ފަރަންސޭސިވިލާތުގައި ޤާނޫނީ ގޮތުން މީސްމީޑިއާގެ މަންސަތައް ބޭނުން ކުރެވޭނެ އެންމެ ހަގު އުމުރަކީ 15 އަހަރު ކަމުގައި ކަނޑައެޅުމާ ގުޅޭ ގޮތުން ހުށަހަޅާފައިވާ ބިލަށް އެ ޤައުމުގެ ޤާނޫނު ހަދާ މަޖިލީހުގެ ތިރިގެއިން ރުހުން ދީފިއެވެ. 15 އަހަރުން ދަށުގެ ކުދިން މީސްމީޑިއާގެ މަންސަތައް ބޭނުން ކުރުން މަނާކުރުމުގެ ބިލަށް އެ ޤައުމުގެ ޤާނޫނު ހަދާ މަޖިލީހުގެ ތިރިގޭގައި ވޯޓަށް އެހުމުން، އެ ބިލަށް ތާޢީދުކޮށް 116 މެންބަރުން ވަނީ ވޯޓު ދެއްވާފައެވެ. ބިލާ ދެކޮޅަށް ވޯޓު ދެއްވާފައި ވަނީ 23 މެންބަރުންނެވެ.
ޤާނޫނު ހަދާ މަޖިލީހުގެ ތިރިގެއިން ބިލަށް ރުހުން ދިނުމާއެކު، އެ މަޖިލީހުގެ މަތިގެ، ސެނެޓަށް ބިލު ވަނީ ފޮނުވާފައެވެ. ފަރަންސޭސިވިލާތުގެ ގިނަ އަދަދެއްގެ ރައްޔިތުން ޤަބޫލު ކުރާ ގޮތުގައި، މީސްމީޑިޔާގެ ސަބަބުން ކުޑަކުދިންގެ މެދުގައި ގަނާ ކުރުމުގެ ކުށްތައް އިތުރުވެ، ކުޑަކުދިންގެ ނަފްސާނީ ދުޅަހެޔޮ ކަމަށް އޮތް ހިރާސްތައް އިތުރުވެއެވެ. މީސްމީޑިޔާއަކީ ކުޑަކުދިންގެ މެދުގައި ހިނގާ މާރާމާރީ ފަދަ ކުށްތައް އިތުރުވާ މައިގަނޑު އެއް ސަބަބު ކަމުގައި ފަރަންސޭސިވިލާތުގެ ރައީސް އެމަނުއެލް މެޚްރޮން ވެސް ވިދާޅުވެފައިވެއެވެ.
ޤާނޫނީ ގޮތުން މީސްމީޑިއާގެ މަންސަތައް ބޭނުން ކުރެވޭނެ އެންމެ ހަގު އުމުރަކީ 15 އަހަރު ކަމުގައި ކަނޑައެޅުމަށް މަޖިލީހަށް ބިލެއް ހުށަހަޅާފައި ވަނީ މެކްޚްރޮންގެ ސަރުކާރުންނެވެ. އޮސްޓްރޭލިޔާއިން ވެސް ދާދި ފަހުން މި ފަދަ ޤާނޫނެއް ފާސްކޮށް، އަމަލު ކުރަން ފަށާފައިވެއެވެ. އޮސްޓްރޭލިޔާއެކޭ އެއްފަދައިން، ފަރަންސޭސިވިލާތުގައި ވެސް އެ ފަދަ ޤާނޫނެއް ފާސްކުރުމަށް މެކްޚްރޮން ގެންދަވަނީ ބާރު އަޅުއްވަމުންނެވެ. އަދި، މި އަހަރުގެ ސެޕްޓެންބަރު މަހުގައި ދިރާސީ އައު އަހަރުގެ ކިޔެވުން ފެށުމުގެ ކުރިން ޤާނޫނު ފާސްކޮށް، ތަންފީޒު ކުރަން ފެށުމަށް އޭނާ ގެންދަވަނީ ގޮވައިލައްވަމުންނެވެ.
ޤާނޫނީ ގޮތުން މީސްމީޑިއާގެ މަންސަތައް ބޭނުން ކުރެވޭނެ އެންމެ ހަގު އުމުރަކީ 15 އަހަރު ކަމުގައި ކަނޑައެޅުމަށް ހުށަހަޅާފައިވާ ބިލަށް ފަރަންސޭސިވިލާތުގެ ޤާނޫނު ހަދާ މަޖިލީހުގެ ތިރިގެއިން ރުހުންދީފައިވާއިރު، ވިލާތުގެ ބައެއް އެހެން ޤައުމުތަކުގައި ވެސް މި ފަދަ ޤާނޫނުތަކެއް އެކަށައެޅުމާ މެދު ދަނީ ވިސްނަމުންނެވެ. އެ ޤައުމުތަކުގެ ތެރޭގައި އިނގިރޭސިވިލާތް، ޑެންމާކް، ސްޕެއިން އަދި ގްރީސް ހިމެނެއެވެ. މީގެ އިތުރުން، ވިލާތުގެ އިއްތިޙާދު (އީޔޫ)ގެ މެންބަރު ޤައުމުތަކުގައި މި ފަދަ ޤާނޫނުތަކެއް އެކަށައެޅުމަށް ވިލާތުގެ ޤާނޫނު ހަދާ މަޖިލީހުން ވެސް ވަނީ ގޮވައިލާފައެވެ.