ޔޫކްރެއިންގެ ވެރިރަށް ކީވަށް އަމާޒުކޮށް ރަޝިޔާއިން ނުރައްކާތެރި ޑްރޯން ޙަމަލާތަކެއް ދީފިއެވެ. ޔޫކްރެއިންގެ އަސްކަރިއްޔާއިން ބުނީ، ކީވަށް ޙަމަލާ ދިނުމަށް ބޭނުން ކޮށްފައިވާ ޑްރޯންތަކުގެ ތެރެއިން 10 ޑްރޯން ދިފާޢުކޮށް ވައްޓައިލާފައިވާނެ ކަމުގައެވެ. މި ޙަމަލާތަކުގައި އެއްވެސް މީހެއްގެ ފުރާނައަށް ނުރައްކާވި ކަން ސާފެއް ނޫނެވެ.
ފާއިތުވި 24 ވަރަކަށް ގަޑިއިރުގެ ތެރޭގައި ޔޫކްރެއިންގެ އެކި ސަރަޙައްދުތަކަށް ޙަމަލާ ދިނުމަށް ރަޝިޔާއިން 73 ޑްރޯން ބޭނުން ކޮށްފައިވެއެވެ. ޔޫކްރެއިންގެ އަސްކަރިއްޔާއިން ބުނީ، އޭގެ ތެރެއިން 50އެއްހާ ޑްރޯން ދިފާޢުކޮށް ވައްޓައިލާފައިވާނެ ކަމުގައެވެ. އޭގެ ތެރެއިން 19 ޑްރޯންގެ ސަބަބުން ބޮޑެތި ގެއްލުންތަކެއް ލިބުނު ނަމަވެސް، ޔޫކްރެއިނުން އެ ކަމުގެ މަޢުލޫމާތު ސާފުކޮށްދީފައެއް ނެތެވެ.
ކީވަށް ޙަމަލާ ދިނުމަށް ބޭނުން ކޮށްފައިވާ ޑްރޯންތައް ދިފާޢު ކުރުމަށް ޔޫކްރެއިނުން ވަނީ އެ ޤައުމުގެ އަސްކަރިއްޔާއަށް ލިބިފައިވާ ހުރިހާ ވަސީލަތްތަކެއް ބޭނުން ކޮށްފައެވެ. "ޔޫއޭވީތައް [އަންމޭންޑް އޭރިއަލް ވެހިކަލް ނުވަތަ ޑްރޯން] އެކި ދިމާތަކުން ދިޔައީ ކީވާ ދިމާއަށް ދަތުރު ކުރަމުން. އެ ކަމާ ގުޅިގެން ވައިގެ ޙަމަލާތަކާ ގުޅިގެން އަޅާ އިންޒާރު ތިން ގަޑިއިރަށް ދެމިގެން ދިޔަ،" ޔޫކްރެއިންގެ އަސްކަރިއްޔާގެ އިދާރީ ވެރިޔާ ސަރްހީ ޕޮޕްކޯ ވިދާޅުވިއެވެ. މި ޙަމަލާތަކާ ގުޅޭ ގޮތުން ރަޝިޔާއިން ވަކި އެއްޗެއް ހާމަކޮށްފައެއް ނެތެވެ.
ރަޝިޔާއިން ދާދި ފަހުން ވަނީ، އަޑަށްވުރެ ބާރަށް ދަތުރު ކުރާ ހައިޕަރސޮނިކް މިސައިލެއް ބޭނުން ކޮށްގެން ވެސް ޔޫކްރެއިނަށް ނުރައްކާތެރި ޙަމަލާއެއް ދީފައެވެ. އެ މިސައިލަށް ދީފައިވާ ނަމަކީ އަރިއެޝްނިކެވެ. އެއީ، އެމެރިކާއާއި އިނގިރޭސިވިލާތުން ފޯރުކޮށްދެމުންދާ ދުރު-ރާސްތާ މިސައިލްތައް ބޭނުން ކޮށްގެން ޔޫކްރެއިނުން ރަޝިޔާއަށް ދާދިފަހުން ދީފައިވާ ޙަމަލާތަކުގެ ބަދަލު ހިފުމުގެ ގޮތުން ދީފައިވާ ޙަމަލާތަކެކެވެ.
ރަޝިޔާ-ޔޫކްރެއިން ހަނގުރާމައިގައި، އެމެރިކާއާއި ހުޅަނގުގެ ދިފާޢީ އިއްތިޙާދު (ނޭޓޯ)ން ދަނީ ޔޫކްރެއިނަށް ވާގިވެރިވަމުންނެވެ. އަދި، ޔޫކްރެއިނަށް ބޭނުންވާ ހަތިޔާރާއި އަސްކަރީ އެހީތެރިކަން ފޯރުކޮށްދެމުންނެވެ. މަސްރަޙު ދިރާސާ ކުރާ ފަރާތްތަކުން ޤަބޫލު ކުރާ ގޮތުގައި، މި ހަނގުރާމައަކީ، ޕްރޮކްސީއެއް ނުވަތަ މެދުވެރިއެއްގެ ގޮތުގައި ޔޫކްރެއިން ބޭނުން ކޮށްގެން ނޭޓޯން ރަޝިޔާއާ ދެކޮޅަށް ކުރަމުންދާ ހަނގުރާމައެކެވެ.
އެމެރިކާއިން ޔޫކްރެއިނަށް އެތަކެއް ބިލިޔަން އެމެރިކާ ޑޮލަރުގެ ހަތިޔާރާއި އަސްކަރީ އެހީތެރިކަން ފޯރުކޮށްދެމުން ދިޔަ ނަމަވެސް، ރަޝިޔާގެ ރަށްތަކަށް ޙަމަލާ ދިނުމަށް އެ ހަތިޔާރުތައް ބޭނުން ކުރުން އޮތީ މަނާކޮށްފައެވެ. ނަމަވެސް، އެމެރިކާގެ ރައީސް ޖޯ ބައިޑަން ދާދިފަހުން ވަނީ އެ ކަމުގެ ހުއްދަ ޔޫކްރެއިނަށް ދީފައެވެ. އޭނާ މި ގޮތަށް އަމަލު ކުރައްވާފައި ވަނީ، ނޮވެންބަރު 5ވަނަ ދުވަހު ބޭއްވި ރިޔާސީ އިންތިޚާބުގައި އޭނާގެ ޑިމޮކްރެޓިކް ޕާޓީ އަދި ރިޔާސީ ކެނޑިޑޭޓު، ނައިބު ރައީސާ ކަމަލާ ހެރިސަށް ކުރިމަތިވި ނާކާމިޔާބީއާ ގުޅިގެންނެވެ.
2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހު ފެށި ހަނގުރާމައިގެ ތެރެއިން ރަޝިޔާގެ ފައުޖުތަކުން ވަނީ ޔޫކްރެއިންގެ ބިމުން %18ށް އަތްގަދަ ކޮށްފައެވެ. އޭގެ ތެރޭގައި, އިރުމަތީ ދޮންބާސްގެ %80އާއި, ދެކުނުގައި އޮތް ޒަޕޮރީޜިޔާއާއި ޚަރްސަންގެ %70 ހިމެނެއެވެ. ޔޫކްރެއިންގެ އެންމެ ދެކުނުން އޮތް ކްރައިމިޔާއަށް ރަޝިޔާއިން އަތްގަދަ ކޮށްފައި ވަނީ 2014ވަނަ އަހަރުއެވެ. ރަޝިޔާގެ ހުޅަނގުގައި އޮތް ކޫރްސްކް ސަރަޙައްދަށް އަރައިގަނެ، ޔޫކްރެއިންގެ ސިފައިން ވެސް ވަނީ ރަޝިޔާގެ ބިންތަކަށް ވެރިވެގަންނަވަމުންނެވެ.