ހޮސްޕިޓަލިޓީ ދާއިރާގެ ވަޒީފާތަކަށް ކުރިމަތިލެވޭ "ރުކުރި" ތަޢާރަފުކޮށްފި

ހޮސްޕިޓަލިޓީ ދާއިރާއިން ވަޒީފާ ހޯދާ މީހުންނާއި ވަޒީފާ ދޭ މީހުން ގުޅުވައިދޭ ޕްލެޓްފޯމެއް ކަމަށްވާ "ރުކުރި" ތަޢާރަފުކޮށްފިއެވެ.

މި ޕްލެޓްފޯމް ތަޢާރަފުކޮށްފައިވަނީ އެކަމަށް ޚާއްސަކޮށްގެން މިއަދު ބާސެލޯސް ނަސަންދުރައިގައި ބޭއްވި ޚާއްސަ ހަފްލާއެއްގައެވެ.

"ރުކުރި" އަކީ ފަތުރުވެރިކަމުގެ ދާއިރާއާއި ހޮސްޕިޓަލިޓީ ދާއިރާއަށް އަންނަ ކުރިއެރުންތަކަށް ރިއާޔަތްކޮށް، ފަސޭހަކަމާއެކު އެ ދާއިރާގައި ހުރި ވަޒީފާގެ ފުރުސަތުތަކާ ގުޅޭ މައުލޫމާތާއި އެ ދާއިރާއިން ވަޒީފާ ހޯދާ މީހުންނާއި ވަޒީފާ ދޭ ފަރާތްތައް އެއް ޕްލެޓްފޯމެއްގެ ދަށަށް ގެނައުމަށް އުފައްދާފައިވާ ޕްލެޓްފޯމެކެވެ. މި ޕްލެޓްފޯމު 2023ވަނަ އަހަރު އުފެއްދީ ޚާއްސަކޮށް ފަތުރުވެރިކަމުގެ ދާއިރާއަށެވެ.

މި ޕްލެޓްފޯމުގެ ތެރެއިން ލަގްޒަރީ ރިސޯޓުތަކުން ހުޅުވާލާ ލީޑަރޝިޕް ފުރުސަތުތަކާއި ގެސްޓްހައުސް، ރެސްޓޯރަންޓް، އަދި ފަތުރުވެރިކަމުގެ ދާއިރާގައި ހިމެނޭ އެހެނިހެން ތަންތަނުގައި ހުރި ފުރުސަތުތައް ފަސޭހަކަމާއެކު ބަލައިލެވޭނެއެވެ. މި ޕްލެޓްފޯމުން ވަޒީފާގެ ފުރުސަތުތައް ހޯދުމާއި ވަޒީފާތަކަށް ކުރިމަތިލުން ފަސޭހަވެގެންދާނެއެވެ.

ރުކުރި މެދުވެރިކޮށް ވަޒީފާތަކަށް ހުށަހަޅާ ފަރާތްތަކަށް ވަގުތުން އެ އެޕްލިކޭޝަނެއްގެ ޕްރޮސެސްކުރިއަށްދާގޮތް ބަލައިލެވޭނެއެވެ. އަދި ވަޒީފާ ދޭ ފަރާތްތަކުންވެސް އެ ވަޒީފާއަށް މީހަކުނެގުމުގެ މަރުހަލާ ދެފުށް ފެންނަ ގޮތެއްގައި މި ޕްލެޓްފޯމުގެ ތެރެއިން ކުރިއަށްގެންދާނެއެވެ.

ރުކުރިގެ ކޯ ފައުންޑަރ އަލީ ފާއިޒް ވިދާޅުވީ އެ ޕްލެޓްފޯމުގެ މަގުސަދަކީ ވަޒީފާއަށް މީހުން ނެގުމުގެ ކަންކަން ފަސޭހަކޮށްދީ، ހަމަހަމަ ފުރުސަތު ފަހިކޮށްދިނުމަށް ކަމަށެވެ. އަދި މީގެ ސަބަބުން ދިވެހިރާއްޖޭގެ މަސައްކަތްތެރިން ބާރުވެރިކުރުވައި، ވަޒީފާ ދޭ ފަރާތްތަކަށް ވަޒީފާއަށް މީހުން ނެގުމުގެ ކަންކަން އެތައް ގޮތަކުން ލުއިވެގެންދާނެ ކަމަށްވެސް އަލީ ފާއިޒް ވިދާޅުވިއެވެ.

ރުކުރި އަކީ އައިލެންޑް ރެކްރޫޓްސްއިން އުފައްދާފައިވާ ޕްލެޓްފޯމެކެވެ.