ރާއްޖޭގެ މާލީ އަދި އިގްތިޞާދީ ޤާނޫނުތަކަށް މިހާރު ގެންނަމުންދާ ބަދަލުތަކަކީ، އިޤްތިޞާދީ ފުރިހަމަ މިނިވަންކަމެއް ހޯދުމަށް ކުރައްވާ މަސައްކަތްތަކެއްކަމަށް އިޤްތިޞާދީ ކޮމެޓީގެ މުޤައްރިރު ޑރ. ޢަބްދުﷲ ޚަލީލް ވިދާޅުވެއްޖެއެވެ. ޚަލީލް މިހެން ވިދާޅުވީ އިގްތިޞާދީ ކޮމެޓީގެ ބައެއް މަސައްކަތްތަކާއި ގުޅޭގޮތުން ޕީއެސްއެމްގެ މަޖިލިސް ޗެނަލަށް ދެއްވީ ޚާއްސަ އިންޓަވިއުއެއްގައެވެ.
ދިވެހި ރާއްޖެއަށް ބަލާއިރު ރާއްޖެއަކީ އެހެން ޤައުމުތަކަށް ވަރަށް ބޮޑަށް ބަރޯސާވެފައިވާ އިޤްތިޞާދެއް އޮތް ގައުމެއް ކަމަށާއި، ޚާއްސަކޮށް އަވައްޓެރި ބައެއް ޤައުމުތަކަށް ރާއްޖޭގެ އިޤްތިސާދު ބަރޯސާވެފައިވާ ކަމަށް އިޤްތިޞާދީ ކޮމެޓީގެ މުޤައްރިރު ޑރ އަބްދުﷲ ޚަލީލް ވިދާޅުވިއެވެ. ރާއްޖޭގެ އިޤްތިޞާދަށް ބަލާއިރު ކޮންމެ ދުވަހަކު އާންމު ދިރިއުޅުމުގައި ބޭނުންކުރާ އެކިއެކި ބާވަތްތައް އެތެރެކުރަމުންދާ ރާއްޖެއިން ބޭރުންނެވެ. ރާއްޖޭގެ ގާނޫނު ހަދާ މަޖިލީހުގެ ތެރެއިން މިހާރު ކުރައްވަމުންގެންދަވާ މަސައްކަތްތަކަކީ ރާއްޖޭގައި އުފެއްދުންތެރި ކަންތައްތަކެއް ކުރެވޭނެ މާހައުލެއް ޤާއިމްކުރައްވަން ކުރައްވާ މަސައްކަތްތައް ކަމުގައި ޚަލީލް ވިދާޅުވިއެވެ. މީގެ ތެރޭގައި ރާއްޖެއަށް ލިބޭ އާމްދަނީ ޤައުމުގެ ތެރެއިން ލިބޭނެ ގޮތްތަކެއް ހެދިގެން ދިއުން އެއީ އަމާޒެއްކަމަށްވެސް ޚަލީލް ވިދާޅުވިއެވެ. މިކަންކަމަށް މަގުފަހިކުރުމަށް ބައެއް ގާނޫނުތަކަށް މިހާރު އަމަލުކުރަމުންދާކަން އިގްތިޞާދީ ކޮމެޓީގެ މުގައްރިރު ފާހަގަކުރެއްވިއެވެ. މި ޤާނޫންތަކުގެ ތެރެއިން ބޭރުގެ އިންވެސްޓަރުންގެ ޝައުގުވެރިކަން ހޯދާ އެފަރާތްތަކުގެ އިތުބާރު ހޯދުމަށް މަސައްކަތްތަކެއް ކުރެވި ކާމިޔާބީތަކެއް ހޯދަމުންދާކަންވެސް ޚަލީލް ފާހަގަކުރެއްވިއެވެ. ބޭރުގެ އިންވެސްޓަރުން ރާއްޖެއަށް ޝައުވެރިކުރުވައިގެން ރާއްޖޭގައި އުފެއްދުންތެރި މާހައުލެއް ބިނާކުރުމުގެ އަމާޒުގައި މަސައްކަތްތައް ކުރިއަށްދާކަމަށް ޚަލީލް ވިދާޅުވިއެވެ.
ދުނިޔޭގެ ބޮޑެތި ޤައުމުތަކާއި ތަރައްޤީވެފައިވާ ޤައުމުތަކުގެ މިނިވަންކަން ދެމިއޮތުމުގެ އަސްލަކީ އެޤައުމުތަކުގެ އިގްތިޞާދުތައް ވަރުގަދަވުން ކަމަށާއި، އިގްތިޞާދީ މިނިވަންކަމަކީ، މިނިވަންކަމަށް ވިސްނާއިރު މުހިއްމު ކަމެއް ކަމުގައި އިގްތިޞާދީ ކޮމެޓީގެ މުޤައްރިރު އަބްދުﷲ ޚަލީލް ވިދާޅުވިއެވެ. މިހާރު ގާނުންތަކަށް ގެންނަމުންދާ ބަދަލުތަކާއިއެކު ރާއްޖެއިން އެކްސްޕޯޓްކުރާ ބާވަތްތައް އިތުރުވެ އެކްސްޕޯޓްކުރާ މިންވަރު އިތުރުވެގެންދާނެ ކަމަށްވެސް ޚަލީލް ވިދާޅުވިއެވެ. މިކަމުގެ ސަބަބުން ރާއްޖޭގެ ޖީޑީޕީ ބާރަށް މައްޗަށް ދިއުމުގެ ފުރުސަތު ފަހިވެގެންދާނެ ކަމަށް އިގްތިޞާދީ ކޮމެޓީގެ މުޤައްރިރުގެ ވާހަކައިގައި ފާހަގަކުރެއްވިއެވެ. ނަތީޖާއެއްގެ ގޮތުން ޑޮލަރު ލިބުމުގައި ހުރި ދަތިތައް ނެތި ރާއްޖޭގެ ރިޒާވް ވަރުގަދަވެ އާމްދަނީ އިތުރުވެގެންދާނެއެވެ.