ފެން ބިލުގެ ޖޫރިމަނާތައް ޝަރުތުތަކާއެކު މަޢާފުކޮށްދެނީ

ގޭބިސީތަކާއި ވިޔަފާރިތަކުގެ ފެން ބިލް ނުދެއްކި ގިނަދުވަސް ވެގެން އަރާފައިވާ ޖޫރިމަނާ ފައިސާ ވަކި ޝަރުތުތަކާއެކު މަޢާފު ކޮށްދޭން އަނެއްކާވެސް ނިންމައިފިއެވެ. މިކަމަށް ލުއިދޭނެ ގޮތުގެ އުސޫލު އެމްޑަބްލިއުއެސްސީން ވަނީ ޢާއްމުކޮށްފައެވެ.

އެމްޑަބްލިއުއެސްސީން ނެރުނު ނޫސްބަޔާނެއްގައި ވިދާޅުވީ، ކަސްޓަމަރުންނަށް ފެން ބިލްތަކުގެ ފައިސާ ދެއްކުމަށް ލުއިފަސޭހަ މަގެއް ފަހިކޮށްދިނުމަށް ކުރަމުންދާ މަސައްކަތްތަކުގެ ތެރެއިން، ގޭބިސީތަކާއި ވިޔަފާރިތަކުގެ ފެން ބިލް ނުދެއްކި ގިނަދުވަސް ވެގެން އަރާފައިވާ ޖޫރިމަނާ ފައިސާ މަޢާފު ކޮށްދިނުމަށް އަނެއްކާވެސް ނިންމަވާފައިވާ ކަމަށެވެ.

މި ނިންމުމާ ގުޅިގެން އެމް.ޑަބްލިޔު.އެސް.ސީގެ ގޭބިސީތަކުގެ ކަސްޓަމަރުންނާއި ވިޔަފާރި ޓެރިފް ކަސްޓަމަރުންގެ ބިލްތަކަށް، 31 ޑިސެމްބަރ 2025ގެ ނިޔަލަށް އަރާފައިވާ ޖޫރިމަނާ މަޢާފް ކޮށްދެން ވަނީ ނިންމާފައެވެ. އެމްޑަބްލިއުއެސްސީން ވިދާޅުވީ، ޖޫރިމަނާ މަޢާފް ކޮށްދެވޭނީ ޖޫރިމަނާ އަރާފައިވާ ތަންތަނުން ބިލްތަކަށް ދައްކަވަންޖެހޭ ޖުމްލަ ފައިސާ 01 އޭޕްރީލް 2026 އިން ފެށިގެން 31 ޑިސެމްބަރ 2026 އާއި ދެމެދު އެއްކޮށް ދައްކަވައި ޚަލާސްކުރާ ކަސްޓަމަރުންނަށް ކަމަށެވެ.

މީގެއިތުރުން، އެއްބަސްވުމެއްގެ ދަށުން ބިލްތަކަށް މަހުން މަހަށް ބަހާލައިގެން ފައިސާ ދައްކާ ޚަލާސްކުރަން އެދޭ ކަސްޓަމަރުންނަށް، އެއިންތިޒާމްވެސް އެމްޑަބްލިއުއެސްސީއިން ހަމަޖައްސައިދޭނެވެ. މަހުން މަހަށް ބަހާލައިގެން ފައިސާ ދައްކަވާ ކަސްޓަމަރުންނަށް ޖޫރިމަނާ މަޢާފް ކޮށްދެވޭނީ، އެއްބަސްވުމާއި އެއްގޮތަށް ފައިސާ ދައްކާ ޚަލާސް ކުރުމުންނެވެ.

އެމްޑަބްލިއުއެސްސީގެ ކަސްޓަމަރ ކެއަރ ސެންޓަރު އަދި ހޮޓްލައިން (105)އަށް ގުޅައިގެން މަޢުލޫމަތު ސާފު ކުރެވޭނެއެވެ. ނުވަތަ 1050 އަށް އެސްއެމްއެސްއެއް ފޮނުއްވުމުން ނުވަތަ [email protected] އަށް އީ-މެއިލް ކުރުމުން މިކަމުގައި އެހީތެރިކަން ލިބޭނެއެވެ.

މިދިޔަ އަހަރުވެސް ފެން ބިލުން ލުއިތަކެއް ދީފައިވެއެވެ. އޭރުވެސް ކަނޑައެޅި ވަކި އުސޫލެއްގެ ދަށުން، 2024ވަނަ އަހަރުގެ ޑިސެމްބަރު 1ގެ ނިޔަލަށް އަރާފައިވާ ޖޫރިމަނާ މަޢާފް ކޮށްދީފައިވެއެވެ.