ބޮޑެތި މަޝްރޫޢުތައް ފެށުމުގެ ތައްޔާރީތައް މިހާރުވެސް ހިނގަމުންއެބަދޭ: ރައީސް

ބޮޑެތި މަޝްރޫޢުތައް ފެށުމަށް ވާންޖެހޭ ތައްޔާރީތައް ހިނގަމުންދާކަމަށާއި، ރަނގަޅު ބިންގަލެއްގައި ކުރެވޭ މެދު ރާސްތާއާއި ދުރު ރާސްތާގެ ދެމެހެއްޓެނިވި ތަރައްޤީ ދިވެހިންނަށް ފެނިގެންދާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ސަންގު ޓީވީއަށް ދެއްވި ޚާއްސަ ބަސްދީގަތުމެއްގައެވެ.

ރާއްޖޭގެ އިޤްތިޞާދީ ހާލަތާ ގުޅޭގޮތުން ރައީސުލްޖުމްހޫރިއްޔާ ވިދާޅުވީ އިޤްތިޞާދު ހަރުދަނާ ކުރުމުގެ މަސައްކަތް ކުރައްވަމުން ގެންދަވާކަމަށާއި އެމަސައްކަތް ފަށާފައިވަނީ ރަނގަޅު ބިންގަލެއްގައި ކަމަށެވެ. އެގޮތުން، ފައިސާ ޗާޕުކުރުން މިހާރު ހުއްޓާލާފައިވާއިރު ރާއްޖޭގެ އިޤްތިޞާދުގައި ދަުރުކުރާ މިންވަރު އިތުރުކުރުމަށް މަސައްކަތް ކުރައްވަމުންގެންދަވާ ކަމަށް ރައީސް ވިދާޅުވިއެވެ.

"ޑޮލަރު އަޅުގަނޑުމެން ތެރޭގައި އިތުރު ކުރުމަށްޓަކައި ބައިވަރު ބަދަލުތައް މި ގެންނަނީ، ޤާނޫނީ ބަދަލުތަކާ، ނިޒާމީ ބަދަލުތަކާ މިގެންނަނީ. އިރާދަކުރެއްވިއްޔާ ކުރިއަށް އޮތް ތަނުގައި އަޅުގަނޑުމެންގެ ރިޒާވްވެސް ވަރުގަދަ ވާނެ. އަޅުގަނޑުމެންގެ މަސައްކަތްތެރީންނަށް، ކުންފުނިތަކަށް، ކުދި މެދު ފަންތީގެ ވިޔަފާރިތަކަށް، ދޭން ހުރި ފައިސާވެސް އިރާދަކުރެއްވިއްޔާ ކުރިޔަށް އޮތް ދެމަސް ތެރޭގައި ހަމަ ދެމުންދެމުން ދާނީ،" ރައީސް ވިދާޅުވިއެވެ.

ރައީސް ވިދާޅުވީ އެމަނިކުފާނުގެ ވިސްނުންފުޅުހުރީ އަންނަ ނޮވެމްބަރު މަސް ނިމެންވާއިރަށް މިހާރު އެކި ފަރާތްތަކަށް ނުދެވި ހުރި ފައިސާދިނުން ކަމަށެވެ. އެގޮތުން، މަސްވެރިންނަށްވެސް ބިލިއަނެއްހާ ރުފިޔާ ދެވިއްޖެ ކަމަށާއި މަސްވެރިކަން އިތުރަށް ފުޅާކުރުމަށް ފެކްޓްރީތައް ހެދުމުގެ މަސައްކަތްތައް ރޭވި، އިޤްތިޞާދު ރަނގަޅުވަމުންދާކަމަށް ރައީސް ވިދާޅުވިއެވެ.

ޗައިނާއާއި އިންޑިއާ ފަދަ ޤައުމުތަކުން މާލީ އަދި އިޤްތިޞާދީ ހަމަޖެހުމަށް ބޭނުންވާ އެކި ފުރުޞަތުތައް ފަހިވަމުންދާކަން ފާހަގަކުރައްވައި ރައީސް ޑރ. މުޢިއްޒު ވިދާޅުވީ، ބޮޑެތި މަޝްރޫޢުތައް ފެށުމުގެ ކުރީން ވާންޖެހޭ ތައްޔާރީތައް ފަރުދާގެ ފަހަތުގައި ހަލުވިކަމާއެކު ހިނގަމުންދާ ކަމަށެވެ. އަދި ބޭރު ޤައުމުތަކަށް ކުރެއްވި ދަތުރުފުޅުތަކުގެ ނަތީޖާއެއްގެ ގޮތުން ރާއްޖެއަށް ގިނަ ކަންތައްތައް ހަމަޖެހިފައިވާކަމަށްވެސް ވިދާޅުވިއެވެ.