ތައިލެންޑްގެ ވެރިރަށް ބެންކޮކްގައި ބޭއްވި ޓޫނާ ކޮންފަރެންސްގައި މިފްކޯއިން ބައިވެރިވެ މިފްކޯގެ އުފެއްދުންތައް ދައްކާލާފައިވާކަމަށް އެކުންފުނިން ހާމަކޮށްފިއެވެ.
މިމަހުގެ 23 ން 25 ވަނަ ދުވަހާއި ހަމައަށް އޮތް މި ކޮންފަރެންސަކީ ދުނިޔޭގެ ހުރިހާ ސަރަހައްދަކުން މަސްވެރިކަމުގައި ހަރަކާތްތެރިވާ ފަރާތްތަކާއި އެ ސިނާއަތާއި ގުޅުން ހުރި ތަފާތު ފަރާތްތައް ބައިވެރިވާ ކޮންފަރެންސެކެވެ. މިއަހަރުގެ ޓޫނާ ކޮންފަރެންސްގައި ސިނާއަތާއި ގުޅުންހުރި އެކި ދާއިރާތަކުން މަޢުލޫމާތު ބަދަލުކުރެވިފައިވާކަމަށާއި އާ ވިޔަފާރިތަކާއި ބައްދަލުވިކަމަށް މިފްކޯއިން މަޢުލޫމާތުދެއެވެ.
ރާއްޖެއިން ކުރާ ތިމާވެއްޓާ ރައްޓެހި ދޮށީގެ މަސްވެރިކަން ދަމަހައްޓާ ކުރިއެރުވުމަށް އަދި އެ ސިނާއަތުން ލިބޭ ނަފާ އިތުރުކުރުމަށް ސަރުކާރުން ކުރައްވާ މަސައްކަތް އެހެން ޤައުމުތަކުން ބަލައިގަނެ އަކަމުގެ އަގުވަޒަން ކުރާކަން މިއަހަރުގެ ޓޫނާ ކޮންފަރެންސްގައި ފާހަގަކުރެވުނުކަމަށްވެސް މިފްކޯއިން މަޢުލޫމާތުދެއެވެ.