަދި މެދުއިރުމަތީގައި މިހާރު ހިނގަމުންދާ ހަމަނުޖެހުންތަކުގައި ހުރިހާ ފަރާތްތަކުން ވެސް ކެތްތެރިކަން އިސްކޮށް، މަޝްވަރާގެ މޭޒަށް އެނބުރި އައުމަށް އދއިން ވަނީ ގޮވާލައިފައެވެ.
މި ޙަމަލާގައި 165 މީހުން ޝަހީދުކޮށްލައި، 95 މީހުން ޒަޚަމު ކޮށްލާފައިވާއިރު، މީގެ ތެރޭގައި ގިނައީ ކުޑަކުދިންނެވެ.
ނަމަވެސް، އެއީ ހަނގުރާމައިގެ ޖަރީމާއެއްގެ ގޮތުގައި ކަނޑައެޅޭ މިންވަރަށް މަޢުލޫމާތު އަދި ލިބިފައިނެތް ކަމަށް އެ އޮފީހުން ބުންޏެވެ.
ފެބްރުއަރީ 28ވަނަ ދުވަހުން ފެށިގެން، ޔަހޫދީންނާއި އެމެރިކާއިން ދެމުންދާ ޙަމަލާތަކުގައި މަދުރަސާތަކުގެ އިތުރުން، ގިނަ އަދަދެއްގެ ޞިއްޙީ މަރުކަޒުތަކަކާއި ހަސްފަތާލުތަކަކަށް ބޮޑެތި ގެއްލުންތަކެއް ލިބިފައިވާކަމަށް އީރާނުގެ ރެޑް ކްރެސެންޓު ސޮސައިޓީން ވަނީ ބުނެފައެވެ.
އީރާނާ ދެކޮޅަށް ޔަހޫދީންނާއި އެމެރިކާ ގުޅިގެން ފަށާފައިވާ ޣައިރުޤާނޫނީ ހަނގުރާމައިގައި ޝަހީދު ކުރަމުންދާ މީހުންގެ އަދަދު ވެސް ދަނީ އިތުރުވަމުންނެވެ.
މިގޮތުން، މި ޙަމަލާތަކުގައި މިހާތަނަށް އީރާނުގެ 787 މީހުން ޝަހީދުވެފައިވާ ކަމަށް ރެޑް ކްރެސެންޓް ސޮސައިޓީއާ ހަވާލާދީ އެޤައުމުގެ ދައުލަތުގެ މީޑިއާއިން ވަނީ ބުނެފައެވެ.
އޭގެތެރޭގައި، އީރާނުގެ ރޫހީ އެންމެ މަތީ ވެރިޔާ އާޔަތުالله ޢަލީ އަލް-ޚާމަނާޢީ އާއި އެ މަނިކުފާނުގެ ޢާއިލާގެ ގިނަ މެންބަރުންތަކެއްގެ އިތުރުން އީރާންގެ ދިފާޢީ އިދާރާތަކާއި އަސްކަރިއްޔާގެ އިސްވާރުންގެ ތެރެއިން ބަޔަކު ވެސް ވަނީ ޝަހީދު ކޮށްލާފައެވެ.