އެލްއޭ އޮލިމްޕިކްސް 2028 އޮލިމްޕިކް ސްކޮލަރޝިޕް ނަބާހާއަށް

އެލްއޭ އޮލިމްޕިކްސް 2028 އޮލިމްޕިކް ސްކޮލަރޝިޕްގެ ފުރުސަތު ރާއްޖޭގެ ކާމިޔާބު ބެޑްމިންޓަން ކުޅުންތެރިޔާ ފާތިމަތު ނަބާހާ އަބްދުއްރައްޒާޤް (ނަބާ) އަށް ލިބިއްޖެއެވެ.

އޮލިމްޕިކް ސޮލިޑާރިޓީ އާއި އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން ހުށަހަޅާ މި ސްކޮލަރޝިޕަށް ނަބާ ހޮވިފައިވާއިރު 2028 ގައި އެމެރިކާގެ ލޮސް އެންޖެލިސްގައި އޮންނަ އޮލިމްޕިކް ގޭމްސްގެ ކޮލިފިކޭޝަނުގައި ރާއްޖެ ތަމްސީލު ކުރާނީ އޭނާއެވެ.

ރާއްޖޭގެ ސީނިއާ ޤައުމީ ޓީމުގައި ހިމެނޭ ނަބާއަކީ ރިވައިވަލް ސްޕޯޓްސް ކުލަބުގެ ކުޅުންތެރިކެވެ. މި ސްކޮލަރޝިޕަށް ނަބާ ހޮވިފައިވާކަން ހާމަކޮށް ރިވައިވަލް ސްޕޯޓްސްއިން ވަނީ އޭނާއަށް ކާމިޔާބީއަށް އެދި މަރުހަބާ ކިޔާފައެވެ.

އެލްއޭ އޮލިމްޕިކްސް 2028 އޮލިމްޕިކް ސްކޮލަރޝިޕަކީ އޮލިމްޕިކް ގޭމްސްއަށް ތައްޔާރުވުމަށް އެތުލީޓުންނަށް އެހީތެރިކަން ފޯރުކޮށްދީ ކޮލިފިކޭޝަނަށް އެތުލީޓުން ތައްޔާރުކޮށްދިނުމަށް ކުރިޔަށް ގެންދާ ޕްރޮގްރާމެކެވެ.

މި ސޮލަރޝިޕްގެ ދަށުން ޓްރޭނިންތައް ވަރުގަދަކުރުމާއި، އިތުރު އިންޓަނޭޝަނަލް އެކްޕޯޝަރ ނުވަތަ ބައިނަލްއަގްވާމީ ކުޅުންތެރިންނާއެކު މެޗުތައް ކުޅުމުގެ އިތުރު ފުރުސަތުތައް ފަހިވުމާއި، އަދި އެލްއޭ އޮލިމްޕިކްސްއަށް ތައްޔާރުވުމަށް ބޭނުންވާ ވަސީލަތްތައް ފަހިވެގެންދާނެއެވެ.

އެލްއޭ އޮލިމްޕިކްސް 2028 އޮލިމްޕިކް ސްކޮލަރޝިޕަށް ރާއްޖޭގެ 6 އެތުލީޓުން ހޮވިފައިވާއިރު އޭގެތެރޭގައި ހިމެނޭ ނަބާއަކީ 2024 ވަނަ އަހަރު ބޭއްވި ޕެރިސް އޮލިމްޕިކްސް އާއި 2020 ވަނަ އަހަރު ބޭއްވި ޓޯކިޔޯ އޮލިމްޕިކްސްގައިވެސް ރާއްޖެ ތަމްސީލުކޮށްފައިވާ އެތުލީޓެކެވެ. ނަބާއަކީ ރާއްޖޭގެ ބެޑްމިންޓަންގެ ތާރީޚުގައި އޮލިމްޕިކްސްގައި ވާދަކުރުމުގެ ފުރުސަތު ހޯދި ފުރަތަމަ އަންހެން ކުޅުންތެރިޔާއެވެ.

މި ސްކޮލަރޝިޕްގެ ފުރުސަތު ލިބިފައިވާ އެތުލީޓުންނަކީ: 1. ފާތިމަތު ދީމާ އަލީ (ޓޭބަލް ޓެނިސް) 2. އާދަމް ރިފްއަތު (އެތުލެޓިކްސް) 3. ⁠މަރިޔަމް އީޝަލް މިސްބާހު (ޝޫޓިން) 4. ⁠މުޙައްމަދު އިނާން އަބްދުލްހަންނާން (ސާރފިން) 5. ⁠ފާތިމަތު ނަބާހާ އަބްދުއްރައްޒާޤް (ބެޑްމިންޓަން) 6. ⁠އިފްޒާލް އިބްރާހިމް މެހެފޫޒް (ސްވިމިންގ)

އޭނާއަކީ ރާއްޖޭގެ އަންހެން އެތުލީޓުންގެ ތާރީހަށް ބަލާއިރު އެންމެ ކާމިޔާބު އެއް އެތުލީޓެވެ. އޭނާ ވަނީ ބައިނަލްއަގްވާމީ އެކިއެކި މުބާރާތްތަކުން ރާއްޖެއަށް މެޑަލް ގެނެސްދީފައެވެ. އަދި އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި ގަދަ ތިނެއްގައި ހިމެނިފައިވާ ނަބާ ވަނީ ބެޑްމިންޓަންގެ ދުނިޔޭގެ މައި އިދާރާ، ބީޑަބްލިއުއެފްއިން ރާއްޖެ ސަސްޕެންޑްކޮށްފައި އޮތް ދުވަސްވަރުވެސް އަމިއްލަ ގޮތުން ބައިނަލްއަގްވާމީ މުބާރާތްތަކުގައި ވާދަކޮށް ރާއްޖެއަށް ރަންވަނަތަކެއް ގެނެސްދީފައެވެ.

ރިވައިވަލް ސްޕޯޓްސް އިން މިދިޔަ އަހަރުގެ ނޮވެމްބަރުގައި ބައިވެރިވި ދެކުނު އެފްރިކާ ޓުއަރގެ ތިން މުބާރާތަކުން ނަބާ ވަނީ އެކިވަނަތައް ހޯދާފައެވެ.

އެގޮތުން ޒެމްބިއާ އިންޓަނޭޝަނަލް ބެޑްމިންޓަން ސީރީޒް 2025ގެ ޑަބަލްސް އިވެންޓުން ނަބާ އާއި ޒަޔާން ޒަކީގެ ޕެއަރ ވަނީ ރަން މެޑަލް ހޯދާފައެވެ. އެމުބާރާތުގެ އަންހެން ޑަބަލްސް އިވެންޓުން ނަބާ އާއި ނަބީގެ ޕެއާވަނީ ރިހި މެޑަލް ހޯދާފައެވެ. އަދި ބޮޓްސްވާނާ އިންޓަނޭޝަނަލް މުބާރާތުގެ އަންހެން ޑަބަލްސް ބައިން ނަބާ އާއި ނަބީގެ ޕެއާއިން ރިހި މެޑަލް ހޯދިއިރު މިކްސްޑް ޑަބަލްސް އިވެންޓުން ޒަޔާން އާއި ނަބާގެ ޕެއާއިން ވަނީ ލޯ މެޑަލް ހޯދާފައެވެ.

ދެކުނު އެފްރިކާގެ ކޭޕްޓައުންގައި މިދިޔަ އަހަރުގެ ނޮވެމްބަރު 27-30 އަށް ކުރިއަށްދިޔަ އަކުއާސްޕްރިންގްސް ސައުތު އެފްރިކާ އިންޓަރނޭޝަނަލް ބެޑްމިންޓަން މުބާރާތުގެ އަންހެނުންގެ އޯޕަން ސިންގަލްސްގައި ނަބާ ވަނީ ރިހި މެޑެލް ހޯދާފައެވެ. އަދި މިކްސްޑް ޑަބަލްސްގައި ޒަޔާން ޒަކީ އާއިއެކު ވާދަކޮށް ނަބާ އާއި ޒަޔާންގެ ޕެއަރއިން ލޯ މެޑަލް ހޯދިއެވެ.

އިންޓަރނޭޝަނަލް ބެޑްމިންޓަން ފެޑަރޭޝަން ޤަބޫލްކުރާ މުބާރާތަކުން ރާއްޖެއަށް އެންމެ ފުރަތަމަ ދެ ރަން މެޑަލް ހޯދާދީފައިވަނީވެސް ނަބާއެވެ. އެއީ 2019ވަނަ އަހަރު ޕާކިސްތާންގައި ކުރިއަށްދިޔަ ޔޮނެކްސް ސަންރައިސް ޕާކިސްތާން އިންޓަރނޭޝަނަލް ސީރީސްގެ މިކްސް ޑަބަލްސް އިވެންޓުން ހޯދި ދެ ރަން މެޑަލްއެވެ.