ބ. އެޓޯލް ކޮންޒަރވޭޝަން ފަންޑުގެ ހިލޭ އެހީގެ ދަށުން ބ.އަތޮޅުގައި ތަރައްޤީޤެ އެކި މަޝްރޫޢުތައް ހިންގުމަށް އަންނަ އަހަރު ކުރީކޮޅު އެހީއަށް އެދުމުގެ ފުރުޞަތު ހުޅުވާލުމަށް ހަމަޖެހިފައިވާކަމަށް ބަޔޮސްފިޔަ ރިޒަރވް އޮފީހުން ވިދާޅުވެއްޖެއެވެ.
ބ. އެޓޯލް ކޮންޒަރވޭޝަން ފަންޑުގެ އެހީގައި ބ.އަތޮޅުގެ 7 ރަށެއްގައި އެކި މަޝްރޫޢުތައް މިހާރު ހިންގަމުން ދެއެވެ. އަދި އެ މަޝްރޫޢުތަކަށް 1.5 މިލިއަން ރުފިޔާ ދޫކުރައްވާފައިވާ ކަމަށް ބަޔޮސްފިޔަ ރިޒަރވް އޮފީހުން ވިދާޅުވެއެވެ. ޕީއެސްއެމް ނިއުސްއަށް ދެއްވި އިންޓަރވިއުއެއްގައި ބަޔޮސްފިޔަ ރިޒަރްވް އޮފީހުގެ އައުޓްރީޗް އޮފިސަރ ޝާފީ ޢަލީ ވިދާޅުވީ، މިހާރު ހިންގަމުންދާ މަޝްރޫޢުގެ ކާމިޔާބީއަށް ބައްލަވައި އަންނަ އަހަރު ކުރީކޮޅު އެހީއަށް އެދުމުގެ ފުރުޞަތު ހުޅުވާލުމަށް ނިންމާފައިވާ ކަމަށެވެ. އަދި އެހީގެ ގޮތުގައި ދޫކުރާނެ ފައިސާގެ ޢަދަދު ކަނޑައަޅާނީ އެ ފަންޑުގެ ބޯޑުން ކަމަށްވެސް ޝާފީ ވިދާޅުވިއެވެ.
ބ. އެޓޯލް ކޮންޒަރވޭޝަން ފަންޑުގެ ހިލޭ އެހީގެ ދަށުން ބ.އަތޮޅުގައި މިހާރު ހިންގަމުންދާ މަޝްރޫޢުތަކަށް ބަލާއިރު، ބ. މާޅޮހުގައި ރައްކާތެރިގޮތުގައި ކުނި މެނޭޖްކުރުމާއި، ތުޅާދުއާއި އޭދަފުށީގައި މީހުން ބިނާކުރުމަށް ހިންގާ ތަފާތު ޕްރޮގްރާމްތަށް ހިންގުމަށް އެ ފަންޑުން ހޭދަކުރަމުންދާކަމަށް ބަޔޮސްފިޔަ ރިޒަރވް އޮފީހުން ވިދާޅުވެއެވެ. އަދި މިއީ ކާމިޔާބު މަޝްރޫޢުތަކެއް ކަމަށް އެ އޮފީހުން ފާހަގަކުރެއެވެ.