މާލެ ސަރަޙައްދުން މިހާތަނަށް 47 ކެމިކަލް ގުދަނަކާއި، ކެމިކަލް ވިއްކާ 24 ފިހާރައެއް ބަލައި ފާސްކޮށްފި
-
މީހުން ދިރިއުޅޭ 382 ތަނެއް ވަނީ ބަލައި ފާސްކޮށްފައި
-
އޮޕަރޭޝަން ކުރިއަށްދަނީ މާލެ ސަރަހައްދު 10 ޒޯނަކަށް ބަހާލައިގެން
ކެމިކަލް ރައްކާކުރާ ތަންތަން ބަލައި ފާސްކުރުމަށް ކުރިއަށްގެންދާ "އޮޕަރޭޝަން ހިރާސް ފާސް"ގެ ދަށުން މިހާތަނަށް މާލެ ސަރަހައްދުން 47 ކެމިކަލް ގުދަނަކާއި، ކެމިކަލް ވިއްކާ 24 ފިހާރައެއް ބަލާ ފާސްކޮށްފައިވާކަމަށް ދިފާޢީ ވުޒާރާއިން ވިދާޅުވެއްޖެއެވެ.
އޮޕަރޭޝަން ހިރާސް ފާސް ކުރިއަށްގެންދަނީ މާލެ ސަރަހައްދު 10 ޒޯނަކަށް ބަހާލައިގެންނެވެ. އެގޮތުން މާލޭގެ އެކި ސަރަހައްދުތަކުގައި ފަޔަރ އެންޑް ރެސްކިޔު ސަރވިސަސްގެ ސިފައިންނާއި ދިވެހި ފުލުހުން ދަނީ ހަރަކާތްތެރިވަމުންނެވެ.
ދިފާޢީ ވުޒާރާއިން ޢާންމު ކޮށްފައިވާ އެންމެ ފަހުގެ މަޢުލޫމާތުގައިވާ ގޮތުން މި އޮޕަރޭޝަންގެ ދަށުން މިހާތަނަށް 47 ގުދަނަކާއި، ކެމިކަލް ވިއްކާ 24 ފިހާރައެއްގެ އިތުރުން، މީހުން ދިރިއުޅޭ 382 ތަނެއް ވަނީ ބަލައި ފާސްކޮށްފައެވެ.
މާލެ ސަރަހައްދުގައި ހުއްދަ ދީފައިވާ 285 ގުދަނެއް ހުރެއެވެ. މީގެ ތެރޭގައި ހިމެނެނީ މާލޭގައިހުރި 77 ގުދަނަކާއި، ހުޅުމާލޭގައި ހުރި 36 ގުދަނަކާއި ތިލަފުށީގައި ހުރި 172 ގުދަނެކެވެ. އޮޕަރޭޝަން ހިރާސް ފާސްގެ ދަށުން އެމްއެންޑީއެފުންދަނީ މި ތަންތަނުގައި އަލިފާން ނިއްވޭނެ ރަނގަޅު ގޮތެއް ހުރިތޯ ކަށަވަރުކުރަމުންނެވެ.
މި އޮޕަރޭޝަން ކުރިއަށްދާނީ މިމަހުގެ 1 އިން 15 ގެ ނިޔަލަށެވެ. މި އޮޕަރޭޝަނުގައި ފަޔަރ އެންޑް ރެސްކިޔު ސަރވިސަސްގެ އިތުރުން ދިވެހި ފުލުހުންގެ ޚިދުމަތާއި އެމްއެންޑީއެފް މާލޭ އޭރިއާ ކޮމާންޑާއި ދައުލަތުގެ 6 މުއައްސަސާއެއް ބައިވެރިވެއެވެ.
ދިފާޢީ ވުޒާރާއިން މަޢުލޫމާތު ދެއްވާގޮތުގައި ހިރާސް ފާސް އޮޕަރޭޝަންގެ ދަށުން ކެމިކަލް ރައްކާކޮށްފައި ހުރި ގުދަންތަކާއި، އޭގެ ވިޔަފާރިކުރަމުންދާ ތަންތަނުގެ ޑޭޓާބޭސްއެއް އެކުލަވާލެވޭނެއެވެ. އަދި އޭގައި ހިމެނޭ މަޢުލޫމާތުތައް ކަމާބެހޭ މުއައްސަސާތަކަށް ޙިއްސާކުރެވޭނެކަމަށް ދިފާޢީ ވުޒާރާއިން ވިދާޅުވެއެވެ. ހަމައެހެންމެ ގަވާއިދާ ޚިލާފަށް ކެމިކަލްގެ ވިޔަފާރިކުރަމުންދާ ތަންތަނާމެދު ފިޔަވަޅު އެޅޭނެކަމަށްވެސް ވުޒާރާއިން ވިދާޅުވެއެވެ.