ބަޖެޓާއި ގުޅޭގޮތުން ހަޤީގަތާއި ޚިލާފު ވާހަކަދައްކަނީ ސިޔާސީ މަންފާއަށް: ސަރުކާރުގެ މެމްބަރުން

ސަރުކާރުން ހުށަހަޅާފައިވާ ސަޕްލިމެންޓްރީ ބަޖެޓާއި ގުޅޭގޮތުން އިދިކޮޅު ފަރާތްތަކުން ހަޤީގަތާއި ޚިލާފަށް ވާހަކަދައްކަނީ ސިޔާސީ މަންފާއަށްކަމަށް ސަރުކާރަށް ނިސްބަތްވާ ރައްޔިތުންގެ މަޖިލީހުގެ މެމްބަރުން ވިދާޅުވެއްޖެއެވެ.

އެ މެމްބަރުން މިކަން ފާހަގަކުރެއްވީ ސަރުކާރުން ހުށަހަޅާފައިވާ ސަޕްލިމެންޓްރީ ބަޖެޓުގެ ބަހުސްގައި ދެއްކެވި ވާހަކަފުޅުގައެވެ.

ސަރުކާރުން ހުށަހަޅާފައިވާ 5.1 ބިލިއަން ރުފިޔާގެ ސަޕްލިމެންޓްރީ ބަޖެޓުގެ ބަހުސްކުރިއަށްދިޔައިރު، ސަރުކާރު ހިންގާ މައި ޕާޓީ އަދި މަޖިލީހުގެ މެޖޯރިޓީ އޮތް ޕީއެންސީގެ މެމްބަރުން އެންމެ ބޮޑަށް ފާހަގަކުރެއްވީ ނިމިދިޔަ އެމްޑީޕީގެ މެޖޯރިޓީ އޮތް މަޖިލީހުން މިއަހަރަށް ބަޖެޓް ފާސްކުރިއިރު ޒިންމާދާރުކަން ގެންގުޅުއްވާފައިނުވާ މައްސަލައެވެ. އެގޮތުން މިއަހަރަށް ބަޖެޓް ފާސްކޮށްފައި އޮތީ އެންމެ ރަނގަޅަށްތޯވެސް މެމްބަރުން ސުވާލު އުފެއްދެވިއެވެ. އަދި އެކަންކަން ފޮރުވުމަށް މިއަދު ރައްޔިތުންނަށް އޮޅުވާލުމަށް އިދިކޮޅު ފަރާތްތަކުން މަސައްކަތްކުރާކަމަށް ޕީއެންސީގެ މެމްބަރުން ވިދާޅުވިއެވެ.

"2023 ވަނަ އަހަރު ފާސްކުރެވުނު 2024 ވަނަ އަހަރުގެ ބަޖެޓު، ފާސްކުރެވިފައިވާ އޮތީ ރަންގަޅަށްތޯ އެބަ ބަލާލަން ޖެހޭ. 2000 އެތައް ޕްރޮޖެކެޓެއް ހިންގާއިރު އެވަރަށް ބަޖެޓު ކަނޑައެޅިފައި އޮތްތޯ އަޅުގަނޑުމެން ސުވާލު އުފައްދަން ޖެހޭ" ތިނަދޫ އުތުރު ދައިރާގެ މެންބަރު ސައުދުﷲ ހިލްމީ ވިދާޅުވިއެވެ.

ސަރުކާރަށް ނިސްބަތްވާ މެމްބަރުން ވިދާޅުވީ ބަޖެޓާއި ގުޅޭގޮތުން ކަންކަން އޮޅުވާލުމަށް އިދިކޮޅު ފަރާތްތަކުން މަސައްކަތްކުރަމުންދަނީ ސިިޔާސީ މަންފާތަކެއް ހާސިލުކުރުމަށްކަމަށެވެ.

"ސިޔާސީ މަންފާތަކެއް ހާސިލްކުރުމަށް މިތަނަށް، ލިބޭ ފުރުސަތުތެރޭގައި ދައްކަމުންދާ ޢައިރު ޒިންމާދާރު ވާހަކަތަކަކީ މިއަދު އެއަށްވުރެ ބޮޑަށް ދިވެހިރާއްޖެ ރައްޔިތުން [އެކަންތައް] ބަލާ ސާފުކުރޭ" ވިލިމާލެ ދާއިރާގެ މެންބަރު މުހައްމަދު އިސްމާޢިލް ވިދާޅުވިއެވެ.

މަޖިލީހުގެ މެމްބަރުން ފާހަގަކުރެއްވި ގޮތުގައި މިއަހަރަށް ބަޖެޓް ހަދާފައި އޮތީ އެމްޑީޕީ ސަރުކާރުން ނަގާފައިވާ ދަރަނިތައް ދެއްކުމަށްކަމަށެވެ. އަދި މިއަހަރަށް ފާސްކުރި ބަޖެޓުން ޚަރަދުތައް ހަމަޖައްސަން ދަތިތައް ދިމާވީ ކުރީ ސަރުކާރުން ނުދައްކާ އޮތް އެތައް ބިލިއަން ރުފިޔާއެއްގެ ބިލުތައް މި ސަރުކާރަށް ދައްކަންޖެހުމުންކަންވެސް މެމްބަަރުން ފާހަގަކުރެއްވިއެވެ.

"މެންބަރުން އެބަ ބުނޭ، 37 ޕަސަންޓް ދަރަނިވެރިވެފައޭ. ކިހިނެތްތޯ މިވަނީ. ވޭތުވެދިޔަ ސަރުކާރުން 10 ބިލިޔަން ރުފިޔާގެ ޕެންޑިން ބިލްތައް ބާއްވާފަ ދިޔައީ " ހޯރަފުށީ ދާއިރާގެ މެންބަރު އަލީ މޫސާ ވިދާޅުވިއެވެ.

ބައެއް މެމްބަރުން ވަނީ ނިމިދިޔަ ސަރުކާރުން މިދިޔަ އަހަރު ސަޕްލިމެންޓްރީ ބަޖެޓެއް ފާސްކުރީ ޤާނޫނާއި ހިލާފަށްކަން ފާހަގަކުރައްވާފައެވެ. ނަމަވެސް މި ސަރުކާރުން ކަންކަން ކުރަމުންދާނީ ޤާނޫނާއި ޤަވާއިދުތަކުގެ ތެރެއިންކަންވެސް މެމްބަރުން ވިދާޅުވިއެވެ.

މެމްބަރުން ފާހަގަކުރެއްވި ގޮތުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުން ރައްޔިތުންނަށް ކަންކަން ކޮށްދޭން މަސައްކަތްކުރާ މަންޒަރު މިއަދު ރައްޔިތުންނަށް ފެންނަމުންދާކަމަށެވެ. އަދި އެއީ އިދިކޮޅު ފަރާތްތަކަށް ބަލަން ފަސޭޙަ މަންޒަރެއް ނޫންކަމަށްވެސް ސަރުކާރަށް ތާޢީދުކުރައްވާ މެމްބަރުން ފާހަގަކުރެއްވިއެވެ.

ސަރުކާރުގެ ފަރާތުން ރައްޔިތުންގެ މަޖިލީހަށް 5.1 ބިލިއަން ރުފިޔާގެ ސަޕްލިމެންޓްރީ ބަޖެޓެއް ހުށަހެޅީ ނިމިދިޔަ އެމްޑީޕީގެ ސަރުކާރުން މިއަހަރަށް ފާސްކޮށްފައި އޮތް ބަޖެޓުން ޙަރަދުތައް ހަމަޖައްސަން ދަތިވުމުންނެވެ. މީގެއިތުރުން އެ ބަޖެޓުގައި ރައްޔިތުންނަށް ބޭނުންވާ މުހިއްމު މަޝްރޫޢުތައް ހިންގުމަށް ބޭނުންވާ ފައިސާވެސް ހިމަނާފައެއްނުވާކަމަށް ސަރުކާރުން ވިދާޅުވެއެވެ.