ސްރީލަންކާގައި މިއަދު ހިނގި ހާދިސާއެއްގައި ރޭލެއްގައި ޖެހި މަރުވި ދިވެހި ޒުވާނާގެ ހަށިގަނޑު ޢިޝާ ނަމާދަށްފަހު ވަޅުލައިފިއެވެ.
މި ހާދިސާގައި މަރުވެފައިވަނީ ގދ. މަޑަވެލީ، ބަހާރު، އުމުރުން 22 އަހަރުގެ އިޒްހާމް މުޙައްމަދު ކަމަށް ޕީއެސްއެމްއަށް މަޢުލޫމާތު ލިބިފައިވެއެވެ. އޭނާގެ ހަށިގަނޑު ވަޅުލުމުގެ އިންތިޒާމްތައް ހަމަޖެއްސުމުގައި އެ ޤައުމުގައި ހުންނަ ދިވެހި ހައިކޮމިޝަނުންވަނީ އެހީތެރިކަން ފޯރުކޮށްދެއްވާފައެވެ.
އޭނާގެ ހަށިގަނޑު ވަޅުލާފައިވަނީ ކޮލަމްބޯގެ ޖަވައްތާ ހުކުރު މިސްކިތުގެ ޤަބުރުސްތާނުގައިކަމަށް، ސްރީލަންކާގައި ހުންނަ ދިވެހި ހައިކޮމިޝަނާއި ހަވާލާދެއްވާ ފޮރިން މިނިސްޓްރީން މަޢުލޫމާތުދެއްވައެވެ. ޕީއެސްއެމް ނިއުސްއަށް މަޢުލޫމާތު ދެއްވަމުން ހައި ކޮމިޝަންގެ މިނިސްޓަރ ކައުންސެލަރ ޚަދީޖާ ނަޖީހާ ވިދާޅުވީ، އެ ޤައުމުގެ ފުލުހުން ހާދިސާ ތަހުޤީޤު ކުރަމުންދާކަމަށެވެ. އަދި، މަރުވި ޒުވާނާގެ ޢާއިލާއާއި ގުޅިގެން، ފުލުހުންނަށް ބޭނުންވާ އެއްބާރުލުން ދެއްވަމުން ގެންދަވާކަމަށްވެސް ނަޖީހާ މަޢުލޫމާތުދެއްވިއެވެ.
މިހާދިސާގައި ހިނގާފައިވަނީ ސްރީލަންކާގެ ބަމްބަލަޕިޓިޔާ ސަރަޙައްދުގެ ރެއިލްވޭއެއްގައިކަމަށް މަޢުލޫމާތު ލިބެއެވެ.