ސޫރިޔާގެ ހުޅަނގުއުތުރުގައި ހަތިޔާރު އެޅި ގުރޫޕުތަކުން އަތްގަދަ ކޮށްފައިވާ ސަރަޙައްދުތަކަށް އެ ޤައުމުގެ އަސްކަރިއްޔާއާއި ރަޝިޔާ ގުޅިގެން ވަރުގަދަ ވައިގެ ޙަމަލާތަކެއް ދީފިއެވެ. ތުރުކީވިލާތާއި ސޫރިޔާ ގުޅޭ ސަރަޙައްދީ ރޮނގު ކައިރީގައިވާ، ހަތިޔާރު އެޅި ޖަމާޢަތްތަކުން އަތްގަދަ ކޮށްފައިވާ ބިންތަކަށް ޙަމަލާދީފައި ވަނީ، އެ ޖަމާޢަތްތައް ފަހަތަށް ޖައްސައި، އެ ބިންތައް މިނިވަން ކުރުމަށް ހިންގަމުންދާ އަސްކަރީ ޙަރަކާތުގެ ދަށުންނެވެ.
ސޫރިޔާގެ ސަރުކާރާ ދެކޮޅަށް ހަތިޔާރު އުފުލާފައިވާ ޖަމާޢަތެއް ކަމަށްވާ ހަޔިއަތު ތަޙްރީރް އަލް-ޝާމުން ނޮވެންބަރު 27ވަނަ ދުވަހު ވަނީ އެ ޤައުމުގެ ހުޅަނގު އުތުރު ޙަލަބު ޕުރޮވިންސުގެ ބައެއް ސަރަޙައްދުތަކަށް ޙަމަލާދީ، ބައެއް ރަށްތަކާއި އަވަށްތަކަށް އަތްގަދަ ކޮށްފައެވެ. އެއީ، ސޫރިޔާގެ ރައީސް ބައްޝާރު ހާފިޛް އަލް-އަސަދުގެ އަސްކަރިއްޔާގެ ބާރުގެ ދަށުގައި އޮތް ސަރަޙައްދެކެވެ.
މިއީ، ޙަމަލާ ބަދަލު ކުރުން މެދުކަނޑައިލުމަށް 2020ވަނަ އަހަރުގެ މާރިޗު މަހު އެކުލަވައިލި އެއްބަސްވުމަށް ފަހު، ހަތިޔާރު އެޅި ޖަމާޢަތަކުން ދީފައިވާ އެންމެ ބޮޑު އަދި ނުރައްކާތެރި ޙަމަލާތަކެވެ. އެއްބަސްވުމުގެ ދެކޮޅުގައި ތިބީ ރަޝިޔާއާއި ތުރުކީވިލާތެވެ. ރަޝިޔާއިން ދަނީ އަސަދުގެ ސަރުކާރަށް ވާގިވެރިވަމުންނެވެ. އަދި، އަސަދުގެ ސަރުކާރާ ދެކޮޅަށް ހަނގުރާމަ ކުރަމުންދާ ހަތިޔާރު އެޅި ޖަމާޢަތްތަކަށް ތުރުކީވިލާތުން ދަނީ އެހީތެރިކަން ފޯރުކޮށްދެމުންނެވެ.
ސޫރިޔާގެ އަސްކަރިއްޔާއިން ބުނީ، ޙަލަބުގެ ރަށްތަކަށް އަތްގަދަ ކޮށްފައިވާ ހަތިޔާރު އެޅި ގުރޫޕުތަކާ ދެކޮޅަށް ނުރައްކާތެރި ޙަމަލާތަކެއްދީ، ބޮޑެތި ގެއްލުންތަކެއް ދީފައިވާނެ ކަމުގައެވެ. އަދި، ރަޝިޔާގެ އިތުރުން ބޭރުގެ އެހެން ޤައުމެއްގެ އަސްކަރިއްޔާއާ ގުޅިގެން، ހަނގުރާމަވެރި ޖަމާޢަތްތައް ފަހަތަށް ޖައްސަން މަސައްކަތް ކުރަމުންދާ ކަމުގައެވެ. އަމާޒަކީ، ހަނގުރާމަވެރިން ވެރިވެގަނެފައިވާ ބިންތައް މިނިވަން ކުރުން ކަމުގައި ވެސް އަސްކަރިއްޔާއިން ހާމަކުރިއެވެ.
ހަނގުރާމަވެރިން ވަނީ ޙަލަބު ސިޓީގެ ރަށްބޭރުން 10 ކިލޯމީޓަރުގެ ސަރަޙައްދަކަށް އަތްގަދަ ކޮށްފައެވެ. އަދި، އެ ސަރަޙައްދުގައި އޮތް ދެ ރަށެއް ކަމުގައިވާ ނުބްލާއި އަލް-ޒަހްރާއުގެ ބައެއް ބިންތަކަށް ވެރިވެގަނެފައެވެ. އެއީ، ލުބްނާންގެ މުޖާހިދުންގެ ޖަމާޢަތް، ޙިޒްބުاللهގެ ބާރުގެ ދަށުގައި އޮތް ސަރަޙައްދުތަކެކެވެ. މީގެ އިތުރުން، އީރާނުން ވާގިވެރިވާ ހަތިޔާރު އެޅި ޖަމާޢަތްތަކުގެ ބާރުގެ ދަށުގައި އޮތް އަލް-ނަޔިރަބު ވައިގެ ބަނދަރަށް ވެސް ހަނގުރާމަވެރިން ވަނީ ޙަމަލާ ދީފައެވެ. އެއީ، ޙަލަބުގެ އިރުމަތީގައި އޮންނަ ވައިގެ ބަނދަރެކެވެ.
ސޫރިޔާގެ އަސްކަރިއްޔާގެ މަޞްދަރުތަކުން ބުނީ، އެ ސަރަޙައްދުތަކަށް ރަޝިޔާގެ އަސްކަރީ މަތިންދާބޯޓުތަކުގެ އެހީތެރިކަމާ އެކު ނުރައްކާތެރި ޙަމަލާތަކެއް ދީފައިވާނެ ކަމުގައެވެ. ޙަމަލާތައް އަމާޒު ކޮށްފައި ވަނީ އުތާރިބަށެވެ. އެ ސަރަޙައްދުގައި އިމަރޖެންސީ ޚިދުމަތްތައް ފޯރުކޮށްދޭ ވައިޓް ހެލްމެޓްސުން ބުނީ، ސޫރިޔާގެ އަސްކަރިއްޔާއާއި ރަޝިޔާއިން ގުޅިގެން ދީފައިވާ ވައިގެ ޙަމަލާތަކުގައި ޢާންމުންގެ 16 މީހުން މަރުވި ކަމުގައެވެ. ވައިގެ ޙަމަލާތަކާ ގުޅިގެން ޙަލަބުން ވެރިރަށް ދިމިޝްޤަށް ދަތުރު ކުރެވެން އޮންނަ މައި ހަލިމަގު ވެސް ވަނީ ވަގުތީ ގޮތުން ބަންދުކޮށްފައެވެ.
ސޫރިޔާގެ ހުޅަނގު އުތުރަށް އަތްގަދަ ކޮށްފައިވާ ހަތިޔާރު އެޅި ޖަމާޢަތްތަކުން ބުނީ، އެ ސަރަޙައްދުގައި އޮތް އިދްލަބް ޕުރޮވިންސުގެ ރަށްތަކަށް ސޫރިޔާގެ އަސްކަރިއްޔާއާއި ރަޝިޔާ ގުޅިގެން ޙަމަލާތައް އަމާޒު ކުރަމުންދާ ކަމުގައެވެ. އަދި، ޙަލަބުގެ ރަށްތަކަށް ޙަމަލާ ދީފައި ވަނީ، އިދްލަބްގެ ޢާންމު ރައްޔިތުންނާ ދެކޮޅަށް ދެމުންދާ ޙަމަލާތަކުގެ ބަދަލު ހިފުމުގެ ގޮތުން ކަމުގައެވެ. އެ ސަރަޙައްދުތަކުގައި ހަތިޔާރު އެޅި ޖަމާޢަތްތަކުގެ ބާރުގެ ދަށުގައިވާ ސަރަޙައްދުތަކަށް އިތުރު ޙަމަލާތައް ދިނުމަށް ސޫރިޔާގެ އަސްކަރިއްޔާއިން ތައްޔާރުވަމުންދާ ކަމުގައި ވެސް އެ ޖަމާޢަތްތަކުން ބުންޏެވެ.
އީރާނުގެ ދައުލަތުގެ މީޑިޔާއިން ބުނީ، ހަތިޔާރު އެޅި ޖަމާޢަތްތަކުން ޙަލަބަށް ދީފައިވާ ޙަމަލާތަކުގައި އެ ޤައުމުގެ އިސްލާމީ އިންޤިލާބީ ލަޝްކަރު (އައިއާރްޖީސީ)ގެ އިސް މުޝީރެއް ކަމުގައިވާ ބްރިގެޑިޔަރ ޖެނެރަލް ކިޔުމަރް ޒުބޫރުހާޝިމީ ޝަހީދު ކޮށްލާފައިވާ ކަމުގައެވެ. އެއީ، ސޫރިޔާގެ އަސްކަރިއްޔާއަށް ބޭނުންވާ ފަންނީ އެހީތެރިކަން ފޯރުކޮށްދެއްވުމަށް ފޮނުވާފައިވާ އައިއާރްޖީސީގެ އިސް ކޮމާންޑަރެކެވެ. ސޫރިޔާގެ ދާޚިލީ ހަނގުރާމައިގައި، އަސަދުގެ ސަރުކާރަށް ވާގިވެރިވުމުގެ ގޮތުން އީރާނުން އެ ޤައުމަށް ގިނަ އަދަދެއްގެ ހަނގުރާމަވެރިން ފޮނުވާފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުންޏެވެ. އީރާނުން ވާގިވެރިވާ ޖަމާޢަތްތަކުން ދަނީ ސޫރިޔާގެ ބައެއް ސަރަޙައްދުތައް ކޮންޓުރޯލު ކުރަމުންނެވެ.
ތުރުކީވިލާތުގެ ސަލާމަތީ ދާއިރާގެ މަޞްދަރުތަކުން ބުނީ، އެ ޤައުމުން ވާގިވެރިވާ ހަތިޔާރު އެޅި ޖަމާޢަތްތަކުން ސޫރިޔާގެ އަސްކަރިއްޔާގެ އަމާޒުތަކަށް ޙަމަލާތަކެއް ދީފައިވީ ނަމަވެސް، ޙަމަލާ ބަދަލު ކުރުން މަނާ ސަރަޙައްދުތަކަށް އެތެރެވެފައި ނުވާ ކަމުގައެވެ. އަދި، ޙަލަބުގެ ރަށްބޭރުގައިވާ ބައެއް ސަރަޙައްދުތަކަށް ހަތިޔާރު އެޅި ޖަމާޢަތްތަކުން އަރާފައި ވަނީ، ސޫރިޔާގެ އަސްކަރިއްޔާގެ ސިފައިން އެ ސަރަޙައްދުތަކުން ފޭބުމުން ކަމުގައެވެ.
ޙަމަލާ ބަދަލު ކުރުން މަނާ ސަރަޙައްދުތަކެއް ކަނޑައަޅާފައި ވަނީ ރަޝިޔާއާއި އީރާން އަދި ތުރުކީވިލާތާ ދެމެދު 2019ވަނަ އަހަރު ވެވުނު އެއްބަސްވުމެއްގެ ދަށުންނެވެ. ތުރުކީވިލާތުގެ ދިފާޢީ ވުޒާރާގެ މަޞްދަރަކުން ބުނީ، ސޫރިޔާގެ އަސްކަރިއްޔާގެ އަމަލުތައް ވަރަށް ގާތުން ބަލަމުންދާ ކަމުގައެވެ. އަދި، ސޫރިޔާގެ ބިންތަކުގައި ހަރަކާތްތެރިވަމުންދާ ތުރުކީވިލާތުގެ ސިފައިންގެ ސަލާމަތާއި ރައްކާތެރިކަން ކަށަވަރު ކުރުމަށް ފިޔަވަޅުތަކެއް އަޅާފައިވާނެ ކަމުގައެވެ.
ހަޔިއަތު ތަޙްރީރް އަލް-ޝާމަކީ އެމެރިކާއާއި ތުރުކީވިލާތުން ނިރުބަވެރި ޖަމާޢަތެއްގެ ގޮތުގައި ކަނޑައަޅާފައިވާ ގުރޫޕެކެވެ. އެއީ، ތުރުކީވިލާތުން ވާގިވެރިވާ ޖަމާޢަތްތަކާ ދެކޮޅަށް މަސައްކަތް ކުރަމުންދާ ގުރޫޕެކެވެ. އަދި، ސޫރިޔާގެ އަސްކަރިއްޔާއިން ދަނީ ރަޝިޔާއާ ގުޅިގެން އެ ޖަމާޢަތުން ހަރަކާތްތެރިވަމުންދާ ސަރަޙައްދުތަކަށް އަމާޒުކޮށް ނުރައްކާތެރި ޙަމަލާތަކެއް ދެމުންނެވެ. މި އަހަރުގެ ތެރޭގައި ސޫރިޔާގެ އަސްކަރިއްޔާއިން ދީފައިވާ ޙަމަލާތަކުގައި ޢާންމުންގެ 80 މީހުން މަރުވެފައިވާ ކަމުގައި އެ ޖަމާޢަތުން ބުންޏެވެ. ނަމަވެސް، ޢާންމުން ދިރިއުޅޭ ސަރަޙައްދުތަކަށް ޙަމަލާ ދެމުންދާ ކަމަށް ކުރާ ތުހުމަތުތައް ސޫރިޔާގެ އަސްކަރިއްޔާއިން ދޮގު ކުރެެއެވެ.