ސިއްޙީ ހުރިހާ ސިޔާސަތެއް ބައްޓަންކުރާނީ ބަލިމީހުންގެ ރައްކާތެރިކަމަށް: ޞިއްޙީ ވަޒީރު

ޞިއްހީ ދާއިރާގެ ހުރިހާ ސިޔާސަތެއްވެސް ބައްޓަންކުރައްވާނީ ބަލި މީހުންގެ ރައްކާތެރިކަން ކަށަވަރުވާނެގޮތަށްކަމަށް ޞިއްޙީ ވަޒީރު ޢަބްދުﷲ ނާޒިމް އިބްރާހީމް ވިދާޅުވެއްޖެއެވެ. ވަޒީރު މިހެން ވިދާޅުވީ 7 ވަނަ ގްލޯބަލް މިނިސްޓީރިއަލް ސަމިޓް އޮން ޕޭޝަންޓް ސޭފްޓީގެ ތެރެއިން ވާހަކަފުޅުދައްކަވަމުންނެވެ.

ފިލިޕީންގެ މެނީލާގައި ކުރިއަށްދިޔަ ޕޭޝަންޓް ސޭފްޓީ ސަމިޓު ނުވަތަ ބަލިމީހުންގެ ރައްކާތެރިކަމާގުޅޭ ސަމިޓުގައި ވާހަކަފުޅު ދައްކަވަމުން ޞިއްޙީ ވަޒީރު ޢަބްދުﷲ ނާޒިމް ވިދާޅުވީ ރާއްޖޭގައި މިހާރު ފަށާފައިވާ ޕްރައިމަރީ ހެލްތު ކެއަރ ނިޒާމުގެ ތެރެއިން ބަލި މީހުންގެ ރައްކާތެރިކަން ކަށަވަރުކުރުމަށް ޚާއްސަ ސަމާލުކަމެއްދެވޭނެ ކަމަށެވެ. އަދި ޞިއްޙީ އެކި ސިޔާސަތުތައް އެކުލަވާލާއިރު، ބަލި މީހުންގެ ރައްކާތެރިކަމަށް ސަމާލުކަންދިނުމުގެ މުހިންމުކަން ވަޒީރު ފާހަގަކުރެއްވިއެވެ. އެގޮތުން ރާއްޖޭގައި އެކުލަވާލާ ޞިއްހީ ހުރިހާ ސިޔާސަތެއްވެސް ބައްޓަންކުރައްވާނީ ބަލި މީހުންގެ ރައްކާތެރިކަން ކަށަވަރުވާނެގޮތަށްކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ އާޓިފިޝަލް އިންޓަލެޖެންސާއި ޒަމާނީ ޓެކްނޮލޮޖީ ބޭނުންކޮށްގެން ބަލި މީހުންގެ ރައްކާތެރިކަން ކަށަވަރުކުރުމުގައި ކުރިއެރުންތަކެއް ހޯދިދާނެ ކަމަށެވެ. ވަޒީރުގެ ވާހަކަފުޅުގައި ވަނީ ރާއްޖޭގެ ޞިއްޙީ ނިޒާމަށްވެސް އަލިއަޅުއްވާލައްވާފައެވެ.

"ދިވެހިރާއްޖެއިން މަސައްކަތްކުރަނީ ދެމެހެއްޓެނިވި ގޮތެއްގައި އިންވެސްޓްކޮށް، ބައިނަލްއަޤުވާމީ އެހީތަކާއެކު ޞިއްހީ ނިޒާމު ކުރިއެރުވުމަށް. އަދި ރާއްޖެއަކީ މޫސުމީ ބަދަލުތަކަށް ވިލުންތެރި ޤައުމަކަށްވާއިރު، މޫސުމީ ބަދަލުތަކަށް ވިލުންތެރި ޞިއްހީ ނިޒާމެއް ހޯދުމަށް ދިރާސާތައް ކުރަންޖެހޭ." ޞިއްޙީ ވަޒީރު ވިދާޅުވިއެވެ.

މިމަހުގެ 3 އަދި 4 ވަނަ ދުވަހުގެ ނިޔަލަށް ފިލިޕީންސްގައި މިހާރު ކުރިއަށްދާ ބަލި މީހުންގެ ރައްކާތެރިކަމާ ބެހޭ ސަމިޓުގައި ބައިވެރިވެވަޑައިގަތުމަށް ޞިއްޙީ ވަޒީރު ހިމެނޭހެން ރާއްޖޭގެ ވަފުދެއް ފިލިޕީންސަށް ވަނީ ވަޑައިގެންފައެވެ. މި ސަމިޓުގައި ދުނިޔޭގެ އެކި ކަންކޮޅުތަކުގެ ޞިއްޙަތާ ބެހޭ ވަޒީރުން ބައިވެރިވެވަޑައިގަންނަވައެވެ.

ސަމިޓުގެ ތެރެއިން ޞިއްޙީ އެކި މަޢުޟޫތަކާ ގުޅޭ މަޢުލޫމާތުތައް ހުށައެޅުމާއި ޕެނަލް ޑިސްކަޝަންތައް ކުރިއަށްދެއެވެ.