އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނު ރައްޔިތުންގެ މަޖިލީހުން ފާސްކުރެއްވުމާއެކު މި ޤާނޫނު ރައީސުލްޖުމްހޫރިޔާ ތަސްދީޤް ކުރައްވާފައިވަނީ މިމަހުގެ 11 ވަނަ ދުވަހުއެވެ. އެދުވަހުން ފެށިގެން މިޤާނޫނަށް ވަނީ ޢަމަލުކުރަން ފައްޓަވާފައެވެ. އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނުގައި މައިގަނޑުގޮތެއްގައި ބަޔާންކުރައްވާފައި ވަނީ ޚިޔާލުފާޅުކުރުމުގެ މިނިވަންކަން ބޭނުންކުރެވޭނެ ހުދޫދު ތަކާއި، އަނެކާގެ އަބުރާ ކަރާމާތް ރައްކާތެރިކުރުމަށް މުޖުތަމައުގެ އެންމެހައި އަފުރާދުންނާއި، މީޑިއާތަކުން އަދާކުރަންޖެހޭ ޒިންމާތަކުގެ ވާހަކައެވެ. އެކަކު އަނެކަކަށް ނިސްބަތްކޮށް ހަޤީޤަތާ ޚިލާފު ސާބިތުނުހިފޭ ވާހަކަދެއްކުން މިޤާނޫނު މަނާކުރެއެވެ.
ޕަބްލިކް ސަރވިސް މީޑިއާއިން ގެނެސްދޭ "އަބުރު ރައްކާތެރިކުރުން – ދީނީ އަދި އިންސާނީ ޙައްޤެއް" ޕްރޮގްރާމްގައި ވާހަކަފުޅުދައްކަވަމުން މާފަންނު ދެކުނު ދާއިރާގެ މެމްބަރު އަބްދުﷲ ރިފާޢު ވިދާޅުވީ މިޤާނޫނު ވުޖޫދަށް އައިފަހުން މިވީ 10 ދުވަހުގެ ތެރޭގައި މުޖުތަމަޢުގެ ތެރޭގައި އެކަކު އަނެކަކަށް ނިސްބަތްކޮށް ޙަޤީޤަތެއް ނެތް ވާހަކަތައް ދެއްކުން މަދުވެފައިވާކަމަށާއި، މީޑިއާތައްވެސް އެތައްގޮތަކުން ޒިންމާދާރުވެފައިވާކަމަށެވެ. އަދި އަބުރު ރައްކާތެރިކުރުމާއި ޚިޔާލު ފާޅުކުރުމުގެ ޤާނޫނަށް ޢަމަލުކުރަން ފެއްޓެވުމަށްފަހު މިވީ ކުރު މުއްދަތުގެ ތެރޭގައި މި ޤާނޫނުގެ ސަބަބުން މުޖުތަމައަށް ހެޔޮބަދަލުތަކެއް އަންނަމުންދާކަމަށް ރައްޔިތުންގެ މަޖިލީހުގެ މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢު ވިދާޅުވިއެވެ. މިއީ ދިވެހިރާއްޖޭގެ ބަލިކަށިވެފައިވާ ޢިޖްތިމާޢީ ފޭރާން އިތުރަށް ވަރުގަދަ ކުރެއްވުމަށް ސަރުކާރުން ކުރައްވާ މަސައްކަތަށް ލިބިގެންދިޔަ ބޮޑު ކާމިޔާބީއެއްގެ ގޮތުގައި މެމްބަރު ސިފަކުރެއްވިއެވެ.
"މި ޤާނޫނު ތަސްދީޤު ވުމާ ގުޅިގެން އަޅުގަނޑަށް ހަމަ ފާހަގަކުރެވޭ ހަމަ ކަމަކާ ނުލާ މީހުން ދައްކަމުންދިޔަ ވާހަކަތައް ވަރަށް ބޮޑަށް ހުއްޓިއްޖެ. މިހާރު ވަރަށް ބޮލަށް ފަސޭހަ. އާންމު ރައްޔިތުންނަށްވެސް މިކަމުން ފަސޭހަވެގެންދާނެކަން ޔަޤީން" ރިފާޢު ވިދާޅުވިއެވެ.
img:http://s3.psmnews.mv/images/660x400/14719576711206.jpg|މާފަންނު ދެކުނު ދާއިރާގެ މެމްބަރު އަބްދުﷲ ރިފާޢު / ފޮޓޯ: މަޖިލިސް
އެކިގޮތްގޮތުން މީޑީއާތައް މެދުވެރިކޮށް ދޮގު މައުލޫމާތުތައް ފަތުރައިގެން މަޝްހޫރުކަން ހޯދަމުންދިޔަ ފަރާތްތަކުގެ ޙަރަކާތްތައް ވަރަށް ބޮޑަށް ހުއްޓިފައިވާކަމަށާއި މިއީ ލިބިގެންދިޔަ ބޮޑު ކާމިޔާބީއެއްކަމަށް ރިފާޢު ވިދާޅުވިއެވެ. އަދި މިއީ ޒިންމާދާރު ނޫސްވެރިކަމެއް ކުރުމަށް މީޑިއާތަކަށް ލިބިގެންދިޔަ ފުރުޞަތެއްކަމުގައި ވިދާޅުވިއެވެ.
"ޒިންމާދާރު ނޫސްވެރިކަމަކީ މީހުންގެ އަބުރަށް އަރައިގަނެގެން ނޫސްވެރިކަން ކުރެވޭ ބައެއްނޫން. ނޫސްވެރިކަން މިކުރަނީ ރައްޔިތުންނަށް ހަޤީޤީ މައުލޫމާތު ފޯރުކޮށްދިނުމަށްޓަކައި. އެހެންވެއްޖެކަމަށް ވަންޏާ މީހެއްގެ އަބުރައް އަރައިގަނެވޭ އިރުގައި އޭގެ ފަހަތުގައި އެކަމުން ސަލާމަތް ވެވޭނެ ވަރުގެ ޙުއްޖަތްތަކެއް ހުންނަންވާނެ. މިއަދުވެއް އެކަން ކުރެވޭނެ އެ ޙުއްޖަތްތައް ހުރިއްޔާ" ރިފާޢު ވިދާޅުވިއެވެ.
އަބުރު ރައްކާތެރިކުރުމުގެ ޤާނޫނު ތަސްދީޤު ކުރެއްވުމާ ގުޅިގެން ސިޔާސީ އެކި ބޭނުންތައް ޙާޞިލް ކުރުމަށް ހަޤީޤަތާ ޚިލާފު ވާހަކަތައް ރާއްޖޭގައި ނުދެއްކޭނެތީ، އިދިކޮޅު ސިޔާސީ ފަރާތްތަކުން ބޭރު ޤައުމުތަކާ ގުޅިގެން ރާއްޖެ ބަދުނާމުކޮށް ޙަޤީޤަތާ ޚިލާފު ވާހަކަތައް ފެތުރުމަށް މަސައްކަތްކުރަމުންދާކަމަށް ވިދާޅުވެ މާފަންނު ދެކުނު ދާއިރާގެ މެންބަރު ވަނީ އެކަން ކުށްވެރިކުރައްވާފައެވެ.
އަބުރު ރައްކާތެރިކޮށްދިނުމުގެ ޤާނޫނަކީ ރާއްޖެއަށް ދިމާވެފައިވާ އިޖްތިމާއީ އަދި އިޤްތިޞާދީ އެތައް މައްސަލައަކަށް ޙައްލަކަށް ވެގެންދާނެކަމަށް ޕީ.އެސް.އެމާ ވާޙަކަދެއްކެވި ބައެއް ވާޒީރުންނާއި، ރައްޔިތުންގެ މަޖިލީހުގެ މެންބަރުންނާއި، ކަމާބެހޭ ތަޖުރިބާކާރުން ވަނީ ވިދާޅުވެފައެވެ.