ބޫޓާނަށް މުބާރާތް ނިމުނީ މޮޅެއް ނުހޯދި، ފަހުމެޗުން ނޭޕާލް އަތުންވެސް ބަލި

ސާފް ފުޓްސަލް ޗެމްޕިއަންޝިޕުގައި ބޫޓާނުން ކުޅުނު ފަހު މެޗުން ވެސް ބަލިވެ، މޮޅެއް ނުހޯދި މުބާރާތް ނިންމާލަން ޖެހިއްޖެއެވެ.

މުބާރާތުގައި ކުޅުނު ހަ މެޗުގެ ތެރެއިން ފަސް މެޗުން ބޫޓާން ބަލިވެފައިވާއިރު އެއް މެޗު ވަނީ އެއްވަރުވެފައެވެ. އެއީ ފުރަތަމަ މެޗުގައި، ސްރީލަންކާއާ ދެކޮޅަށް ކުޅެއެވެ.

މުބާރާތުގައި ބޫޓާނުގެ ފަހު މެޗުގައި ނުކުތީ ނޭޕާލާ ދެކޮޅަށެވެ. މި މެޗުން ނޭޕާލް މޮޅުވީ 1-4 ގެ ނަތީޖާއަކުންނެވެ. މެޗުގައި ފުރަތަމަ ލަނޑުޖަހައި ލީޑުނެގީ ބޫޓާނުންނެވެ.

ކިކިންއަކުން ތަނަވަސްވި ފުރުސަތެއްގައި މި ލަނޑު އެ ޓީމަށް ކާމިޔާބުކޮށްދިނީ ޖެޓްސުއަން ޑޯޖީއެވެ.

ފުރަތަމަ ހާފުގައި ޖެހި މި ލަނޑާއެކު ވަރަށް އުއްމީދާއެކު ބޫޓާނުން މެޗު ކުޅެމުންދިޔައިރު، މި ހާފު އެ ޓީމުން ނިންމާލީ ލީޑުގައި އޮވެގެންނެވެ.

ދެވަނަ ހާފު ފަށައިގެން ނޭޕާލުން ކުޅުން ވަރުގަދަކުރިއިރު، މި ހާފުގެ ފުރަތަމަ މިނެޓުގެ ތެރޭގައި އެ ޓީމުން ވަނީ ލަނޑެއް ޖަހައި ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން ބިޖޭ ޝްރެސްތާއެވެ.

ނޭޕާލުން މެޗުގައި ލީޑުނެގި ލަނޑު، އަދި ލީޑު ފުޅާކުރި ލަނޑު ކާމިޔާބުކޮށްދިނީ ޕެމްބާ ޑޯޖޭ ލަމާއެވެ. އަދި މެޗުގައި އެ ޓީމުން ޖެހި ފަހު ލަނޑު، މެޗު ނިމެން ދެ މިނެޓަށްވެފައި ވަނިކޮށް ކާމިޔާބުކޮށްދިނީ ސަރޯޖް ޓަމަންގެވެ.

މި ނަތީޖާއާއިއެކު ނޭޕާލް ވަނީ ވަގުތީ ގޮތުން ތާވަލުގެ ދެވަނައަށް ކުރިއަށް ޖެހިލާފައެވެ. އެއީ ހަ މެޗުން 11 ޕޮއިންޓު ހޯދައިގެންނެވެ.

ތާވަލުގެ ތިންވަނައިގައި އޮތް ޕާކިސްތާނާއި ހަތަރުވަނައިގައި އޮތް އިންޑިއާއިން މުބާރާތުގެ ފަހު މެޗުގައި މިއަދު ކުރިމަތިލާއިރު، މި މެޗުން ޕާކިސްތާން އެއްވަރުވެއްޖެ ނަމަ ނޭޕާލަށް ދެވަނަ ޔަގީންވާނެއެވެ. އަދި ޕާކިސްތާން ބަލިވެއްޖެނަމަ ދެވަނަ ލިބޭނީ އިންޑިއާ އަށެވެ.

މުބާރާތުގެ ޗެމްޕިއަންކަން ރާއްޖެއިން ވަނީ ބާކީ އެއް މެޗު އޮއްވައި ޔަގީންކޮށްފައެވެ.