ރާއްޖޭގައި އެކި މުނާސަބަތުތަކުގައި ބާއްވަވާ ޕެރޭޑްތަކަކީ، ދިވެހިންގެ ގިނަ ބަޔަކު ވަރަށް ޝައުޤުވެރިވާ ޙަރަކާތެކެވެ.
ކޮންމެ މުނާސަބަތެއްގައި ޕެރޭޑް ބޭއްވިނަމަވެސް ގިނަ ޢަދަދެއްގެ ބަޔަކު މަގުތަކަށް ނިކުމެ ޕެރޭޑް ބަލަމުން ގެންދެއެވެ. އެގޮތުން މިއަހަރުގެ މިނިވަން ދުވަހުގެ މުނާސަބަތުގައި ބޭއްވެވި ރޫޓްމާޗް ބެލުމަށްވެސް ގިނަ ޢަދެއްގެ މީހުން މަގުމައްޗަށް ނިކުމެފައިވެއެވެ. ޚާއްޞަކޮށް ކުޑަކުދިން ގިނަޢަދަދަކަށް ރޫޓްމާޗް ބަލަން ނިކުތްކަން ފާހަގަކުރެވެއެވެ.
މިއަދު މާލޭގައި ބޭއްވީ މޯލްޑިވްސް ނޭޝަނަލް ކެޑޭޓްކޯއިން ބޭއްވި ރޫޓްމާޗެކެވެ. ނޭޝަނަލް ކެޑޭޓްކޯއިން ވިދާޅުވި ގޮތުގައި މިނިވަން ދުވަހުގެ ޕެރޭޑްގައި މާލެ ސަރަޙައްދުގެ 13 ސްކޫލަކުން، ސަތޭކަށްވުރެ ގިނަ ބޭންޑްސްމަނުންނާއި ،ކެޑޭޓުން ބައިވެރިވެފައިވެއެވެ.
img:http://s1.psmnews.mv/images/660x400/14697219443258.jpg|މިނިވަންދުވަހުގެ މުނާސަބަތުގައި ބޭއްވި ޕެރޭޑްގެ ތެރެއިން- ފޮޓޯ: ޕީއެސްއެމް
ޕެރޭޑަށް ކުދިން ތައްޔާރުކޮށްފައިވަނީ ނޭޝަނަލް ކެޑޭޓްކޯގެ މުދައްރިބުން ކަމަށާއި، މި ޕެރޭޑަށް ފަރިތަކުރުމަށް އެއްމަސްދުވަސް ހޭދަވިކަމަށް ކެޑޭޓްކޯއިން ވިދާޅުވެއެވެ.
51 ވަނަ މިނިވަން ދުވަހުގެ ޙަރަކާތްތަކުގެ ތެރޭގައި ހިމަނުއްވައިގެން ބޭއްވެވި ޕެރޭޑް ކުރިޔަށް ގެންގޮސްފައި ވަނީ ދެބަޔަކަށް ބައްސަވާލައްވައިގެންނެވެ. އެއީ ގްރޭޑް 2 އިން ފެށިގެން ގްރޭޑް 7 ގެ ދަރިވަރުން ހިމެނޭ ޖޫނިއަރ ޑިވިޝަންގެ ޕެރޭޑާއި، ގްރޭޑް 8 އިން 12ގެ ދަރިވަރުން ހިމެނޭ ގޮތައް އެކުލަވާފައިވާ ސީނިއަރ ޑިވިޝަންގެ ޕެރޭޑެވެ.
މިއަދު ބޭއްވި މި ޕެރޭޑް ފައްޓަވާފައިވަނީ ހިރިޔާ ސްކޫލް ކައިރިންނެވެ. އަދި 4 ތަނަކަށް މަޑުކޮށް ޕެރޭޑްގައި ހިމެނޭ ބޭންޑުން މިއުޒިކް ކުޅެފައިވެއެވެ. ބޭންޑުތަކުން ކުޅެފައިވަނި ޤައުމީވަންތަ ދިވެހި ލަވަކަން ފާހަގަކޮށްލެވެއެވެ.