ޑޮލަރުގެ މައްސަލަ ދިމާވީ މިއަދަކު ނޫން؛ ނަމަވެސް މައްސަލަ ހައްލުކުރާނީ މި ސަރުކާރުން

ރާއްޖެއަށް މިވަގުތު ކުރިމަތިވެފައިވާ ޑޮލަރުގެ ތާށިކަމަކީ އިއްޔެއަކު މިއަދަކު ދިމާވި މައްސަލައެއް ނޫނެވެ. މިއީ މި ވޭތުވެދިޔަ 15 ވަރަކަށް އަހަރުގެ ތެރޭގައި ޑޮލަރުގެ އަގަށް އަންނަމުންދިޔަ ބަދަލުތަކާއެކު ކުރިމަތިވެފައިވާ މައްސަލައެއްކަން އެއީ އެންމެން ދަންނަ ހަގީގަތެކެވެ. ޑޮލަރުގެ އަގު އުފުލެމުން ގޮސް ބޭންކުތަކުން ރައްޔިތުންނަށް ވިއްކާ ޑޮލަރު ލިމިޓް ކުރީ މި ސަރުކާރުން ނޫންކަންވެސް އެއީ އެންމެ ދަންނަ ހަގީގަތެކެވެ.

ރާއްޖެއަކީ ބޭރުން ގެންނަ މުދަލަށް ބަރޯސާވެފައިވާ ގައުމަކަށްވާއިރު، އެ މުދާ ހޯދުމަށްވެސް ވިޔަފާރިވެރިން ބޮޑު އަގުގައި ޑޮލަރު ގަންނަންޖެހުމުން ތަކެތީގެ އަގުވެސް ދިޔައީ ދުވަހެއް ދުވަހަކުން ބޮޑުވަމުންނެވެ. ޑޮލަރު ނުލިބުމުގެ ދަތިކަން އެންމެ ބޮޑަށް ކުރިމަތިވާ ބަޔަކީ އާއްމު ރައްޔިތުންނަށްވާއިރު، އޭގެތެރޭގައި ރާއްޖެއިން ބޭރުން ތަޢުލީމް ޙާޞިލްކުރާ ދަރިވަރުން ހިމެނެއެވެ. އެގޮތުން އެ ދަރިންވަރުންނަށް އެންމެ ގިނަވެގެން މަހެއްގެ މައްޗަށް ނެގޭނީ 750 ޑޮލަރު ކަމުގައި ހަމަޖައްސާފައި އޮތީވެސް ނިމިދިޔަ ސަރުކާރުންނެވެ. އޭރު އޮތް ސަރުކާރުން ވިދާޅުވަމުން ދިޔައީ ދަރިވަރުންނަށް ޑޮލަރު ލިމިޓް ކުރީ ވަގުތީގޮތުންކަމަށާއި، އެކަން ބަދަލު ކުރާނެ ކަމަށެވެ. ނަމަވެސް އެ ސަރުކާރުގެ ވެރިކަން ނިމިގެންދިޔައިރުވެސް ޑޮލަރުގެ މައްސަލައަށް ހައްލެއް ހޯދިފައި ނުވާއިރު، ދޯހަޅި އިގްތިސާދީ ސިޔާސަތުތަކެއްގެ ސަބަބުން އެ މައްސަލަ އޮތީ އިތުރަށް ބޮޑުވެފައެވެ.

ޑޮލަރާއި ގުޅޭގޮތުން ރައްޔިތުންގެ މެދުގައި އޮތް ކަންބޮޑުވުންތަކަށް ހައްލެއް ހޯއްދައިދެއްވާނެކަމަށާއި، އަދި އެކަމަށް ވަށާ ޖެހޭ ހައްލެއް ގެންނަން ކުރައްވާނޭ މަސައްކަތް ތަފްސީލީ ގޮތެއްގައި ރައްޔިތުންނާއި ހިއްސާކުރެއްވީ މިދިޔަ ރިޔާސީ އިންތިހާބުގެ ކެމްޕެއިންގައި ޕީއެންސީގެ ރިޔާސީ ކެންޑިޑޭޓް އަދި އަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ.

މިދިޔަ އަހަރުގެ އޯގަސްޓް މަހުގެ 27 ވަނަ ދުވަހު ގދ. ތިނަދޫގައި ބޭއްވި ޖަލްސާގައި ޑޮލަރުގެ މައްސަލަ ހައްލުކުރައްވަން އެކަށައަޅުއްވާނޭ ސިޔާސަތުތައް ރައީސް މުއިއްޒު ހާމަކޮށްދެއްވިއެވެ. ތިނަދޫގައި ބޭއްވި ޖަލްސާގައި ވާހަކަފުޅުދައްކަވަމުން ރައީސް މުއިއްޒު ވިދާޅުވީ ރާއްޖޭގައި ގިނަ ފަރާތްތަކަކުން އިންވެސްޓްކޮށްފައިވާއިރު، އެ އިންވެސްޓްމަންޓްގެ ދަށުން ލިބޭ ޑޮލަރު ރާއްޖޭގައި ހިފެހެއްޓޭނެ އެއްވެސް ނިޒާމެއް ނެތް ކަމަށެވެ. އެހެންކަމުން އެ މަނިކުފާނު އެދުވަހު ވައުދުވެވަޑައިގެންނެވީ އެކަން ބަދަލުކުރައްވާނެކަމަށެވެ. އަދި އެތައް އަހަރަކުން ކުރިމަތިވި ޑޮލަރުގެ މައްސަލައަށް އެއް ދުވަހުން ހައްލެއް ނުގެނެވޭނެކަމަށާއި، އެކަން ކުރެވޭނީ ހަރުފަތަކަށްފަހު ހަރުފަތެއް ގިރާކޮށްގެންކަންވެސް އެމަނިކުފާނު ފާހަގަކުރެއްވިއެވެ. ނަމަވެސް ދިވެހި ރައްޔިތުންނަަށް ރައީސް މުއިއްޒު ދެއްވި ޔަގީންކަމަކީ އެ އުނދަގޫ މަސައްކަތް ފައްޓަވާނޭކަމުގެ ޔަގީންކަމެވެ.

ރައީސް ވިދާޅުވީ އިންވެސްޓަރުންގެ ޑޮލަރު ވަކި މުއްދަތަކަށް ރާއްޖޭގެ މާލީ ނިޒާމުގައި ދައުރުވާ ގޮތަށް ލާޒިމްކުރާ ގޮތަށް ގާނޫނުތައް އެކަށައަޅުއްވާނެކަމަށެވެ. އަދި އެ ފިޔަވަޅުތަކާއެކު ރާއްޖެއިން ބޭރުގައި ކިޔަވާ ކުދިންނަށް ޑޮލަރު ނެގުމަށް އޮތް ލިމިޓަށް ލުއި ދެއްވަމުން ގޮސް، އެ ލިމިޓް އެއްކޮށް ދޫކޮށްލުމަކީ އެމަނިކުފާނުގެ ރިޔާސީ ވައުދެކެވެ.

ރައީސްގެ ރިޔާސީ ވައުދުތައް ރަނުން ރަނަށް، އަކުރުން އަކުރަށް ފުއްދަވަމުންދާއިރު، ޑޮލަރާއި ގުޅޭގޮތުން ވެވަޑައިގެންނެވި ވައުދުގެ ފުރަތަމަ ހަރުފަތް ގިރާކުރުމުގެ މަސައްކަތް މިހާރު ވަނީ ފައްޓަވާފައެވެ. މިގޮތުން ރާއްޖޭގައި އަމަލުކުރަމުންދާ ބޭރު ފައިސާގެ ޤަވާއިދަށް ވަނީ މުހިއްމު ބަދަލުތަކެއް ގެންނަވާފައެވެ. އެ ބަދަލުތަކާއެކު ރާއްޖެއަށް އެންމެ ގިނައިން ބޭރު ފައިސާ ލިބޭ ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތަކަށް ލިބޭ އާމްދަނީ ރާއްޖޭގެ ބޭންކުތަކަށް ޖަމާކުރަން ވަނީ މަޖުބޫރުކޮށްފައެވެ.

މަރުކަޒީގެ ބޭންކުގެ ޤަވާދަށް ގެނައި ބަދަލު ތަންފީޒުވާން ފަށާނީ އަންނަ އަހަރު ޖެނުއަރީ މަހުގެ 28 ވަނަ ދުވަހުއެވެ. ނަމަވެސް މި ބަދަލުތަކުގެ ހެޔޮ އަސަރުތައް މިހާރުވެސް ފެންނަން ފަށާފައެވެ. މިކަމުގެ އެއް ހެއްކަކީ، ބޭންކް އޮފް މޯލްޑިވްސްގެ ރުފިޔާ އެކައުންޓުން ދަރިވަރުންނަށް ޑޮލަރު ނެގޭ މިންވަރު ވަނީ ބޮޑު ކޮށްދެއްވާފައެވެ. ނިމިދިޔަ ސަރުކާރުން ކަނޑައަޅާފައިވާ 750 ޑޮލަރުގެ ލިމިޓް ރައީސް މުއިއްޒުގެ ސަރުކާރުން ވަނީ 1200 އަށް ބޮޑުކޮށްދެއްވާފައެވެ. ބެންކުން ގެނައި މި ބަދަލަށް ސަރުކާރުން މަރުހަބާ ދަންނަވާފައިވާއިރު، ބޭރުގައި ދިރިއުޅެމުންދާ ދިވެހި ދަރިވަރުންވެސް ދަނީ މިއީ ވަރަށް ބޮޑު ފަސޭހައެއްކަމަށް ބުނެ ޝުކުރުވެރިކަމާއެކު އެކަން ފާހަގަކުރަމުންނެވެ.

ދައުލަތުގެ މާލީ ނިޒާމު ހަރުދަނާ ކުރުމަށް ސަރުކާރުން ގިނަ މަސައްކަތްތަކެއް ކުރަމުންދާއިރު، މިފަދަ ބަދަލުތަކަކީ އެއްފަހަރާ ގެނެވޭނެ ބަދަލުތަކެއް ނޫންކަން އަޅުގަނޑުމެން ޤަބޫލުކުރަންޖެހެއެވެ. ނަމަވެސް މިއަދު ފެންނަމުންދާ ހަގީގަތަކީ އެތައް ޒަމާނެއް ވަންދެން ތަންފީޒުކުރަމުންދިޔަ ދޯހަޅި ސިޔާސަތުތަކެއްގެ ސަބަބުން ކުރިމަތިވެފައިވާ މައްސަލައަށް ވަށާޖެހޭ ހައްލެއް ހޯއްދަވަން މިސަރުކާރުން މަސައްކަތްކުރާކަމެވެ. އުނދަގޫ މަސައްކަތެއްނަމަވެސް، ދިވެހި ރައްޔިތުންގެ ހައްގުގައި ސަރުކާރުން އެ މަސައްކަތް ކުރައްވަމުން ގެންދަވަނީ އެއްވެސް ސިނާއަތަކަށް، ހާއްސަކޮށް ފަތުރުވެރިކަމުގެ ސިނާއަތަށް އެކަމުގެ ގެއްލުން ނުވާނޭ ގޮތަށް ބައްލަވައިގެންނެެވެ. ފަތުރުވެެރިކަމުގެ ސިނާއަތުގެ އެންމެ ތަޖުރިބާކާރު ބޭފުޅުން ސަރުކާރުން އަޅުއްވަމުން ގެންދަވާ ފިޔަވަޅުތައް ބަލައިގަނެ، އެކަމަށް މަރުހަބާ ކިޔުމަކީ އެކަމުގެ ހެއްކެއްކަން ޔަގީނެވެ.