ބޯފެން ރައްކާކުރުމަށް އެހީތެރިވެދިނުމުގެ ގޮތުން ދިގުމުއްދަތުގައި އަގު އަދާކުރެވޭ ފަދަ ސްކީމެއް ށ.ފޯކައިދޫ ކައުންސިލުން ތަޢާރަފް ކުރައްވަން ނިންމަވައިފިއެވެ. އެކައުންސިލުން އިސްނަންގަވައިގެން އެރަށުގައި މިނޫންވެސް މިފަދަ ތަފާތު ޕްރޮގްރާމްތަކެއް ހިންގެވުމަށް ރާއްވަވާފައިވެއެވެ.
ށ. ފޯކައިދޫ ކައުންސިލުން އެރަށުގެ ރައްޔިތުންގެ ލާބަޔާ މަންފާއަށް ރާއްވަވާފައިވާ ޕްރޮގްރާމުގެ ތެރެއިން ބޯފެން ރައްކާކުރުމަށް އެހީތެރިވެދިނުމުގެ ގޮތުން ކުރިއަށްގެންދާ ސްކީމަކީ ފާހަގަކޮށްލެވޭ ސްކީމެކެވެ. އަދި މިއީ އެކަމުގެ ފައިދާ ދިގުމުއްދަތަކަށް ރައްޔިތުންނަށް ކުރުވަނިވި މަސައްކަތެކެވެ.
ދިގުމުއްދަތުގައި އަގު އަދާކުރެވޭގޮތަށް ބޯފެން ރައްކާކުރުމަށް ތަޢާރަފް ކުރާ ސްކީމަކީ ފަޞޭހަކަމާއެކު ބޯފެން ރައްކާކުރެވޭނެ ނިޒާމެއް ކަމަށާއި ޚާއްޞަކޮށް މިއީ އެރަށުގައި އަލަށް އަބާދުވާ ފަރާތްތަކަށް ބޯފެން ރައްކާކުރެވޭނެ ނިޒާމެއް ޤާއިމުކުރުމަށް އެހީތެރިވުމުގެ ގޮތުން ހިންގަވާ ސްކީމެއްކަމަށް އެރަށު ކައުންސިލުން މަޢުލޫމާތުދެއްވައެވެ.
މިސްކީމްގެ ދަށުން ސަތާރަ ސަތޭކައެއްހާ މީހުން ދިރިއުޅޭ ފޯކައިދޫގައި ރަށްވެހި ވެފައިވާތާ 21 އަހަރުވެފައިވާ މީހުންނަށް 2500 ލީޓަރުގެ ކަޅުހަން ދޫކުރެވޭނެކަމަށް އެރަށު ކައުންސިލުން ވިދާޅުވެއެވެ. މިއަހަރުގެ މިހާތަނަށް 30 ކަޅު ހަން ދޫކޮށްފައިވާކަމަށް ކައުންސިލުން މަޢުލޫމާތުދެއްވައެވެ.