ސްމާޓް މީޓަރާއެކު ކަރަންޓް ބިލު ބޮޑުވުމުގެ ޝަކުވާތަކަށް ހައްލެއް ލިބޭނެ: މުޢާޒު

ސްމާޓް މީޓަރާއެކު ކަރަންޓް ބިލު ބޮޑުވެގެން ކުރިމަތިވާ ޝަކުވާތަކަށް ހައްލެއް ލިބިގެންދާނެކަމަށް ފެނަކަ ކޯފަރޭޝަންގެ މެނޭޖިންގ ޑިރެކްޓަރ މުއާޒް މުޙައްމަދު ރަޝީދު ވިދާޅުވެއްޖެއެވެ.

މުއާޒު މިހެން ވިދާޅުވީ، ފެނަކަ ސްމާޓް މީޓަރ ޕްރޮޖެކްޓްގެ ދަށުން ދ. ކުޑަހުވަދޫގެ ހުރިހާ ގޭބީސީއެއްގައި ސްމާޓް މީޓަރު ހަރުކޮށް ނިންމުމުގެ ރަސްމިއްޔާތުގައި ވާހަކަދައްކަވަމުންނެވެ.

ފެނަކަ ކޯފަރޭޝަންގެ މެނޭޖިންގ ޑިރެކްޓަރ މުއާޒް މުޙައްމަދު ރަޝީދު ވިދާޅުވީ، ކަރަންޓް ބިލު ބޮޑުވުމުގެ ޝަކުވާއަކީ ކޮންމެ މަހެއް ނިމުމުންވެސް ރައްޔިތުންގެ ފަރާތުން އަންނަ ޝަކުވާއެއްކަމަށެވެ. ނަމަވެސް ސްމާޓް މީޓަރާއެކު މިކަމަށް ހައްލެއް ލިބިގެންދާނެކަމަށާއި އެއީ ސްމާޓް މީޓަރުން ކަރަންޓް ބޭނުންކުރެވޭ މިންވަރު ކޮންމެ ދުވަހަކުވެސް ބަލާލެވޭތީކަމަށް މުއާޒު ވިދާޅުވިއެވެ.

"އަޅުގަނޑުމެން ކަންބޮޑުވާ ކަމެއް ރައްޔިތުންގެ ފަރާތުން ކަރަންޓް ބިލް ބޮޑުވުމުގެ ޝަކުވާ އައުމަކީ. މިޝަކުވާއަށް ނިމުމެއް ނޫނިއްޔާ ކޮންމެވެސް މިންވަރެއްގެ ތަސައްލީއެއް ރައްޔިތުންނަށް ލިބިގެންދާނެ މި ސްމާޓް މީޓަރ ޕްރޮޖެކްޓްގެ ސަބަބުން. ކަރަންޓް ބޭނުންކުރެވޭ މިންވަރު މިހާރު މި އެނގެނީ މަސް ނިމި ބިލް އަތައް އައުމުން. ދެން ރައްޔިތުން މި ޝަކުވާ ކުރަނީ ތިމަންނަމެން ބޭނުންކުރި މިންވަރެއް ނޫނޭ މިއީ. ނުވަތަ ތިމަންނަމެން ގޭގައި އިތުރު އެއްވެސް އެއްޗެއް އިތުރެއް ނުކުރަމޭ. އެކަމަކު މިކަން ރައްޔިތުންނަށް މި އެނގެނީ އަނެއްކާވެސް ބިލް އައީމަ. މި ޝަކުވާ ރައްޔިތުން ކުރަން މިފަށަނީ އެހިސާބުން. އެހެންނަމަވެސް މިހާރު މި ޕްރޮޖެކްޓްގެ ސަބަބުން ކޮންމެ ދުވަހަކު އޭގެ ކުރީދުވަހު ބޭނުންކުރެވުނު ކަރަންޓްގެ ތަފްސީލް ކޮންމެ މީހެއްގެ ފޯނުން ބަލާލެވޭނެ." މުއާޒް ވިދާޅުވިއެވެ.

ދ. ކުޑަހުވަދޫގެ ހުރިހާ ގޭބީސީއެއްގައި ސްމާޓް މީޓަރ ހަރުކޮށް ނިންމާލުމަށް ބޭއްވި ރަސްމިއްޔާތުގައި ފެނަކައިން ވަނީ، ސްމާޓް މީޓަރ އެޕްލިކޭޝަންވެސް އިފްތިތާޙުކޮށްފައެވެ. މި އެޕްލިކޭޝަން އިފްތިތާހުކޮށްދެއްވީ މޫސުމީ ބަދަލުތަކާއި ތިމާވެއްޓާއި ހަކަތައާބެހޭ ވަޒީރު ތާރިޤް އިބްރާހިމްއެވެ.

މި ޕްރޮޖެކްޓްގެ ދަށުން ސްމާޓް މީޓަރު ހަރުކުރުމުގެ މަސައްކަތް ފެނަކައިން ދަނީ އެކި އަތޮޅުތަކުގައި ކުރަމުންނެވެ. އޭގެތެރޭގައި، ހ.ދ، ބ، މ، ފ، ތ އަތޮޅުގެ އިތުރުން ފުވައްމުލަކު ސިޓީ ހިމެނެއެވެ.