ގެއްލިފައިވާ އަޙުމަދު ރިޟްވާންގެ މައްސަލައިގައި، އދ.ގެ "ވާރކިން ގްރޫޕް އޮން އެންފޯރސްޑް އޯ އިންވޮލަންޓަރީ ޑިސަޕިއަރަންސަސް" އާއި ދިވެހި ސަރުކާރުން ޙިއްޞާކުރެއްވި ރިޕޯޓަކީ ވަރަށް ތަފްޞީލީ ރިޕޯޓެއް ކަމަށާއި، ސަރުކާރުން ރިޟްވާންގެ ތަހްޤީގް ކުރިޔަށް ގެންދަވާފައިވާ ގޮތުގެ ފުރިހަމަ ކަމާމެދު އެގްރޫޕުން ތަޢުރީފްކޮށްފައިވާ ކަމަށް ޚާރިޖީ ވަޒީރު ދުންޔާ މައުމޫން ވިދާޅުވެއްޖެއެވެ.
އދ.ގެ ވަރކިންގ ގްރޫޕްގެ 109 ވަނަ ސެޝަންގެ ބައްދަލުވުމުގައި ދިވެހި ސަރުކާރުގެ ފަރާތުން ހުށަހެޅުއްވި ރިޕޯޓްގެ ތަފްޞީލް ޕީ.އެސް.އެމްއާއި ޙިއްޞާ ކުރައްވަމުން ޚާރިޖީ ވަޒީރު ވިދާޅުވީ، ސަރުކާރުން މިހާރު ކުރައްވާފައިވާ މަސައްކަތްތަކުގެ ތަފްޞީލް، އެ ރިޕޯޓްގައި ވަރަށް ފުރިހަމަޔަށް ބަޔާން ކުރެވިފައިވާކަމަށެވެ.
ސަރުކާރުންނާއި އަދި ވަކިން ޚާއްޞަކޮށް ފުލުހުންގެ އިދާރާއިން މި މައްސަލަ ތަޙްޤީގް ހިންގަވާފައިވާ ގޮތާމެދު، މި ރިޕޯޓަށް ރިޢާޔަތްކޮށް، އެ ގްރޫޕުން ތަޢުރީފް ކުރައްވާފައިވާ ކަމަށް ދުންޔާ ވިދާޅުވިއެވެ.
ޚާރިޖީ ވަޒީރު ދުންޔާ މައުމޫން، އަޙުމަދު ރިޟްވާންގެ ޢާއިލާއަށް ވަރަށް ބޮޑަށް ހަމްދަރްދީ ފަޅުކުރައްވާފައިވެއެވެ. އަދި ސަރުކާރުން ރިޟްވާން ހޯއްދެވުމަށް ކުރައްވާ މަސައްކަތް ކާމިޔާބުވާނޭކަމަށް އުންމީދު ކުރައްވާކަމަށް ވިދާޅުވިއެވެ.
އ.ދގެ ވަރކިންގ ގްރޫޕްގެ 109 ވަނަ ސެޝަންގެ ބައްދަލުވުމުގައި ގްރޫޕްގެ މެމްބަރުންނާ ބައްދަލުކުރެއްވި ދިވެހި ސަރުކާރުގެ ވަފްދުގައި އެންމެ އިސްކޮށް ހުންނެވީ އދ. އޮފީސްތަކަށް ރާއްޖެއިން ކަނޑައަޅާފައި ހުންނަވާ ދިވެހިރާއްޖޭގެ ދާއިމީ މަންދޫބު، ޑރ. ޙާލާ ޙަމީދުއެވެ.
އަދި ޚާރިޖީ ވުޒާރާއާއި، ބަންޑާރަ ނައިބުގެ އޮފީހާއި، ފުލުހުންގެ އިދާރާގެ ބޭފުޅުންވެސް މި ވަފްދުގައި ހިމެނިވަޑައިގަންނަވައެވެ. މިހާރު ޖެނީވާގައި ކުރިޔަށްދާ، ވަރކިން ގްރޫޕްގެ 109 ވަނަ ބައްދަލުވުމުގައި 40 ޤައުމަކުން ހުށަހަޅާފައިވާ 800 މައްސަލައާބެހޭ މަޢުލޫމާތު ސާފުކުރުމަށް ތާވަލުކުރެވިފައިވެއެވެ.