ޖުޑީޝަލް ސަރވިސް ކޮމިޝަން "ޖޭ.އެސް.ސީ" އިޞްލާޙު ކުރެއްވުމަށް ކޮމަންވެލްތުގައި އެދިވަޑައިގެންފައިނުވާނެ ކަމަށް އެކޮމިޝަނުން ވިދާޅުވެއްޖެއެވެ.
ރާއްޖޭގެ ޖުޑީޝަލް ސަރވިސް ކޮމިޝަން އިޞްލާޙު ކުރުމަށް ޚާއްޞަ މުޝީރަކު ޢައްޔަން ކުރެއްވުމަށް ކަމަށް ބުނެ މުޝީރަކު ހޯދުމަށް ކޮމަންވެލްތްގެ ވެބްސައިޓްގައި އިޢުލާންކޮށްފައިވާ ދަނޑިވަޅެއްގައި ޕީ.އެސް.އެމްއާ މަޢުލޫމާތު ޙިއްޞާކުރައްވަމުން ޖޭ.އެސް.ސީގެ މީޑިއާ އޮފިޝަލް ވިދާޅުވީ، އެކޮމިޝަން އިޞްލާޙު ކުރުމަށް ކޮމަންވެލްތުގައި އެދިވަޑައިގެންފައި ނުވާނެ ކަމަށެވެ.
އަދި ކޮމަންވެލްތުން ރާއްޖޭގެ ޖުޑީޝަލް ސަރވިސް ކޮމިޝަން އިޞްލާޙްކުރުމަށް މުޝީރަކު ޢައްޔަންކުރަން ހަމަޖެއްސުން ނުވަތަ މުޝީރެއް ހޯދަން އިޢުލާން ކުރުމަކީ ކޮމިޝަނަށް އެނގިވަޑައިގެން ކުރި ކަމެއް ނޫން ކަމަށާއި، އެފަދަ ކަމެއް ކޮމަންވެލްތުން ކުރަންޖެހޭ ސަބަބެއް އެނގިވަޑައިނުގަންނަވާ ކަމަށް ޖޭ.އެސް.ސީން ވިދާޅުވެއެވެ. ކޮމަންވެލްތުގެ ވެބްސައިޓްގައި އިއްޔެ ވަނީ، ރާއްޖޭގެ ޖުޑީޝަލް ސަރވިސް ކޮމިޝަނަށް ސީނިއަރ ލީގަލް އޮފިސަރެއް ހޯދުމަށް އިޢުލާން ކޮށްފައެވެ. މި އިޢުލާނުގައި ވާގޮތުން ޢައްޔަންކުރާ ލީގަލް އޮފިސަރުގެ މަސްއޫލިއްޔަތަކަށް ވާންވާނީ، ކޮމިޝަނުގެ މަސައްކަތްތައް ހިނގާނުހިނގާ ގޮތް ބަލައި އިޞްލާޙު ކުރަންޖެހޭ ކަންކަން ހުށައެޅުމެވެ.