ރާއްޖޭގެ މާލީ ސެކިއުރިޓީޒްއާބެހޭ ޤާނޫނަށް އިޞްލާޙް ގެންނެވުމުގެ ބިލް ދިރާސާކުރައްވައި، ކޮމެޓީގެ މަސައްކަތް ނިންމަވައިފިއެވެ.
އިޤްތިޞާދީ ކޮމެޓީން މި ބިލް ނިންމަވާފައިވަނީ، ސަރުކާރުގެ އެކި މުއައްސަސާތަކުން ހުށަހެޅުއްވި ޚިޔާލުތަކަށް ރިޢާޔަތްކުރައްވައިގެންނެވެ. މި ޤާނޫނަށް ހުށަހެޅި އިޞްލާޙްތަކުގެ ތެރެއިން ބިލްގެ އަށްވަނަ މާއްދާއިން ފެށިގެން ސަތާރަވަނަ މާއްދާއާ ހަމައަށް އެއްވެސް މުއައްސަސާއަކުން އެއްވެސް ހުށަހެޅުމެއް ހުށަހަޅާފައިނުވާތީ މި މާއްދާތަށް ނިންމަވާފައިވަނީ އެއްވެސް ބަދަލެއް ނުގެންނަވައި،ބިލްގައި އޮތްގޮތަށެވެ.
މި ބިލް އިޤްތިޞާދީ ކޮމެޓީން މިއަދު ނިންމެވީ މާއްދާއަކުން މާއްދާއަކުން ބިލްގައިވާ ކަންކަމަށް މަޝްވަރާކުރެއްވުމަށްފަހުގައެވެ. މިބިލާމެދު ގޮތެއް ނިންމެވުމަށްޓަކައި ދެން ގެންދަވާނީ މަޖިލިސްގެ ތަޅުމަށެވެ.
ރައްޔިތުންގެ މަޖިލީހުގެ ޖަލްސާއެއް މާދަމާ ބާއްވަވާގޮތަށް ކުރިން އޮތްނަމަވެސް މާދަމާ ޖަލްސާ ނުބާއްވަވާނެކަން މަޖިލީހުގެ އިދާރާއިން މިހާރު ވަނީ އަންގަވާފައެވެ. ނަމަވެސް ދެން ޖަލްސާއެއް އޮންނާނެ ދުވަހެއް އަދި މަޖިލީހުގެ އިދާރާއިން އިޢުލާނެއް ނުކުރައްވައެވެ.