މެރިން ބަޔޮލޮޖީ ކިޔަވާ ދަރިވަރުންނަށް ޢަމާޒުކުރައްވައިގެން ބާއްވަވާ ފިޝް ކޭމްޕްތަކުގެ ތެރެއިން ބ.ތުޅާދޫގައި ބޭއްވެވި 8 ވަނަ ފިޝްކޭމްޕް ނިންމަވާލައްވައިފިއެވެ. މި ކޭމްޕްގައި ބ.އަތޮޅުގެ ތިން ރަށަކުން 30 ދަރިވަރުން ބައިވެރިވެފައިވެއެވެ.
ސްކޫލްތަކުގައި މެރިން ސައިންސް ކިޔަވާ ދަރިވަރުންނަށް އެކަމުގެ ޢަމަލީ ތަޖްރިބާ ހޯދައިދިނުމަށް މަގުފަހިކުރުވުމަށާއި، އޯލެވެލަށް ތައްޔާރުކުރުވުމުގެ ގޮތުން ފިޝަރީޒް މިނިސްޓްރީން އިސްނަންގަވައިގެން އެޑިއުކޭޝަން މިނިސްޓްރީއާ ގުޅިވަޑައިގެން ކުރިޔަށް ގެންދަވާ މި ފިޝް ކޭމްޕަކީ ވަރަށް ކާމިޔާބު ކޭމްޕެކެވެ. މި ކޭމްޕްގެ ތެރެއިން ދަރިވަރުންނަށް ސްކޫލްގައި ޢަމަލީ ތަޖްރިބާނުލިބޭ އެކި ފިލާވަޅުތަކުގެ ތަޖްރިބާ ލިބިގެންދާނެކަމަށް ފިޝަރީޒް މިނިސްޓްރީން ވިދާޅުވެއެވެ.
tw:https://twitter.com/FishAgri/status/769036914418651137
މިފަހަރުގެ ފިޝްކޭމްޕް ބާއްވާފައިވަނީ ބ. އަތޮޅު ތުޅާދޫ ސްކޫލުގައެވެ. މިކޭމްޕްގައި 3 ސްކޫލަކުން 30 ދަރިވަރުން ބައިވެރިވެފައިވެއެވެ. އޯލެވެލް އިމްތިޙާނަށް މެރިން ސައިންސް ކިޔަވަމުންދާ ކުދިންނަށް ޚާއްޞަ މިކޭމްޕްގައި ބައިވެރިވެފައިވަނީ ތުޅާދޫ ސްކޫލާއި، ދޮންފަނު އަދި ކަމަދޫ ސްކޫލެވެ. މިދަރިވަރުންނަށް މި ކޭންޕްގެ ތެރެއިން މަސްވެރިކަމާއި، މަހާގުޅުން ހުރި މޫދުގެ އެކި ކަންކަން އަމިއްލައަށް ތަޖުރިބާކުރުމުގެ ފުރުޞަތު ލިބިގެންގޮސްފައިވާނެކަމަށް ފިޝަރީޒް މިނިސްޓްރީން ވިދާޅުވެއެވެ. އެގޮތުން މިކޭމްޕްގައި ދަރިވަރުން ހޯދި ޢަމަލީ ތަޖުރިބާ އެދަރިވަރުންގެ އިމްތިޙާންތަކަށާއި ޢާންމު ދިރިއުޅުމަށްވެސް ބޮޑު އެހީއަކަށް ވެގެންދާނެކަމަށް މިނިސްޓްރީން ވިދާޅުވެއެވެ.
tw:https://twitter.com/FishAgri/status/769120075353763840
ސޮނޭވާފުށީގެ ޚާއްޞަ އެހީތެރިކަމާއެކު ކުރިޔަށް ގެންދިޔަ މިކޭމްޕް ނިމުމުގެ ރަސްމިއްޔާތު ޝަރަފްވެރިކޮށްދެއްވީ ތުޅާދޫ ކައުންސިލްގެ މެމްބަރު އާމިނަތު ރައުފާއެވެ. މި ރަސްމިއްޔާތުގައި ވާހަކަދައްކަވަމުން ރައުފާ ވިދާޅުވީ މިފަދަ ކޭމްޕްތަކަކީ ދަރިވަރުންނަށް އިމްތިޙާނަށް ތައްޔާރުވުމަށާއި، ޢަމަލީ ތަޖްރިބާ ހޯދުމަށް ލިބިގެންދާ ފަހި ފުރުޞަތެއްކަމަށެވެ. އަދި މިކަމުގެ ސަބަބުން ދަރިވަރުންނަށް އިމްތިޙާނަށް ތައްޔާރުވުމުގައި ބޮޑު އެހީތެރިކަމެއް ލިބިގެންދާކަމަށެވެ.
tw:https://twitter.com/FishAgri/status/769189354027843585
"އަޅުގަނޑުމެން ބ އަތޮޅަށް ނިސްބަތްވާ ކުދިން ހައްތަހާވެސް ތި ތިބީ. އަޅުގަނޑު އުންމީދު މިކުރަނީ މި ކޭމްޕުން ދަސްވިކޮށްމެވެސް އެއްޗެއް ތިކުދިންގެ ލައިފްގެ ކޮންމެވެސް ހިސާބަކުން ބ އަތޮޅަށް ޙާއްސަކޮށް އޭގެ އިތުރުން އަޅުގަނޑުމެންގެ މި ޤައުމަށްވެސް ކޮންމެވެސް އެއްޗެއް ދަސްކޮށްދެއްޗޭ ތިކުދިންނަށް ތި ދަސްވި އެއްޗެއްގެ ބޭނުން ހިފައިގެން. ކިތަންމެ ދިމާއެއް ހުންނާނެ ކިތަންމެ ގޮތަކަށް ތިކުދިންނަށް ޚިދުމަތްކޮށްދެވިދާނެ. މި ދާއިރާއިންވެސް." ތުޅާދޫ ކައުންސިލްގެ މެމްބަރު އާމިނަތު ރައުފާ ވިދާޅުވިއެވެ.
tw:https://twitter.com/FishAgri/status/769189679442690048
ފިޝަރީޒްމިނިސްޓްރީން މިފަދަ ކޭމްޕްތައް އެޑިއުކޭޝަން މިނިސްޓްރީއާ ގުޅިވަޑައިގެން ކުރިޔަށް ގެންދަވާއިރު މިކޭމްޕްތަކުގެ ނަތީޖާ ފެންނަމުންދާކަމަށް ފިޝަރީޒް މިނިސްޓްރީން ވިދާޅުވެއެވެ. އަދި މިފަދަ އިތުރުކޭމްޕްތައް ކުރިޔަށް ގެންދަވާނެކަމަށްވެސް ފިޝަރީޒް މިނިސްޓްރީން ވިދާޅުވެއެވެ. މި ކޭމްޕްގެ ތެރެއިން ދަރިވަރުންނަށް ކަނޑުފަރާއި މުރަކަ އަދި މަސްވެރިކަމާއި ތިމާވެއްޓާބެހޭ ތަފާތު މަޢުލޫމާތާއި ޢަމަލީ ޙަރަކާތްތަކުގައި ބައިވެރިވެ، ތަޖްރިބާހޯދުމުގެ ފުރުޞަތު ލިބިގެންގޮސްފައިވެއެވެ.