ރާއްޖެ ތަމްސީލުކުރާއިރު ދަރިވަރުން އުފަލަކަށް ހަދަންވާނީ ޤައުމަށް ރީތި ނަން ހޯދައިދިނުން: މެޑަމް ސާޖިދާ

ކޮންމެ ކުއްޖެއްގެވެސް އެންމެ ބޮޑު އުފަލަކަށް ހަދަންވާނީ ދިވެހި ޤައުމަށް ރީތިނަން ހޯދައިދިނުންކަމަށް ރައީސުލްޖުމްހޫރިއްޔާގެ އަނބިކަނބަލުން އަދި ރާއްޖޭގެ ޗީފް ގައިޑް މެޑަމް ސާޖިދާ މުޙައްމަދު ވިދާޅުވެއްޖެއެވެ. އެކަމަނާ މިހެން ވިދާޅުވީ، "ސިލޯނާ ކޭންޕް 2024" ގައި މޯލްޑިވްސް ގާލް ގައިޑް އެސޯސިއޭޝަނުން ބައިވެރިވާ ގައިޑުންނާއި، ލީޑަރުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

"ސިލޯނާ ކޭންޕް 2024" ގައި ބައިވެރިވާ ގައިޑުންނާއި، ލީޑަރުން އަދި އެކުދިންގެ ބެލެނިވެރިންނާއި ބައްދަލުކުރައްވައި ރައީސުލްޖުމްހޫރިއްޔާގެ އަނބިކަނބަލުން އަދި ރާއްޖޭގެ ޗީފް ގައިޑް މެޑަމް ސާޖިދާ މުޙައްމަދު ވިދާޅުވީ، ގާރލް ގައިޑް ހަރަކާތަކީ އަންހެން ދަރިން ގާބިލުކަން އިތުރުކުރުވާ ހަރަކާތެއްކަމަށެވެ. މިއީ ތަރުބިއްޔަތާއި އަޙްލާޤު އަދި ހުނަރާއި ހޭލުންތެރިކަމުގެ ހަރަކާތެއްކަމަށެވެ.

ގާލްގައިޑް ހަރަކާތުގެ ތެރެއިން އުނގެނުމާއި އުނގަންނައިދިނުމުގެ އިތުރު ހުނަރުތައް ދަސްވެގެންދާނެކަމަށާއި އެކަމުގެ ފައިދާ ލިބިގަންނަން ވާނެކަމަށް އެކަމަނާ ވިދާޅުވިއެވެ. ސިލޯނާ ކޭންޕަށް ރާއްޖެއިންދާ ކޮންމެ ބައިވެރިއަކުވެސް އެދަރިވަރެއްގެ އަމިއްލަ ވަންތަ ޤައުމީ ދީނީ ސަޙްސިއްޔަތު ހުރުމަތްތެރިކޮށް ހިތުމާއި، އެހެންމީހުންގެ ޝަހްސިއްޔަތައް އިހްތިރާމްކުރުމުގެ ޤާބިލްކަން އިތުރުކުރުމަކީ މިފަދަ ކޭންޕްތަކުގެ ބޭނުމެއްކަމަށް އެކަމަނާ ވިދާޅުވިއެވެ.

"ދީނީ ކަންކަމަށް ފަރުވާތެރިވުމާއި ދިވެހި ޤައުމަށް ރީތިކަން ހޯދައިދިނުން ކޮންމެ ކުއްޖެއްގެވެސް އެންމެ ބޮޑު އުފަލަކަށް ހަދަންވާނެ. މިދެންނެވިފަދަ ހޭލުންތެރިކަމާއި ފަރުވާތެރިކަމާއިއެކު ބިނާވާ ކުއްޖަކު ވާނީ ޤައުމީ އުދަރެހުގައި ފިޔަޖަހާލާނެ ތަރިއަކަށް. ދިރިއުޅުމުގެ ކާމިޔާބު ދަރިއަކަށް. ތިޔަ ކުދިންގެ ކިބައިން ތިޔަ ކުދިންގެ ބައިންބަފައިންނާއި މި ޤައުމު ކުރާ އުންމީދަކީ އެއީ. މާދަމާ ޚިދުމަތުގެ މައިދާނުގައި އިސްވެ ތިބުން. ދިވެހިންގެ ދީނާއި، ދިވެހި ޤައުމާއި މުޅި އިންސާނިއްޔަތައްޓަކައި ތިޔަކުދިންގެ ހަކަތަ ހޭދަކުރުން" ރައީސުލްޖުމްހޫރިއްޔާގެ އަނބިކަނބަލުން ވިދާޅުވިއެވެ.

"ސިލޯނާ ކޭންޕް 2024" ގައި 38 ސްކޫލަކުން 344 މެންބަރުން ބައިވެރިވެއެވެ. މީގެތެރޭގައި 305 ގައިޑުން ހިމެނެއެވެ. މި ކޭންޕް އޮންނާނީ މިމަހުގެ 18 އިން 23 އަށް ސްރީލަންކާގައެވެ.