އިނގިރޭސި ފުޓުބޯޅަ ލީގު ޗެމްޕިއަންޝިޕް (އީއެފްއެލް ޗެމްޕިއަންޝިޕް) ގެ ޕޮއިންޓް ތާވަލުގެ އެއްވަނައިގައި އޮތް ކޮވެންޓްރީގެ މައްޗަށް، ނޯވިޗް ސިޓީން ކުރިހޯދައިފިއެވެ.
އަމިއްލަ ދަނޑުގައި ކުޅެ ނޯވިޗް މި މެޗުން މޮޅުވީ 1-2 ގެ ނަތީޖާއަކުންނެވެ.
ވާދަވެރި ކުޅުމެއް ފެނިގެންދިޔަ މި މެޗުގައި ފުރަތަމަ ލަނޑުޖަހައި ލީޑުނެގީ ކޮވެންޓްރީންނެވެ. ފުރަތަމަ ހާފުގެ 38 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ރޮމެއިން އެސޭއެވެ.
ލީޑުގައި އޮވެ ކޮވެންޓްރީން މި ހާފު ނިންމާލިއިރު، ދެވަނަ ހާފު ފަށައިގެން މިނެޓެއްގެ ތެރޭގައި ނޯވިޗުން ވަނީ ލަނޑެއްޖަހައި ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އަނީސް ބިން ސުލެއިމާނެވެ. މިއީ އަލީ އަޙްމަދު ތަނަވަސްކޮށްދިން ފުރުސަތަކުން އޭނާ ކާމިޔާބުކުރި ލަނޑެކެވެ.
ނަތީޖާ ހަމަހަމަކުރިތާ 21 މިނެޓުފަހުން، މެޗުން 67 ވަނަ މިނެޓުގައި އަލީ އަޙްމަދު ވަނީ ނޯވިޗަށް ލަނޑުޖަހައިދީ މެޗުގައި އެ ޓީމަށް ފުރަތަމަ ފަހަރަށް ލީޑުނަގައިދީ މެޗުން މޮޅުކޮށްދީފައެވެ. މިއީ މީގެ ތިން ހަފްތާ ކުރިން ވެންކޫވާ ވައިޓްކެޕްސްއިން ނޯވިޗް ސިޓީއަށް ބަދަލުވިފަހުން އަލީ އަޙްމަދު ކާމިޔާބުކޮށްދިން ދެވަނަ ލަނޑެވެ.
މި މޮޅާއެކު ލިބުނު ތިން ޕޮއިންޓާއެކު ނޯވިޗް ސިޓީ އޮތީ އީއެފްއެލް ޗެމްޕިއަންޝިޕުގެ ލީގު ތާވަލުގެ 18 ވަނައިގައި ކުޅުނު 29 މެޗުން 33 ޕޮއިންޓާއެކުއެވެ. ތާވަލުގެ އެއްވަނައިގައި އޮތް ކޮވެންޓްރީ މި މެޗުން ބަލިވިއިރު، އެ ޓީމުން މިވަނީ އެއްވަނައިގައި ލީޑު ފުޅާކުރަން ލިބުނު ފުރުސަތު ނަގާލާފައެވެ.
ނޯވިޗަށް 29 މެޗުން 58 ޕޮއިންޓު ލިބިފައިވާއިރު ދެވަނައިގައި އޮތް މިޑްލްސްބްރޯއަށް 29 މެޗުން 55 ޕޮއިންޓު ލިބިފައިވެއެވެ.