ދިވެހިރާއްޖެއާއި، ރާއްޖޭން ބޭރުން ލިބޭ ފައިސާ އަމާނާތްތެރިކަމާއެކު ބެލެހެއްޓުމަށް ޤައުމީ ކުޅިވަރު ފަންޑެއް އުފެއްދުމަށް ލާޒިމުކުރާގޮތަށް ކުޅިވަރާ ބެހޭ ގާނޫނަށް އިޞްލާޙުތަކެއް ހުށަހަޅައިފިއެވެ. ސަރުކާރުގެ ފަރާތުން މި އިޞްލާޙު ހުށައެޅުއްވީ ދިއްދޫ ދާއިރާގެ މެންބަރު ޢަބުދުއްލަޠީފް މުޙައްމަދެވެ.
ކުޅިވަރުގެ ޤާނޫނަށް ހުށައެޅުއްވި އިޞްލާހު މަޖިލީހަށް ހުށައަޅުއްވަމުން ދިއްދޫ ދާއިރާގެ މެންބަރު ޢަބުދުއްލަޠީފް މުޙައްމަދު ވިދާޅުވީ އަދުގެ ސަރުކާރުން ކުޅިވަރު ކުޅޭ ފަރާތްތަކާއި، ކުޅިވަރަށް ލޯބިކުރާ ފަރާތްތަކާއި، ކުޅިވަރަށް އެކި ގޮތްގޮތުން ހަރަދުކުރާ މީހުންނަށް ފުރިހަމަ ގާނޫނެއްގެ ތެރެއިން ހިމާޔަތާއި ރައްކާތެރިކަން ދިނުމަށް އިސްކަން ދެއްވާކަމަށެވެ. އެހެންކަމުން މިހާރު ހުށައަޅުއްވާފައިވާ އިޞްލާހަކީ އެކަމަށް ތަންދޭ އިޞްލާހެއްކަން މެންބަރު ފާހަގަކުރެއްވިއެވެ. އަދި މެންބަރު ވިދާޅުވީ މިހާރު ހުށައަޅުއްވާފައިވާ އިޞްލާހުން ކުޅިވަރުގެ ހުރިހާ ވަސީލަތްތަކާއި، ޚިދުމަތްތައް ފޯރުކޮށްދިނުމަށްވެސް ބާރު އަޅާކަމަށެވެ.
މެންބަރުގެ ވާހަކަފުޅުގައި ވަނީ ރާއްޖޭގެ ފުޓުބޯޅަ މިވަގުތު އޮތް ޙާލަތުވެސް ފާހަގަކުރައްވާފައެވެ. އެގޮތުން ފީފާއިން ދިވެހި ފުޓްބޯޅަ ސަސްޕެންޑް ކޮށްފައި ކަމަށާއި، އެހެންކަމުން ނިމިގެން ދިޔަ ސަރުކާރުން ކުޅިވަރަށް ދޭންޖެހޭ ސަމާލުކަން ނުދީއޮތްކަން ހާމަވާކަމަށް މެންބަރު ވިދާޅުވިއެވެ.
"ފާއިތުވި މާޒީއަށް ބަލާއިރު ރަށްރަށުގައި ޒުވާނުންގެ މަރުކަޒުތައް ހުރި. ނަމަވެސް ފާއިތުވި ސަރުކާރުން ވަނީ ކުޅިވަރުން ލިބެންޖެހޭ ޚިދުމަތްތައް ލިބިދިނުމުގައި ވަރަށް ބޮޑަށް އިހުމާލުވެފައި. އެހެންނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވިސްނުންފުޅަކީ ކުރިޔަށް އޮތްތަނުގައި ކުޅިވަރުން ދިވެހި ޒުވާނުންނަށް ކާމިޔާބު ހޯދައިދިނުން. މި އިޞްލާހުގެ އެންމެ ބޮޑު މަޤްޞަދަކީވެސް ދިވެހިންނަށް ކުޅިވަރުން ލާބަޔާއި މަންފާ ހޯދައިދިނުން." ދިއްދޫ ދާއިރާގެ މެންބަރު ޢަބްދުއްލަޠީފް މުޙައްމަދު ވިދާޅުވިއެވެ.
މި އިޞްލާހަށް ވާހަކަފުޅު ދެއްކެވި އެހެނިހެން ގިނަމެންބަރުންވެސް އިޞްލާޙަށް ތާޢީދުކުރެއްވިއެވެ. އެގޮތުން ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވީ އަންނަ އަހަރަށް ހުށަހަޅާފައިވާ ބަޖެޓުންވެސް ކުރިވަރު އާލާކުރުމަށްޓަކައި ވަރަށް ގިނަ ހޭދަތައް ކުރުމަށް ރައީސުލްޖުމްހޫރިއްޔާ ނިންމަވާފައިވާ ކަމަށެވެ.
"ވުޒާރާތައް އެބަހުރި، އެސޯސިއޭޝަންތައް އެބަހުރި، ތަފާތު ބޮޑެތި މަގާމުތައް އުފައްދާ ބޮޑެތި މޭޒު ގޮނޑި އެބޭފުޅުންނަށް ހާއްސަކުރެވިފައިވޭ. އެހެންނަމަވެސް ރާއްޖޭގެ ރައްޔިތުން އެކުޅިވަރަށް އެއްމެ ޝައުގުވެރިކަން ބޮޑު ކުޅިވަރުގެ ހާލަތު އޮތީ ވަރަށް ވީރާނާކޮށްކަން މިއަދު ހިތާމައާއެކު ފާހަގަކޮށްލަން ބޭނުން. ފުޓުބޯޅައިގެ ފޯރިއެއްނެތް، ޖޯޝެއްނެތް ރޫހެއްނެތް. ފުޓުބޯޅަ ކުރިއަރުވަން އޮތް ވުޒާރާ އޮތީ ކޮރަޕްޝަންގެ ހާއްޔަކަށްވެފަ" މެންބަރު ޝުޖާޢު ވިދާޅުވިއެވެ.
ކުޑަހުވަދޫ ދާއިރާގެ މެންބަރު ހުސެއިން ހަމީދުވެސް ވަނީ އެފްއޭއެމްގެ ޙާލަތަށް އަލިއަޅުއްވާލައްވާ ވާހަކަފުޅު ދައްކަވާފައެވެ.
"އެފްއޭމަށް ވަތް ފައިސާއަށް ވީގޮތެއް ނޭނގުނު. މުދަތާކާ ތަކެއްޗަށް ވީގޮތެއް ނޭންގުނު. ވެރިންނަށް ވީ ގޮތެއް ނޭގުނު. މިހިސާބަށް ދިޔައިރުވެސް އަޅުގަނޑުމެންގެ ތެރޭގައި އިހުމާލުވި ފަރާތެއްގެ އިހުމާލު ހޯދާކަށް މަސައްކަތެއް ނުކުރެވުނު" ކުޑަހުވަދޫ ދާއިރާގެ މެންބަރު ހުސެއިން ހަމީދު ވިދާޅުވިއެވެ.
މާފަންނު ދެކުނު ދާއިރާގެ މެންބަރު ޢަބުދުﷲ ރިފާޢު ވަނީ ސްޕޯޓްސް ކޯޕަރޭޝަން ޤާނޫނުގެ ތެރެއިން އެ ކޯޕަރޭޝަނަށް ބާރުތައް ދީފައިނުވާކަމަށް ތުހުމަތުކުރައްވާފައެވެ.
"ކުޅިވަރާއިބެހޭ ޤާނޫނު ވުޖޫދުވެގެން މިއަދާހަމައަށް އައިއިރުވެސް މި ބިލުގައި ސްޕޯޓްސް ކޯޕަރޭޝަނަށް ބިލުގެ ތެރެއިން ދޭން ޖެހޭ ބާރާއި ނުވަތަ އެ ކޯޕަރޭޝަން ހިންގުމަސް ދޭންޖެހޭ ފުރުސަތުތައް ނުލިބި ވާކަން ފާހަގަކޮށްލަން ޖެހޭ" މާފަންނު ދެކުނު ދާއިރާގެ މެންބަރު ޢަބުދުﷲ ރިފާޢު ވިދާޅުވިއެވެ.
ކުޅިވަރާ ބެހޭ ޤާނޫނަށް ގެންނަށް ހުށަހަޅާފައިވާ އިސްލާހުތަކުގެ ތެރޭގައި ދިވެހިރާއްޖޭގެ ކުޅިވަރާބެހޭ ޤާއުމީ މަޖިލީހާއި، މޯލްޑިވްސް ނޭޝަނަލް އިންސްޓިޓިއުޓް އޮފް ސްޕޯޓްސް ގާއިމުކޮށް ރެގިއުލޭޓްކޮށް، ޤައުމީ ކުޅިވަރު އެސޯސިއޭޝަންތަކާއި ފެޑެރޭޝަންތައް އަދި މޯލްޑިވްސް އޮލިމްޕިކް ކޮމިޓީއަށާއި ފެރަލިމްޕިކް ކޮމިޓީއަށް ލިބިދޭ ބާރުތައް ބަޔާންކުރުން ހިމެނެއެވެ. އަދި ކުޅިވަރުގެ ދާއިރާގައި ތަފާތުކުރުން ނައްތާލައި އަންހެނުންނާއި ފިރިހެނުންގެ މެދުގައި ފަރަގު ކުޑަކުރުމާއި، މާލީ އެހީ ދިނުމުގައި ހުރި ތަފާތުތައް ނައްތާލުންވެސް ޤާނޫނަށް ހުށައަޅާފައިވާ އިޞްލާހުގައި ބަޔާންކުރެއެވެ.
މީގެ އިތުރުން ފަޤީރުކަމާއި އިޖްތިމާޢީ މައްސަލަތަކާއި، އާންމު ބަލިމަޑުކަމުން ގައުމު ސަލާމަތް ކުރުމަށް ކުޅިވަރު މެދުވެރިކޮށް ދުޅަހެޔޮ ސިއްހަތެއް ކުރިއެރުވުމަށް ކުޅިވަރާބެހޭ ޤާނޫނަށް ހުށައަޅާފައިވާ އިޞްލާހުން ލާޒިމްކުރެއެވެ.
ކުޅިވަރާއި ބެހޭ ގާނޫނަކީ 2015 ވަނަ އަހަރު އެކުލަވާލާ ޢަމަލުކުރަން ފެށި ގާނޫނެކެވެ.