ސޫރިޔާގެ ރައީސް ބައްޝާރް އަލް-އަސަދުގެ ސަރުކާރާ ދެކޮޅަށް ހަނގުރާމަ ކުރަމުންދާ ހަތިޔާރު އެޅި ޖަމާޢަތަކުން އެ ޤައުމުގެ ހުޅަނގުއުތުރުގައި އޮތް ޙަލަބު ހިފުމަށް މަސައްކަތް ފަށައިފިއެވެ. ޙަލަބަށް ވެރިވެގަތުމަށް ތަޙްރީރް އަލް-ޝާމުން ފެށި މަސައްކަތުގެ ދަށުން ނޮވެންބަރު 27ވަނަ ދުވަހު ވަނީ އެ ސަރަޙައްދުގެ ރަށްބޭރުގައި ރަށްތަކުގައި ތިބި ސޫރިޔާގެ އަސްކަރިއްޔާގެ ސިފައިންނަށް އަމާޒުކޮށް ނުރައްކާތެރި ޙަމަލާތަކެއް ދޭން ފަށާފައެވެ.
ތަޙްރީރް އަލް-ޝާމްގެ ހަނގުރާމަވެރިން މިހާރު ވަނީ ޙަލަބުގެ ރަށްބޭރުގައިވާ ބައެއް ރަށްތަކަށް އަތްގަދަ ކޮށްފައެވެ. އަދި، ޙަލަބުގެ ވެރިރަށް ޙަލަބް ސިޓީއާ ދިމާއަށް އެ މީހުން ވަނީ މިސްރާބު ޖަހާފައެވެ. ސޫރިޔާގެ އަސްކަރިއްޔާގެ މަޞްދަރުތަކުން ބުނީ، ތަޙްރީރް އަލް-ޝާމްގެ ހަނގުރާމަވެރިން ހުއްޓުވަން މަސައްކަތް ކުރަމުންދާ ކަމުގައެވެ. އަދި، ޙަލަބް ސިޓީއަށް ދަތުރު ކުރެވެން އޮތް މަގުތަކާއި ޙަލަބުގެ ވައިގެ ބަނދަރު ބަންދު ކޮށްފައިވާނެ ކަމުގައެވެ.
މި ކަމުގައި، އަސަދުގެ ސަރުކާރާއި އަސްކަރިއްޔާއަށް ވާގިވެރިވަމުން ދަނީ ރަޝިޔާގެ އަސްކަރިއްޔާއިންނެވެ. ޙަލަބު މިނިވަން ކުރަން ހަނގުރާމަ ކުރަމުންދާ ސޫރިޔާގެ އަސްކަރިއްޔާގެ ސިފައިންނަށް އެހީތެރިކަން ފޯރުކޮށްދޭނެ ކަން ރަޝިޔާއިން ހާމަކޮށްފައިވާ ކަމުގައި ސޫރިޔާގެ އަސްކަރީ މަޞްދަރުތަކުން ބުންޏެވެ. އަދި، ކުރިއަށް އޮތް 72 ގަޑިއިރުގެ ތެރޭގައި އެ ކަމަށް ބޭނުންވާ ހަތިޔާރާއި އަސްކަރީ ސާމާނު ފޯރުކޮށްދޭން ރަޝިޔާއިން މަސައްކަތް ކުރަމުންދާ ކަން ވެސް މަޞްދަރުތަކުން ހާމަކުރިއެވެ.
ނަމަވެސް، ޙަލަބުގެ ސަރަހައްދުތަކުގައި ތިބި ސޫރިޔާގެ އަސްކަރިއްޔާގެ ސިފައިން ދަނީ އެ ސަރަޙައްދުތައް ދޫކޮށް ފައިބަމުންނެވެ. މަޞްދަރުތަކުން ބުނީ، ހަނގުރާމަވެރިން އަތްގަދަ ކޮށްފައިވާ ރަށްތަކުން ރައްކާތެރިކަމާ އެކު ފޭބުމަށް އަސްކަރިއްޔާއިން ސިފައިންނަށް އަމުރު ކޮށްފައިވާ ކަމުގައެވެ.
ޙަލަބަކީ، ސޫރިޔާގެ ދާޚިލީ ހަނގުރާމައިގެ ތެރެއިން ހަނގުރާމަވެރިން އަތްގަދަ ކޮށްފައިވާ ސަރަޙައްދެކެވެ. ނަމަވެސް، އަސަދަށް ވާގިވެރިވަމުން ދިޔަ ރަޝިޔާއާއި އީރާނުގެ އެހީތެރިކަމާ އެކު، ސޫރިޔާގެ އަސްކަރިއްޔާއިން 2016ވަނަ އަހަރު ވަނީ އެ ސަރަޙައްދުގައި ތިބި ހަނގުރާމަވެރިން ފަހަތަށް ޖައްސައި، އެ ސަރަޙައްދު މިނިވަން ކޮށްފައެވެ. އީރާނުން ވާގިވެރިވާ ހަތިޔާރު އެޅި ޖަމާޢަތްތަކުން ވެސް ވަނީ ސޫރިޔާގެ އަސްކަރިއްޔާއަށް ވާގިވެރިވެފައެވެ.
ތަޙްރީރް އަލް-ޝާމްގެ ޖަޔިޝް އަލް-ޢިއްޒާ ބްރިގޭޑުގެ ކޮމާންޑަރު މުޞްޠަފާ ޢަބްދުލް ޖާބިރު ބުނީ، އީރާނުން ވާގިވެރިވާ ހަތިޔާރު އެޅި ޖަމާޢަތްތަކުން ޙަލަބުން ފައިބާފައިވާ ކަމުގައެވެ. އަދި، ޙަލަބުގެ ރަށްބޭރުގައިވާ ރަށްތަކާއި އަވަށްތަކަށް އަތްގަދަ ކުރެވިފައި ވަނީ އެ ސަބަބާ ގުޅިގެން ކަމުގައެވެ. އެ ސަރަޙައްދުގައި ހަރަކާތްތެރިވަމުން ދިޔަ އީރާނާ ގުޅުން އޮތް ހަތިޔާރު އެޅި ޖަމާޢަތްތަކަށް ޔަހޫދީ ފައުޖުން ވެސް ދާދި ފަހުން ނުރައްކާތެރި ޙަމަލާތަކެއް އަމާޒުކޮށްފައިވެއެވެ.
ތަޙްރީރް އަލް-ޝާމުން ބުނީ، ޙަލަބު ހިފުމުގެ މަސައްކަތް ފަށާފައި ވަނީ، ހަނގުރާމަވެރި ޖަމާޢަތްތަކުގެ ބާރުގެ ދަށުގައި އޮތް އިދްލަބް ޕުރޮވިންސަށް ސޫރިޔާގެ އަސްކަރިއްޔާއިން، ރަޝިޔާއާ ގުޅިގެން، ދެމުންދާ ޙަމަލާތައް އިތުރު ކުރަމުންދާތީ ކަމުގައެވެ. އެ ޙަމަލާތަކުގައި ޢާންމުންގެ ގިނަ އަދަދެއްގެ ބަޔަކު މަރައިލާފައިވާ ކަމުގައި ވެސް އެ ޖަމާޢަތުން ބުންޏެވެ.
ތަޙްރީރް އަލް-ޝާމުން ޙަލަބު ހިފުމަށް މަސައްކަތް ފަށާފައި ވަނީ ތުރުކީވިލާތުގެ ރުހުމާ އެކުގައި ކަމުގައި ތުރުކީވިލާތުގެ ޖާސޫސީ އިދާރާގެ މަޞްދަރުތަކުން ބުންޏެވެ. ނަމަވެސް، ތުރުކީވިލާތުގެ ޚާރިޖީ ވުޒާރާއިން ވަނީ މި ތުހުމަތުތައް ދޮގުކޮށްފައެވެ. އެ ވުޒާރާގެ ތަރުޖަމާނު އޮންގު ކެޗެލީ ވިދާާޅުވީ، ސޫރިޔާގެ މަސްރަޙު އިތުރަށް ހޫނުވާން ތުރުކީވިލާތުން ނޭދޭ ކަމުގައެވެ. އަދި، ޙަލަބަށް ޙަމަލާ ދިނުމަކީ މަޞްރަހު އިތުރަށް ހޫނުވާނެ އަމަލެއް ކަމަށާއި، ޙަމަލާ ބަދަލު ކުރުން މެދުކަނޑައިލުމަށް ވެފައިވާ އެއްބަސްވުންތަކާ ޚިލާފު އަމަލަކަށް ވާނެ ކަމުގައި ޤަބޫލު ކުރައްވާ ކަމުގައެވެ.
އަސަދުގެ އަސްކަރިއްޔާއާ ދެކޮޅަށް ހަނގުރާމަ ކުރަމުންދާ ހަތިޔާރު އެޅި ބައެއް ޖަމާޢަތްތަކަށް ތުރުކީވިލާތުން ދަނީ ވާގިވެރިވަމުންނެވެ. ތަޙްރީރް އަލް-ޝާމުން ޙަލަބަށް ދީފައިވާ ޙަމަލާތަކަކީ، 2020 މާރިޗުގައި ޙަމަލާ ބަދަލު ކުރުން މެދުކަނޑައިލުމަށް ވެވުނު އެއްބަސްވުމަށް ފަހު ދީފައިވާ މި ފަދަ އެންމެ ބޮޑު އަދި ނުރައްކާތެރި ޙަމަލާތަކެވެ.
ޙަލަބަށް އަތްގަދަ ކުރަން ހަނގުރާމަ ކުރަމުންދާ ހަތިޔާރު އެޅި ޖަމާޢަތްތަކުން ބޮޑެތި ކުރިއެރުންތަކެއް ހޯދަމުންދާ ކަމުގައިވާ ސޫރިޔާގެ އަސްކަރިއްޔާގެ މަޞްދަރުތަކުން ބުނި ނަމަވެސް، އެ ޤައުމުގެ ދައުލަތުގެ މީޑިޔާއިން ވަނީ އެ ކަން ދޮގުކޮށްފައެވެ. އެ މީޑިޔާއިން ބުނީ، ތަޙްރީރް އަލް-ޝާމްގެ ފައުޖުތަކާ ދެކޮޅަށް ސޫރިޔާގެ އަސްކަރިއްޔާއިން ހަނގުރާމަ ކުރަމުންދާ ކަމުގައެވެ. އަދި، ރަޝިޔާއިން އެ ކަމަށް އަސްކަރީ އެހީތެރިކަން ފޯރުކޮށްދެމުންދާ ކަމުގައެވެ. ޙަލަބާއި އިދްލަބްގައިވާ ހަނގުރާމަވެރިންގެ އަމާޒުތަކަށް ނުރައްކާތެރި ޙަމަލާތަކެއްދީ، ބޮޑެތި ގެއްލުންތަކެއް ދީފައިވާ ކަމުގައި ވެސް ސޫރިޔާގެ ދައުލަތުގެ މީޑިޔާއިން ރިޕޯޓު ކުރިއެވެ.
ސޫރިޔާގެ މަސްރަޙު ހޫނުވަމުން ދިޔުމާ ގުޅިގެން އދން ވެސް ވަނީ ކަންބޮޑުވުން ފާޅުކޮށްފައެވެ. "ސޫރިޔާގެ ހުޅަނގުއުތުރުގައި ނިއުޅެމުންދާ ހާލަތާ މެދު އަޅުގަނޑުމެން ވަރަށް ބޮޑަށް ކަންބޮޑުވޭ. އެ ސަރަޙައްދުގައި މެދުކެނޑުމެއް ނެތި ދެމުންދާ ޙަމަލާތަކުގައި ޢާންމުންގެ 27 މީހުން ވަނީ މަރުވެފައި، އޭގެ ތެރޭގައި އަށް އަހަރުން ދަށުގެ ކުޑަކުދިން ވެސް ހިމެނޭ،" ސޫރިޔާގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމުގެ މަސައްކަތް ވިލަރެސް ކުރައްވާ އދގެ ރީޖަނަލް ހިޔުމެނިޓޭރިޔަން ކޯޑިނޭޓަރުގެ ނައިބު ޑޭވިޑް ކާޑެން ވިދާޅުވިއެވެ.
ސޫރިޔާގެ ދައުލަތުގެ މީޑިޔާއިން ވެސް ވަނީ، ހަނގުރާމަވެރިންގެ ޙަމަލާތަކުގައި ޢާންމުންގެ ބަޔަކު މަރުވެފައިވާ ކަމަށް ރިޕޯޓު ކޮށްފައެވެ. މި ގޮތުން، ޔުނިވަރސިޓީއެއްގެ ޑޯމިޓަރީއަށް ދީފައިވާ ޙަމަލާތަކެއްގައި ހަތަރު މީހުން މަރުވެފައިވާ ކަމަށާއި، އޭގެ ތެރޭގައި ދެ ދަރިވަރުން ހިމެނޭ ކަމުގައި އެ މީޑިޔާއިން ރިޕޯޓު ކުރިއެވެ. ނަމަވެސް، އެއީ މަރުވެފައިވާ ކަމަށް އދން ބުނެފައިވާ 27 މީހުންގެ ތެރޭގައި ހިމެނޭ އަދަދެއް ކަން ސާފެއް ނޫނެވެ.
ރަޝިޔާގެ ރިޔާސީ ގަނޑުވަރު، ކްރެމްލިންގެ ތަރުޖަމާނު ދްމީތުރީ ޕިސްކޯފް ވިދާޅުވީ، ހަނގުރާމަވެރިން ދީފައިވާ ޙަމަލާތަކަކީ ސޫރިޔާގެ ސިޔާދަތީ މިނިވަން ކަމަށް އަރައިގަތުމުގެ އަމަލެއްގެ ގޮތުގައި ދެކޭ ކަމުގައެވެ. "އަޅުގަނޑުމެންގެ ތާޢީދު އޮތީ އެ ސަރަޙައްދުގައި ހަމަޖެހުން ޤާއިމުކޮށް ދުސްތޫރީ ބާރުވެރިކަން ޤާއިމު ކުރުމަށް ސޫރިޔާގެ ސަރުކާރުން ކުރަމުންދާ މަސައްކަތްތަކަށް،" އޭނާ ވިދާޅުވިއެވެ.