ސްކޫލްތަކުގައި މެރިން ސައިންސް ކިޔަވާ ދަރިވަރުންނަށް އަމާޒުކުރައްވައިގެން މިނިސްޓްރީ އޮފް ފިޝަރީޒް އެންޑް އެގްރިކަލްޗަރުން ބާއްވަވާ ފިޝް ކޭމްޕް ބ. އަތޮޅު ތުޅާދޫގައި ފަށްޓަވައިފިއެވެ. މިއީ، ފިޝަރީޒް މިނިސްޓްރީން ބާއްވަވާ 8 ވަނަ ފިޝްކޭމްޕެވެ.
ސްކޫލްތަކުގައި މެރިން ސައިންސް ކިޔަވާ ދަރިވަރުންނަށް އެކަމުގެ ޢަމަލީ ތަޖްރިބާ ހޯދުމަށް މަގުފަހި ކޮށްދެވުމަށާއި، އޯލެވެލަށް ތައްޔާރު ކުރުވުމުގެ ގޮތުން ފިޝަރީޒް މިނިސްޓްރީން އިސްނަންގަވައިގެން އެޑިއުކޭޝަން މިނިސްޓްރީއާއި ގުޅިވަޑައިގެން ބާއްވަވާ މި ފިޝް ކޭމްޕަކީ ވަރަށް ކާމިޔާބު ކޭމްޕެއް ކަމަށް އެ މިނިސްޓްރީން ވިދާޅުވެއެވެ. މި ކޭމްޕްގެ ތެރެއިން ދަރިވަރުންނަށް ސްކޫލްގައި ޢަމަލީ ތަޖުރިބާ ނުލިބޭ އެކި ފިލާވަޅުތަކުގެ ތަޖުރިބާ ހޯދައިދެވޭނެ ކަމަށް ފިޝަރީޒް މިނިސްޓްރީން ވިދާޅުވެއެވެ.
މިފަހަރުގެ ފިޝް ކޭމްޕް ބާއްވަވަނީ ބ އަތޮޅު ތުޅާދޫ ސްކޫލުގައެވެ. މިކޭމްޕްގައި 3 ސްކޫލަކުން 30 ދަރިވަރުން ބައިވެރިވެއެވެ. މިނިސްޓްރީގެ 8 ވަނަ ފިޝްކޭމްޕް ކުރިއަށް ގެންދެވުމަށް ހަމަޖެހިފައި ވަނީ މިމަހުގެ 28 ގެ ނިޔަލަށް ބ ތުޅާދޫ ސްކޫލް ގޯތިތެރޭގައެވެ.
އޯލެވެލް އިމްތިޙާނަށް މެރިން ސައިންސް ކިޔަވަމުން އަންނަ ކުދިންނަށް ޚާއްޞަ މި ކޭމްޕްގައި ބައިވެރި ކުރައްވާފައިވަނީ ތުޅާދޫ ސްކޫލާއި، ދޮންފަނު އަދި ކަމަދޫ ސްކޫލްގެ ދަރިވަރުންނެވެ. މި ދަރިވަރުންނަށް މަސްވެރިކަމާއި، މަހާގުޅުންހުރި މޫދުގެ އެކި ކަންކަން އަމިއްލައަށް ތަޖުރިބާ ކުރުމުގެ ފުރުޞަތު ލިބިދެވޭނެ ކަމަށް ފިޝަރީޒް މިނިސްޓްރީން ވިދާޅުވެއެވެ. އެގޮތުން މިކޭމްޕްގައި ދަރިވަރުން ހޯދާ ޢަމަލީ ތަޖުރިބާ އެ ދަރިވަރުންގެ އިމްތިޙާން ތަކަށާއި ޢާންމު ދިރިއުޅުމަށްވެސް ބޮޑު އެހީއަކަށް ވެގެންދާނެ ކަމަށް މިނިސްޓްރީން ވިދާޅުވެއެވެ. img:http://s2.psmnews.mv/images/660x400/14721500779682.jpg|8 ވަނަ ފިޝް ކޭމްޕް ބ.ތުޅާދޫގައި ފެށްޓެވުން - ފޮޓޯ: ޕީއެސްއެމް ނިއުސް
ޕީއެސްއެމް ނިއުސްއަށް މަޢުލޫމާތުދެއްވަމުން ފިޝަރީޒް މިނިސްޓްރީގެ ޑެޕިއުޓީ ޑިރެކްޓަރ ޖެނެރަލް އާދަމް މަނިކް ވިދާޅުވީ މި ކޭމްޕަކީ ސްކޫލްތަކުގައި މެރިން ސައިންސް ކިޔަވާ ދަރިވަރުންނަށް ޢަމަލީ ތަޖްރިބާއާއި މަޢުލޫމާތު ހޯއްދަވައިދެއްވުމަށް ބާއްވަވާ ކޭމްޕެއް ކަމަށެވެ.
"މެރިންސައިންސް ކިޔަވާ ދަރިވަރުންނަށް ބެނުންވާ ތަފާތު ގިނަ ފަންނީ ކަންތައްތަކުން މަޢުލޫމާތު ދިނުން.. އަދި އެކަމާ ގުޅޭގޮތުން އަމަލީ ތަޖްރިބާތަކެއްވެސް ހޯދައި ދިނުން.. އެހެންވީމާ މި ކެމްޕް ކުރިޔަށްދާނީ ވީހާވެސް ބޮޑަށް ޢަމަލީ ޙަރަކާތްތައް ހިމެނޭގޮތަށް. ދެން އޭގެތެރޭގައި އެބައޮތް ފަރާއި ކަނޑުގެ މާހައުލާއި ގުޅުނަހުރި ވަރަށް ގިނަ ކަންތައްތަކެއް ކުރުން.." ފިޝަރީޒް މިނިސްޓްރީގެ ޑެޕިއުޓީ ޑިރެކްޓަރ ޖެނެރަލް އާދަމް މަނިކް ވިދާޅުވިއެވެ.
މި ކޭމްޕްގައި ދަރިވަރުންނަށް މަޢުލޫމާތު ދެއްވަނީ އެމްއެންޑީއެފްގެ ކޯސްޓްގާޑުގެ އޮފިސަރުންނާއި ފިޝަރީޒް މިނިސްޓްރީގެ ކަމާބެހޭ ތަޖުރިބާކާރުންނާއި މަސްވެރިކަމުގެ ދާއިރާގައި ރާއްޖޭގައި ޙަރަކާތްތެރިވާ ތަފާތު އެކި ފަރާތްތަކާއި ފިޝަރީޒް މިނިސްޓްރީގެ ދަށުން ހިންގަވާ މެރިން ރިސާޗް ސެންޓަރުގެ ބޭފުޅުންނެވެ. މީގެ އިތުރުން ދަރިވަރުންގެ މެޑިކަލް ކަންތައްތަކުގައި މޯލްޑިވިއަން ރެޑްކްރެސެންޓްގެ މާލޭ ބްރާންޗްގެ ބޭފުޅުން ޙަރަކާތްތެރިވެވަޑައިގަނެއެވެ. މި ފަހަރުގެ ފިޝް ކޭމްޕް ސޮޕޮންސަރ ކޮށްފައިވަނީ ސޮނޭވާ ފުށިންނެވެ.