ކޮންމެ އަހަރެއްގެވެސް ނަސްރުގެ ދުވަސް ފާހަގަކުރުމަށް ތަފާތު ޙަރަކާތްތަކެއް ކުރިއަތް ގެންދެއެވެ. އެހެންނަމަވެސް މި އަހަރަކީ މި ފަހުގެ އަހަރުތަކުގައި ނަސްރުގެ ދުވަސް މިހާ ކުލަގަދަކޮށް ފާހަގަކުރި ފުރަތަމަ ފަހަރެއެވެ. "ދިވެހި ސިފައިންގެ އަސްކަރީ ހުށަހެޅުން" ނަމުގައި ކުރިއަތް ގެންދިޔަ ހަރަކާތައް އާންމުންގެ ބޮޑު ތަރުހީބެއް ވަނީ ލިބިފައިއެވެ.
"ދިވެހި ސިފައިންގެ އަސްކަރީ ހުށަހެޅުން" ނަމުގައި ކުރިއަަށްދިޔަ ސިފައިންގެ އަސްކަރީ ހުށައެޅުމުގައި ވަނީ ޤައުމުގެ ދިފާޢުގައި ދިވެހި ސިފައިންގެ ޚިދުމަތުގައި ޤާއިމުކޮށްފައިވާ އެކި ވިންގުތަކުގެ އޮޕަރޭޝަންތައް ދައްކާލާފައެވެ. ރެކޯޑްކޮށްފައިވާ މައްޒަރުތައް އަދި ޖުމްހޫރީމައިދާނުގައި ވަގުތުން ގެނެސްދިން މަންޒަރުތަކުގައި ވަނީ، ނިރުބަވެރި ޙާމަލާއެއް ދިވެހި ސިފައިންގެ ޚިދުމަތުުން ރޫޅާލުމުގެ އޮޕަރޭޝަނެއް ރާވާ ކުރިއަށްގެންދާނެ ގޮތް ގެނެސްދީފައެވެ.
މި ޙަރަކާތް ބަލާލުމަށް ޖުމްހޫރީ މައިދާނަށް ދިޔަ މީހުންގެ ތެރޭގައި ކުޑަކުދިން ހިމެނެހެން އެކި އުމުރުފުރާ ތަކުގެ މީހުން ހިމެނެއެވެ.
މި މަންޒަރުތައް އެމްއެންޑީއެފުން ދައްކަމުންދިޔަ ވަގުތު އެތަނަށް އެއްވި މީހުންގެ މޫނުމަތިން މޮޅިވެރިކަމާއި ހިތާމަވެރިކަން ފެނިގެންދިޔައެވެ. އެހެންނަމަވެސް ފަހުވަގުތު ދިވެހި ސިފައިންގެ ޤާބިލުކަން ފެނިގެންދިއުމުން އުފާވެރިކަމާއި ހިނިތުންވުން ގެނުވިއެވެ.
ނޮވެމްބަރު 3ގެ އުދުވާނީ ހަމަލާއަކީ ވަރަށް ގިނަ ބައެއްގެ ހިތުގައި ބިންވަޅު ނެގިފައިވާ ބިރުވެރި ހާދިސާއެކެވެ. އަމިއްލަ ލޮލުން ފެނި ތަޖުރިބާ ކުރި އެތަކެއް ފަރާއްތަކެއް މި އަދުވެސް ދުނިޔޭގައި އެބަތިއްބެވެ. އެހެންނަމަވެސް އަދުގެ ކުޑަކުދިންނަށް މި ދުވަސް ސިފަކުރަން އެހާ ފަސޭހައެއް ނޫނެވެ.
އެހެންނަމަވެސް ނަސްރުގެ ދުވަހުގެ ހަރާކާތްތަކުގެ ތެރެއިން މިއަދު ދައްކާލި މަންޒަރުތަކުން އެ ދުވަހުގެ ބިރުވެރި ހާދިސާ ލޮލައް ސިފަވެގެން ދިޔަ ކަމަށް އެ މަންޒަރު ބަލާލުމަށް އެއްވި މީހުން ވަނީ ބުނެފައެވެ.
"ކުރިން ހަމަ އެކަނި އަޑު އިވެނީ އެ ދުވަހުގެ ވާހަކަ. އެކަމަކު މި މަންޒަރުތައް ފެނި މިހާރު އެ ދުވަހުގެ ބިރުވެރިކަން ހަމަ ސިފަވެގެން ދިޔަކަހަލަ. ވަރަށް ރީތި ވަރަށް ފުރިހަމަ" ކުޑަކުދިން ބުންޏެއެވެ.
ނަޞްރުގެ ދުވަހަކީ 1988 ވަނަ އަހަރުގެ ނޮވެންބަރު މަހުގެ 3 ވަނަ ދުވަހު ދިވެހި 6 ޚާއިނުން ބޭރުގެ ނިރުބަވެރި ޖަމާޢަތަކާ ގުޅިގެން ރާއްޖޭގެ މައްޗަށް އަތްގަދަ ކުރުމަށް ދިން ޢުދުވާނީ ޙަމަލާއިން ދިވެހިންނަށް ނަޞްރު ލިބުނު ދުވަހެވެ. މިޙަމަލާގައި 19 ދިވެހިން ޝަހީދުވިއެވެ. އެއީ ސިފައިންގެ 8 ބޭކަލުންނާއި އާންމު ރައްޔިތުންގެ 11 މީހުންނެވެ.