ކޮރަޕްޝަނާ ގުޅޭ އެކި މައްސަލަތަކުގައި، މި އަހަރުގެ އޭޕްރީލް މަހުގެ ނިޔަލަށް 10 މީހެއްގެ މައްޗަށް ދައުވާކޮށްދޭން އެދި ޕްރޮސެކިއުޓާ ޖެނަރަލްގެ އޮފީހަށް ފޮނުވި ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ވިދާޅުވެއްޖެއެވެ.
މިއަހަރުގެ ފުރަތަމަ ކުއާޓާގެ ތަފާސް ހިސާބުތައް ބަޔާންކޮށް އޭސީސީން ނެރުއްވި ރިޕޯޓެއްގައި ވަނީ، މި އަހަރުގެ މިހާތަނަށް އެ ކޮމިޝަނަށް 430 އަށް ވުރެ ގިނަ މައްސަލަ ހުށައެޅިއިރު އޭގެ ތެރެއިން 212 މައްސަލައެއް ބައްލަވަން ނިންމަވައި 18 މައްސަލައެއް އެ މައްސަލަތަކާބެހޭ އިދާރާތަކަށް ފޮނުއްވާފައިވާ ކަމަށެވެ. އެގޮތުން ކޮމިޝަނުން ބައްލަވަން ނިންމެވި މައްސަލަތަކުގެ ތެރެއިން 10 މައްސަލައެއް ތަޙުގީގުކުރައްވާ ޕްރޮސެކިއުޓާ ޖެނަރަލްގެ އޮފީހަށް ހުށައަޅުއްވާފައިވާ ކަމަށެވެ.
ފުރަތަމަ ކުއަރޓަރގައި ޕީޖީ އޮފީހަށް ހުށަހެޅި މައްސަލަތަކުގެ ތެރޭގައި އެންމެ ގިނައިން ހިމެނެނީ ނާޖާއިޒް ފައިދާ ހޯދައިދޭން މަސައްކަތްކުރުމުގެ މައްސަލަތަކެވެ. މިކަމާގުޅިގެން 5 މީހެއްގެ މައްޗަށް ދަޢުވާ ކުރުމަށް އެދިފައިވެއެވެ. ދައުލަތަށް ލިބެން އޮތް ފައިދާއެއް އަމިއްލަޔަށް ނަގަން އުޅުނުކަމުގެ ދަޢުވާ 3 މީހެއްގެ މައްޗަށް ކުރެއްވުމަށާއި ނާޖާއިޒް ފައިދާ ހޯދައިގެން 2 މީހެއްގެ މައްޗަށް ދަޢުވާކުރައްވަން ފޮނުއްވި ކަމަށް އޭސީސީގެ ރިޕޯޓުގައި ހާމަކުރައްވާފައިވެއެވެ.
އޭސީސީން ވިދާޅުވީ ކޮމިޝަނަށް މިއަހަރު ހުށަހެޅި ބައެއް މައްސަލަތަކުގެ ތެރެއިން 43 މައްސަލައެއް ނުބައްލަވައި ދޫކޮށްލެއްވި ކަމަށެވެ. އަދި އިދާރީ ހިންގުމުގައި ހުރި ބައެއް މައްސަލަތައް ހައްލުކުރެއްވުމަށް 45 އިދާރާއަކަށް މިއަހަރު އެންގެވި ކަމަށް އޭސީސީން ވިދާޅުވިއެވެ.