ގޯލްޑަން ފުޓްސަލް ޗެލެންޖް 2026 ގެ ޒޯން 2 ގައި މާޅެންދޫއާއި ދުވާފަރުން ކުޅުނު މެޗުތަކުން މޮޅުވެއްޖެއެވެ.
މުބާރާތުގައި މާޅެންދޫއިން ބުރާސްފަތި ދުވަހުގެރޭ ނ. މާޅެންދޫއިން ށ. ފޯކައިދޫގެ މައްޗަށް ކުރިހޯދީ 1-5 ގެ ނަތީޖާއަކުންނެވެ. މެޗުގައި މާޅެންދޫގެ ލަނޑުތައް ޖަހައިދިނީ މުޙައްމަދު ފަރުހާނާއި އަލީ ފާރިޝްގެ އިތުރުން އިބްރާޙީމް ޒަޔާން އަދި އަފީފް އީސާއެވެ. ފަރުހާން ވަނީ މެޗުގައި ދެ ލަނޑު ޖަހާފައެވެ.
ފޯކައިދޫއިން މެޗުގައި ޖެހި ހަމަ އެކަނި ލަނޑު އެ ޓީމަށް ކާމިޔާބުކޮށްދިނީ އަބްދުﷲ ރުޝްދާނެވެ. މި މެޗުގެ މޮޅު ކުޅުންތެރިއަކަށް ހޮވުނީ ވެސް، މެޗުގައި ދެ ލަނޑު ޖެހި ފަރުހާނެވެ.
ޒޯން 2 ގެ ދެވަނަ މެޗުގައި ބުރާސްފަތި ދުވަހުގެރޭ ށ. ކަނޑިތީމުގެ މައްޗަށް ރ. ދުވާފަރުން ކުރިހޯދީ 0-2 ގެ ނަތީޖާއަކުންނެވެ. މި މެޗުގައި ދުވާފަރުގެ ލަނޑުތައް ޖަހައިދިނީ އިބްރާޙީމް އަނާން އަލީއާއި މުޙައްމަދު އިސާމެވެ. މެޗުގެ މޮޅު ކުޅުންތެރިއަކަށް ހޮވުނީ އިސާމެވެ.
މި މޮޅާއެކު ދުވާފަރު ވަނީ މި ހަތަރު ޓީމު ހިމެނޭ ޒޯން 2 ގެ ގްރޫޕް ތާވަލުގެ އެއްވަނައިގައި ތިން ޕޮއިންޓުގެ ލީޑެއް ނަގާފައެވެ. ދެ މެޗުން ވެސް މޮޅުވެ އެއްވަނައިގައި ހަ ޕޮއިންޓާއެކު އެ ޓީމު އޮތްއިރު، ދެވަނައިގައި އޮތް ކަނޑިތީމާއި ތިންވަނައިގައި އޮތް މާޅެންދޫއަށް، ޕޮއިންޓު ލިބިފައިވެއެވެ. ކަނޑިތީމަށް ކުރި ލިބެނީ ފައިދާ ގޯލުގެ ތަފާތުންނެވެ. ތާވަލުގެ ފުލުގައި އޮތީ ޕޮއިންޓެއް ލިބިފައި ނުވާ ފޯކައިދޫއެވެ.