ދިރާގު ހައިސްޕީޑް ފައިބަރ ބްރޯޑްބޭންޑްގެ ޚިދުމަތް ރާއްޖޭގެ ހުރިހާ ރަށަކަށް

ދިރާގު ހައި ސްޕީޑް ފައިބަރ ބްރޯޑްބޭންޑްގެ ޚިދުމަތް ރާއްޖޭގެ މީހުން ދިރިއުޅޭ ހުރިހާ ރަށަކަށް މިހާރު ލިބޭނެ ކަމަށް އެކުންފުނިން ވިދާޅުވެއްޖެއެވެ.

ދިރާގު ހައި ސްޕީޑް ފައިބަރ ބްރޯޑްބޭންޑްގެ ޚިދުމަތް ރާއްޖޭގެ މީހުން ދިރިއުޅޭ ހުރިހާ ރަށަކަށް ފޯރުކޮށްދީފިވާކަން އިޢުލާން ކޮށްފައިވަނީ އެކުންފުނިން ބޭއްވި ޚާއްސަ ނޫސްވެރިންގެ ބައްދަލުވުމެއްގައެވެ.

ދިރާގުން ވިދާޅުުވީ މިއީ ދިވެހި ރާއްޖޭގެ މުވާސަލާތީ ސިނާއަތަށް ލިބިގެންދާ އަދި ދުނިޔޭގެ ފެންވަރުގައި ވެސް ފާހަގަކޮށްލެވޭވަރުގެ ބޮޑު ކުރިއެރުމެއްކަމަށެވެ. ތަފާސްހިސާބުތަކުން ދައްކާގޮތުގައި ދުނިޔޭގެ ކުރިއަރާފައިވާ ގައުމުތަކުގައި ވެސް ފައިބަރ ޚިދުމަތް 100 އިންސައްތަ އާބާދީއަށް ފޮރުކޮށްދީފައިވަނީ މަދު ގައުމެއްގައެވެ. ބްރޯޑްބޭންޑް ޚިދުމަތަކީ ޤައުމެއްގެ އިޖްތިމާޢީ އަދި އިޤްތިޞާދީ ތަރައްޤީ ވަރަށް ބޮޑަށް ހަލުވިކުރުމުގެ ފުރުޞަތު އޮތް ޚިދުމަތެކެވެ. މިކަން ހާމަވަނީ ގިނަ ޤައުމުތަކުގެ ތަރައްޤީގެ ޕްލޭންތަކުގައި މައިގަނޑު އެއްޗެއްގެ ގޮތުގައި ފައިބަރ ބްރޯޑްބޭންޑް ފުޅާކުރުން ހިމެނުމުންނެވެ.

ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ދިރާގުގެ ސީއީއޯ އަދި އެމްޑީ އިސްމާއިލް ރަޝީދު ވިދާޅުވީ، ދިރާގު ފައިބަރ ބްރޯޑްބޭންޑް ޚިދުމަތަކީ ރާއްޖޭގައި ފޯރުކޮށްދެމުންދާ އެންމެ ބޮޑު ފައިބަރ ނެޓްވޯކްކަމަށާއި މިހާރު މި ޙިދުމަތް ރާއްޖޭގައި މީހުން ދިރިއުޅޭ ހުރިހާ ރަށަކަށް ލިބިގެންދާނެކަމަށެވެ. އަދި މިއީ މުއާސަލާތީ ދާއިރާގެ ކުރިމަގަށް އެޅޭ މުހިންމު ފިޔަވަޅެއް ކަމަށްވެސް އޭނާ ފާހަގަކުރެއްވިއެވެ.

"ރާއްޖޭގެ 100 ޕަސެންޓް ގޭބީސީތައް މިއަދު ދިރާގު ހައިސްޕީޑް ބްރޯޑްބޭންޑުން ގުޅާލުމުގެ ފުރުސަތު ފަހިވެފައިވާކަން ފަހުރުވެރިކަމާއެކު ފާހަގަކުރަން. ރާއްޖޭގެ މުއާސަލާތީ ތާރިހުގައި ކުލަގަދަކޮށް ފާހަގަކޮށްލެވޭނެ މުހިންމު ލަނޑުދަނޑި ތިޔަ ބޭފުޅުންނާ ހިއްސާކޮށްލެވުމަކީ އަޅުގަނޑަށް އަދި ދިރާގުގެ މުޅި ޓީމަށް ލިބޭ ބޮޑު ފަހުރެއް." ދިރާގުގެ ސީއީއޯ އަދި އެމްޑީ އިސްމާއިލް ރަޝީދު ވިދާޅުވިއެވެ.

ރާއްޖޭގައި މިފަދަ ޙިދުމަތެއް ފޯރުކޮށްދެވިގެން ދިއުމަކީ ދިރާގަށް ލިބިގެންދާ ޝަރަފެއްކަމަށާއި މި ޙިދުމަތުގެ ސަބަބުން ދިރާގުގެ ތަސައްވުރުކަމުގައިވާ "ޑިޖިޓަލް ރާއްޖެ" ހަގީގަތަކަށް ހެދުމަށް މަގުފަހިވެގެނަދާނެ ކަމަށާވެސް އޭނާ ވިދާޅުވިއެވެ. އަދި މުހިންމު ބައެއް ފަރާތްތަކުގެ އެއްބާރުލުން ނުލިބި މިފަދަ ޙިދުމަތެއް ފުޅާވެގެން ނުދާނޭކަމަށްވެސް އޭނާ ވިދާޅުވިއެވެ.

ދިރާގުން ވިދާޅުވީ އެ ކުންފުނިން އަބަދުވެސް ބަލަނީ ކަސްޓަމަރުންނަށް ދެވޭނެ ލުއިފަސޭހަގޮތްތައް ހޯދައިދިނުމަށް ކަމަށެވެ. މިގޮތުން ތަފާތު އިޖާދީ ގޮތްތަކާއި އެންމެ ފަހުގެ ޓެކްނޮލޮޖީ ބޭނުންކޮށްގެން ކަސްޓަމަރުންގެ ތަޖުރިބާ ރަނގަޅުކުރުމަށް އަބަދުވެސް މަސައްކަތް ކުރަމުންދާކަމަށް އެކުންފުނިން ހާމަކުރެއެވެ.