އީސީގެ ދެ މެންބަރުން މަޤާމުން ވަކިކުރުމުން އެ ދެ މާޤާމަށް ކުރިމަތިލުމަށް ހުޅުވާލައިފި

އިލެކްޝަންސް ކޮމިޝަނުން ހުސްވެފައިވާ މެންބަރުކަމުގެ މަޤާމަށް ކުރިމަތިލުމަށް ރައީސުލްޖުމްހޫރިއްޔާގެ އޮފީހުން ހުޅުވާލައިފިއެވެ.

އިލެކްޝަން ކޮމިޝަނުގެ 5 މެންބަރުންގެ ތެރެއިން މިވަގުތު ދެ މެންބަރެއްގެ މަޤާމު ހުސްވެފައިވަނީ، އެ ކޮމިޝަނުގެ ނައިބު ރައީސް ޢަލީ ނަޝާތާއި، ކޮމިޝަންގެ މެންބަރު މުޙައްމަދު އާސިފް މަޤާމުން ވަކިކުރުމަށް ރައްޔިތުންގެ މަޖިލީހުން ފާސްކުރުމާއި ގުޅިގެންނެވެ.

އިލެކްޝަންސް ކޮމިޝަންގެ މެންބަރުކަމަށް އެދި ހުށަހެޅުމުގެ ފުރުޞަތު ހުޅުވާލާފައިވަނީ އަންނަ ހަފްތާގެ ބުރާސްފަތި ދުވަހުގެ ނިޔަލަށެވެ. އިލެކްޝަންސް ކޮމިޝަންގެ މެންބަރުކަމަށް ކުރިމަތިލުމަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައިވަނީ، ރަސްމީ ބަންދު ދުވަސްތައް ފިޔަވައި، އެހެން ދުވަސްދުވަހު ހެނދުނު 08:30 އިން 12:00 އަށް ރައީސުލްޖުމްހޫރިއްޔާގެ އޮފީހުންނެވެ.

އިލެކްޝަން ކޮމިޝަނަށް ދެ މެންބަރުން ހޯދަން އިއުލާންކޮށްފައިވާއިރު، ކޮމިޝަންގެ 5 މެންބަރުންގެ ތެރެއިން މިވަގުތު ތިބީ ދެ މެންބަރުންނެވެ.

އިލެކްޝަންސް ކޮމިޝަނަށް މެންބަރުން ހޯދުމަށް އިއުލާންކޮށްފައިވާއިރު، ދާދިފަހުން އެކޮމިޝަނުގެ ޤާނޫނަށް ވަނީ އިސްލާހުވެސް ގެނެސްފައެވެ. އެގޮތުން ގެނައި އިސްލާހުގައިވަނީ އެކޮމިޝަނުގެ ރައީސް އާއި ނައިބު ރައީސް އައްޔަން ކުރާނީ ކޮމިޝަނުގެ މެންބަރުންގެ ތެރެއިން ރައީސުލްޖުމްހޫރިއްޔާ ކަމަށްވަނީ ކަނޑައަޅާފައެވެ. މީގެ ކުރިން އެ ކޮމިޝަނުގެ ރައީސާއި ނައިބު ރައީސް ހޮވަމުން އައީ މެންބަރުންގެ މެދުގައި ނަގާ ވޯޓަކުންނެވެ.