"ދިވެހިރާއްޖޭގެ އެންމެ އަލިގަދަ ތަރި" ޕްރޮގްރާމްގެ އެންމެ މޮޅު ފަސް ބައިވެރިންނާއި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް މިރޭ ބައްދަލުކުރައްވައިފިއެވެ.
މި ބައްދަލުކުރެއްވުން އޮތީ، ރިޔާސީ ގަނޑުވަރު މުލީއާގޭގައެވެ. މި ބައްދަލުކުރެއްވުމުގައި ދިވެހިރާއްޖޭގެ އެންމެ އަލިގަދަ ތަރި ޕްރޮގްރާމްގައި މި އަހަރު ވާދަކުރާ އެންމެ މޮޅު ފަސް ބައިވެރިންނާއި، ފަނޑިޔާރުންނާއި، ޕްރޮގްރާމްގެ ޕްރޮޑަކްޝަން ޓީމްގެ އިސް ބޭފުޅުންނާއި، ޕަބްލިކް ސަރވިސް މީޑިއާގެ އެންމެ އިސްވެރިން ބައިވެރިވެ ވަޑައިގެންނެވިއެވެ.
img:http://s2.psmnews.mv/images/660x400/14672275338535.jpg|އެންމެ އަލިގަދަ ތަރީގެ ގަދަ 5 ބައިވެރިންނާއި، އަދި ޕީއެސްއެމްގެ އިސް ފަރާތްތަކާއި ރައީސުލްޖުމްހޫރިއްޔާ ބައްދަލުކުރައްވަނީ- ފޮޓޯ: ޕީއެސްއެމް
މުލީއާގޭގައި ބޭއްވެވި މި ބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މިއީ އެމަނިކުފާނު ވަރަށް ބޮޑަށް އެދިވަޑައިގެން، ވަރަށް ބޮޑަށް ބޭނުންފުޅުވެގެން ބޭއްވެވި ބައްދަލުކުރެއްވުމެއްކަމަށް ވިދާޅުވިއެވެ. އަދި، މި ޕްރޮގްރާމް ޤަވާއިދުން ބައްލަވާކަމަށާއި، މިއީ ފެންވަރު ރަނގަޅު ޕްރޮގްރާމެއްގެ ގޮތުގައި ކުރިއަށް ގެންދިއުމަށް އެމަނިކުފާނުގެ ޚާއްޞަ ޝައުޤެއް އޮންނަކަން ރައީސް ފާހަގަކުރެއްވިއެވެ. އަދި، ކުރިއަށް އޮތް އަހަރު މިހާރަށްވުރެ ފެންވަރު ރަނގަޅު ޕްރޮގްރާމެއްގެ ގޮތުގައި މި ޕްރޮގްރާމް ކުރިއަށްގެންދިއުމަށް އެދިވަޑައިގަންނަވާކަމަށްވެސް އެމަނިކުފާނު ވިދާޅުވިއެވެ. އަދި، ދިވެހިރާއްޖޭގައި ކީރިތި ޤުރުއާނާއި އިސްލާމް ދީނާއިބެހޭ މަޢުލޫމާތާއި، ދައުލަތަށް އެންމެ މުހިއްމުވާ ކަންތައްތަކުގެ ޚަބަރާއި މަޢުލޫމާތު ރައްޔިތުންނަށް ގެނެސްދިނުމުގައި، ޕީއެސްއެމްގެ ވަޞީލަތް ހުރި މިންވަރަކުން އެންމެ ފުރިހަމައަށް މަސައްކަތް ކުރަމުންގެންދާކަން ފާހަގަކުރައްވާ، ޕީއެސްއެމްގެ މެނޭޖްމަންޓަށާއި މުވައްޒަފުންނަށް ޝުކުރު އަދާކުރެއްވިއެވެ. އަދި، ޕީއެސްއެމުން ފޯރުކޮށްދޭ ޚިދުމަތްތައް އިތުރަށް ތަރައްޤީކުރުމަށާއި، ޕީއެސްއެމްގެ ޤާނޫނީ ވާޖިބުތައް ފުރިހަމަކުރުމުގައި ސަރުކާރުން ވެދެއްވެން އޮތް ހުރިހާ އެހީތެރިކަމާއި އެއްބާރުލުމެއް ދެއްވާނެކަމުގެ ޔަޤީންކަން އެމަނިކުފާނު ދެއްވިއެވެ.
img:http://s4.psmnews.mv/images/660x400/14671840762163.jpg|ދިވެހިރާއްޖޭގެ އެންމެ އަލިގަދަ ތަރީގެ ގަދަ 5 ބައިވެރިން / ފޮޓޯ: ޕީއެސްއެމް
މި ބައްދަލުކޮށްލެއްވުމުގައި ޕީއެސްއެމްގެ މެނޭޖިންގ ޑިރެކްޓަރު އިބްރާހީމް ޚަލީލް ދެއްކެވި ވާހަކަފުޅުގައި ވަރަށް ކުރީއްސުރެ ރައީސުލްޖުމްހޫރިއްޔާ މި ފުރުޞަތަށް އެދިވަޑައިގެންފައިވާކަމަށާއި، އެންމެ އަލިގަދަ ތަރީގެ 5 ބައިވެރިންނާއި ރައީސުލްޖުމްހޫރިއްޔާ ބައްދަލުކުރެއްވުން ރަމްޒުކޮށްދެނީ މިފަދަ މުބާރާތްތަކަށް އެމަނިކުފާނު ދެއްވާ އަހައްމިޔަތާއި އަދި ވަކިން ޚާއްޞަކޮށް ކީރިތި ޤުރުއާނުގެ ޢިލްމާއި ދީނީ މަޢުލޫމާތު ރައްޔިތުންގެ މެދުގައި ފެތުރުމަށް ރައީސުލްޖުމްހޫރިއްޔާ ދެއްވާ ސަމާލުކަންކަން ފާހަގަކުރައްވާ، ޕީއެސްއެމްގެ ހުރިހާ މުވައްޒަފުންނާއި ވެރިންގެ ނަމުގައި ރައީސުލްޖުމްހޫރިއްޔާއަށް ޝުކުރު އަދާކުރެއްވިއެވެ. އަދި، ޕީއެސްއެމްގެ ކަންތައްތައް ކުރިއެރުވުމަށާއި، ފެންވަރު ރަނގަޅު ކުރުމަށް ރައީސުލްޖުމްހޫރިއްޔާ ދެއްވާ ޚާއްޞަ ސަމާލުކަމަށާއި، ބަހައްޓަވާ ގާތްކަމަށްޓަކައިވެސް ހުރިހާ މާނައެއްގައި ޕީއެސްއެމްގެ ވެރިންނާއި، ކުންފުނީގެ ހުރިހާ މުވައްޒަފުންގެ ފަރާތުން ރައީސުލްޖުމްހޫރިއްޔާއަށް އިޚްލާޞްތެރިކަމާއިއެކު ޝުކުރު އަދާކުރެއްވިއެވެ.