ހިންގުން ހަރުދަނާ ކުރުމަށް ތަފާސްހިސާބު ބޭނުންކުރުން މިހާރަށްވުރެ އިތުރުކުރަންޖެހޭ: ވަޒީރު ޑރ. ހައިދަރު

އަދުގެ ޒުވާންޖީލަކީ ޑޭޓާ ދެނެގަނެ އޭގެ ބޭނުންކުރުމަށް އާދަ ވެފައިވާ، ތަރައްޤީ އަށް ކުރިމަތިވާ ގޮންޖެހުން ތަކަށް ޒަމާނީ ފަންނިއްޔާތުގެ އެހީގައި އީޖާދީ ހައްލުތަކެއް ހޯދާ ބަޔަކަށް ހެދުމަށް މަސަކަތްކުރަންޖެހޭކަމަށް ގެދޮރުވެރިކަމާ ބިމާ ޢުމްރާނީ ތަރައްޤީއާއި ބެހޭ ވަޒީރު ޑރ. އަލީ ހައިދަރު އަޙުމަދު ވިދާޅުވެއްޖެއެވެ.

ވަޒީރު މިހެން ވިދާޅުވީ ޤައުމީ ތަފާސްހިސާބުގެ ދުވަސް ފާހަގަކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

ގެދޮރުވެރިކަމާ ބިމާ ޢުމްރާނީ ތަރައްޤީއާއި ބެހޭ ވަޒީރު ވިދާޅުވީ ދިވެހިރާއްޖޭގެ ތަފާސްހިސާބުގެ ނިޒާމަކީ ލާމަރުކަޒީ ނިޒާމެއްކަމުން، ޒަމާނީ ފަންނިއްޔާތު ގެ އެހީގައި މިނިޒާމު އިތުރަށް ފުރިހަމަކޮށް، ނެގޭ މަޢުލޫމާތުތަކުގެ އަލީގައި ސިޔާސަތުތައް ބައްޓަންކޮށް، ރާއްޖޭގެ ތަރައްޤީއަށް ދިމާވާ ގޮންޖެހުތަކަށް އަވަސް ހައްލުތަކެއް ގެނައުމުގެ މަސައްކަތް ހަލުވިކުރަންޖެހޭކަމަށެވެ. އެގޮތުން ދައުލަތުގެ ހުރިހާ އިދާރާތަކަކުންވެސް އެއިދާރާއެއްގެ ތެރެއިން އެކުލަވާލެވޭ ތަފާސްހިސާބު ރަނގަޅަށް ބެލެހެއްޓުމުގެ މުހިއްމުކަން ވަރަށް ބޮޑުކަމަށް ވަޒީރު ވިދާޅުވިއެވެ.

ހަމައެކާއެކު ޤައުމުގެ ކުރިއެރުމަށްޓަކައި އިދާރާތަކާއި ކައުންސިލްތަކުގައި ހަރަކާތްތެރިވާ އެންމެންވެސް ތަފާސްހިސާބަށް އަހުލުވެރި ކުރެވި، ކަންކަން ނިންމުމުގަޔާއި އިދާރާތަކުގެ ހިންގުން ހަރުދަނާ ކުރުމަށް، ތަފާސްހިސާބު ބޭނުންކުރާ މިންވަރު މިހާރަށްވުރެ އިތުރުކުރަންޖެހޭކަމަށްވެސް ވަޒީރު ވިދާޅުވިއެވެ.

މި އެއްކުރާ މަޢުލޫމާތަކީ ފަސޭހަކޮށް ލިބެން ހުންނަ މަޢުލޫމަތަށް ހެދުމަކީ މޯލްޑީވްސް ބިއުރޯ އޮފް ސްޓެޓިސްޓިކްސްގެވެސް އެންމެ ބޮޑު އަމާޒުކަމަށް ވަޒީރު ވަނީ ވިދާޅުވެއެވެ. ތަފާސް ހިސާބު އެއްކުރުމުގެ މަސައްކަތުގައި ސަރުކާރުން ދޭންޖެހޭ އެހީވެސް ފުރިހަމައަށް ދެމުންދާކަމަށް ޑރ.އަލީ ހައިދަރު އަޙުމަދު ވިދާޅުވިއެވެ.

"ރާއްޖޭގެ ތަފާސްހިސާބުގެ ދާއިރާގެ ދުރުރާސްތާ ގެ ތަސައްވަރު، އެން.އެސް.ޑީ.އެސް 2021-2030ގެ އަމާޒުތަކަށް ވާސިލްވުމަށްޓަކާ ދައުލަތުގެ ތަފާސްހިސާބުގެ މަސައްކަތްކުރާ އިދާރާތައް ގުޅިގެން، މިއަހަރު ވަނީ ސެކްޓޯރަލް އެކްޝަން ޕްލޭން އެއް 2025 އިން 2027 އަށް އެކުލަވާލާ ދައުލަތުގެ ބަޖެޓަށް ހުށަހެޅިފައި" ގެދޮރުވެރިކަމާއި ބިމާ އުމްރާނީ ތަރައްޤީއާއި ބެހޭ ވަޒީރު އަލީ ހައިދަރު އަހުމަދު ވިދާޅުވިއެވެ.

މިއަހަރަކީ ޤައުމީ ފެންވަރެއްގައި ތަފާސްހިސާބުގެ ދުވަސް ފާހަގަކުރެވޭ ތިންވަނަ އަހަރެވެ. މިއަހަރުގެ ޝިޢާރަކީ "ސްޓެޓިސްޓިކްސް ފޯ އެން އިންޓެލިޖަންސް ޑްރިވަން ފިއުޗަރ" މިޝިޢާރު ބިނާވަނީ މިދިޔަމަހު ނިޔުޔޯކުގައި އދ އިން ބޭއްވި ސަމިޓް އޮފް ދަ ފިއުޗަރގައި ދިވެހިރާއްޖޭގެ އިވެންޓް "ވިޝަން ފޯ އެން އިންޓެލިޖަންސް ޑްރިވަން ފިއުޗަރ އޮފް މޯލްޑިވްސް" ގައި ރައީސުލްޖުމްހޫރިއްޔާ ހިއްސާކުރެއްވި ޤައުމީ ތަސައްވުރުގެ މައްޗަށްކަމަށް ވަޒީރު ހައިދަރު ވިދާޅުވިއެވެ.

ވަޒީރު ވިދާޅުވީ މި އަމާޒާ އެއްގޮތަށް މަސައްކަތް ކުރެވިއްޖެނަމަ، ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލުކުރުމަށް 2030އަށް ކަނޑައަޅާފައިވާ ލަނޑުދަނޑިތައް ހާސިލުކުރުމުގައިވެސް އެއްކުރާ މަޢުލޫމާތު މުހިންމު ދައުރެއް އަދާކުރާކަމަށެވެ. މިއަދު ވަނީ ރާއްޖޭގައި ދިރާސާކޮށް މަޢުލޫމާތު އެއްކުރުން ފުޅާކުރުމަށް "ބިގްޑޭޓާ ޤައުމީ ދިރާސާ" އިފްތިތާޙުކޮށްފައެވެ.

މިއީ ޒާމާނީ ގޮތްތައް ބޭނުންކޮށްގެން މަޢުލޫމާތު އެއްކުރާ ދިރާސީ ނިޒާމެކެވެ. މީގެދަށުން ޤައުމުތަކުގެ ތަފާސްހިސާބުގެ ޤާނޫނުތައް ޒަމާނީކޮށް ފަރުދީ ޑޭޓާގެ ސިއްރުހިފެހެއް ޓުން ހަރުދަނާކުރުމާއި، ބިގްޑޭޓާ، ސިޓިޒަން ސައިންސް ފަދަ ޑޭޓާ ބޭނުންކުރުމާއި އިދާރީ ތަފާސްހިސާބާއި ރެޖިސްޓަރ ބޭސްޑް ޑޭޓާ ބޭނުންކުރުމަށް މަގުފަހިވާގޮތަށް ޑޭޓާ ސްޓޭންޑަރޑްސްތައް އިސްލާހުކުރާނެއެވެ. އަދި 2040ވަނަ އަރަށް ދާއިރު ރާއްޖެއަކީ ތަރައްޤީވެފައިވާ ޤައުމަކަށް ހެދުމަށް ރައީސުލްޖުމްހޫރިއްޔާ ގެންގުޅުއްވާ ތަޞައްވުރަށް ވާސިލުވުމަށްވެސް ބޮޑު އެހީއަކަށްވެގެންދާނެއެވެ.

މީގެއިތުރުންވެސް މަޢުލޫމާތު އެއްކުރުމުގެ ދާއިރާ ހަރުދަނާކުރުމަށް އެމްބީއެސްއިން ކުރަމުންދާ މަސައްކަތްތައް ވަޒީރު ވަނީ ފާހަގަކުރައްވާފައެވެ.