ފުލުހުންގެ ބަންދުގައި ހުރި މީހަކު މަރުވި މައްސަލަ ތަހުޤީޤުކުރަން ފަށައިފި

ފުލުހުން ކަސްޓޯޑިއަލް ޖަލު، އަތޮޅުވެހީގައި ބަންދުގައި ހުރި މީހަކު މަރުވި މައްސަލަ ދިވެހި ފުލުހުންގެ ޚިދުމަތުން ތަހުޤީޤުކުރަން ފަށައިފިއެވެ.

ދިވެހި ފުލުހުންގެ ޚިދުމަތުން ވިދާޅުވީ އަތޮޅުވެހީގެ 7 ނަމްބަރު ގޮޅީގައި މަރުވެފައި އޮތްވާ ފެނިފައިވަނީ ގ. ޒަމީއާ / މާލެ، އުމުރުން 48 އަހަރުގެ އަހުމަދު އަފްރާހް ކަމަށާއި އޭނާ މަރުވެފައި އޮތްވާ ފެނިފައިވަނީ މިއަދު ފަތިހު 5:50 ހާއިރުކަމަށެވެ.

ފުލުހުން ވިދާޅުވީ އޭނާގެ ހާލަތު ބެލިއިރު ހަރަކާތެއް ނެތުމުން، ވަގުތުން އިންދިރާ ގާންދީ މެމޯރިއަލް ހޮސްޕިޓަލަށް ގެންދިޔަ ކަމަށެވެ. ނަމަވެސް ހޮސްޕިޓަލަށް ގެންދިޔައިރުވެސް އޭނާ މަރުވެފައިވާކަމަށް ހޮސްޕިޓަލާއި ހަވާލާދީ ފުލުހުން ވިދާޅުވިއެވެ.

އޭނާ ފުލުހުންގެ ބެލުމުގެ ދަށަށް ގެންގޮސްފައިވަނީ މިމަހުގެ 15 ވަނަ ދުވަހު ކަމަށް ފުލުހުން ވިދާޅުވިއެވެ.

ފުލުހުން ވިދާޅުވީ އޭނާ މަރުވުމާއި ގުޅިގެން އެ މައްސަލަ ފުލުހުންގެ މޭޖަރ ކްރައިމް އިންވެސްޓިގޭޝަން ޑިޕާޓްމެންޓުން ތަހުޤީޤު ކުރަމުންދާކަމަށެވެ، ނަމަވެސް މައްސަލައިގެ އިތުރު ތަފްސީލެއް ހާމަކޮށްފައެއް ނުވެއެވެ.

ފުލުހުންގެ ބަންދުގައި ހުއްޓައި މީހަކު މަރުވުމާއި ގުޅިގެން އެކަމުގެ މައުލޫމާތު ހިއުމަން ރައިޓްސް ކޮމިޝަން އޮފް ދަ މޯލްޑިވްސް އަދި ނޭޝަނަލް އިންޓްގްރީ ކޮމިޝަނަށް އަންގާފައިވާކަމަށް ފުލުހުން ވިދާޅުވިއެވެ. މީގެ އިތުރުން މި ހާދިސާގައި ފުލުހުންގެ އެއްވެސް އިހުމާލެއް އޮތްތޯ ބަލައި ހާދިސާގައި ކަން ހިންގާފައިވާ އޮތްގޮތް ބެލުމަށް އެތެރޭގެ ތަހުޤީޤެއް ޕްރޮފެޝަނަލް ސްޓޭންޑާޑްސް ކޮމާންޑުން ހިންގަމުންދާ ކަމަށްވެސް ފުލުހުން ވިދާޅުވެއެވެ.