ޑީއެޗްއެލްގެ މުދާ އުފުލާ މަތިންދާބޯޓެއް ވެއްޓި، އެކަކު މަރުވެއްޖެއެވެ. ވައިގެ މަގުން މުދާ އުފުލުގެ ޚިދުމަތް ފޯރުކޮށްދޭ ޑީއެޗްއެލުން އޮޕަރޭޓް ކުރާ ސްވިފްޓް އެއަރލައިންގެ މަތިންދާބޯޓު ވެއްޓިފައި ވަނީ ލިތުއޭނިޔާގެ ވެރިރަށް ވިލްނިޔުސްގެ ވައިގެ ބަނދަރު ކައިރި ސަރަޙައްދަކަށެވެ. މި ހާދިސާގައި އިތުރު ދެ މީހުން ޒަޚަމުވި ކަމުގައި ވިލްޔުނަސް ވައިގެ ބަނދަރުގެ އޮފިޝަލުންނާއި، ލިތުއޭނިޔާގެ ފުލުހުންނާއި އަލިފާން ނިއްވާ އިދާރާއިން ހާމަކުރިއެވެ.
ވެއްޓިފައިވާ މަތިންދާބޯޓަކީ ޖަރުމަނުވިލާތުގެ ލައިޕްޒިގުން ފުރައިގެން ވިލްނިޔުސަށް ދަތުރު ކުރަމުން ދިޔަ އުޅަނދެކެވެ. މަތިންދާބޯޓު ވެއްޓިފައި ވަނީ ވިލްނިޔުސް ވައިގެ ބަނދަރު ކައިރީގައި ހުރި ޢާންމުން ދިރިއުޅޭ ގެއެއްގެ މައްޗަށެވެ. ލިތުއޭނިޔާގެ ކާރިސާތަކާ ބެހޭ އިދާރާއިން ބުނީ، މި ހާދިސާގައި އެ ގޭގެ އަހުލުވެރިންގެ ފުރާނައަށް ނުރައްކާވެފައި ނުވާ ކަމުގައެވެ.
ނަމަވެސް، ވިލްނިޔުސްގެ ވައިގެ ބަނދަރާ 1.3 ކިލޯމީޓަރު ދުރުގައި އޮތް އެ ގެއަށް ވަނީ ބޮޑެތި ގެއްލުންތަކެއް ލިބިފައެވެ. އަދި، އެ ސަރަޙައްދުގައި ބޮޑު އަލިފާންގަނޑެއް ރޯވިއެވެ. އަލިފާންގަނޑު ނިއްވައިލުމަށް ޓީމުތަކުން ހަރަކާތްތެރިވަމުންދާއިރު، މަތިންދާބޯޓު ވެއްޓެން މެދުވެރިވި ސަބަބު ދެނެގަތުމަށް ކަމާ ގުޅޭ އިދާރާތަކުން ވަނީ ތަޙުޤީޤު ކުރަން ފަށާފައެވެ. އަދި، ފުލުހުން ވަނީ މަތިންދާބޯޓު ވެއްޓުނު ސަރަޙައްދު ބަންދުކޮށްފައެވެ.