އޮތެންޓިކް މޯލްޑިވްސްއަށް އެންމެ ބޮޑު އާމްދަނީއެއް ލިބުނީ މިދިޔަ 6 މަސްދުވަހު

ބިޒްނަސް ސެންޓަރ ކޯޕަރޭޝަން، ބީސީސީގެ ދަށުން ހިންގާ އޮތެންޓިކް މޯލްޑިވްސްގެ ފިހާރަތަކަށް މިހާތަނަށް އެންމެ ބޮޑު އާމްދަނީއެއް ލިބިފައިވަނީ މިދިޔަ 6 މަސްދުވަހުގެ ތެރޭގައިކަމަށް އެކުންފުނިން ބުނެފިއެވެ.

ބީސީސީއަށް 7 އަހަރު ފުރުމުގެ ގޮތުން ބޭއްވި ހަފްލާގައި ވާހަކަފުޅު ދައްކަވަމުން އެކުންފުނީގެ ޑެޕިއުޓީ މެނޭޖިންގ ޑިރެކްޓަރ ސާމިޙް އާދަމް ވިދާޅުވީ، ދިވެހި އުފެއްދުންތެރިކަން ކުރިއަރުވައި ދިވެހި އުފެއްދުންތައް ވިއްކުމަށްޓަކައި ބީސީސީން މި ވޭތުވެދިޔަ 7 އަހަރުގެ ތެރޭގައި ގިނަ މަސައްކަތްތަކެއް ކޮށްފައިވާކަމަށެވެ. އޭގެތެރޭގައި އޮތެންޓިކް މޯލްޑްވްސްގެ ފިހާރަތަކާއި، ސީޑްބައިބީސީސީ، އެމްބީއެން އަދި އެސްއެމްއީ ހަބް ފަދަ މަޝްރޫޢުތަކަކީ ދިވެހި ކުދި ވިޔަފާރިތަކަށް އާރޯކަން ގެނުވި މަޝްރޫއުތަކެއްކަން އޭނާ ފާހަގަކުރެއްވިއެވެ.

މި މަޝްރޫޢުތަކުން ދިވެހި ރައްޔިތުންނަށް ލިބޭ ނަފާ އިތުރު ކުރުމަށްޓަކައި، މި ސަރުކާރުގެ ހަރުދަނާ ސިޔާސަތުތަކާ އެއްގޮތަށް، މި މަޝްރޫޢުތަކުގެ އިސްތިރާޖީ ރޭވުންތައް މުރާޖަޢާކޮށް، ދެމެހެއްޓެނިވި ގޮތެއްގައި ކުރިއަށް ގެންދިޔުމަކީ ބީސީސީގެ އެންމެ މައިގަނޑު އެއް އަމާޒުކަމަށް އޭނާ ވިދާޅުވިއެވެ.

ކުންފުނީގެ ދައުރު އިތުރަށް ފުޅާކޮށް، ބިޔަ މަޝްރޫޢުތަކާއި އިންވެސްޓްމެންޓްތަކާ ދިމާއަށް ބީސީސީން އަމާޒު ހިފާފައިވާކަން އޭނާ ފާހަގަކުރެއްވިއެވެ. އެގޮތުން، ރާއްޖޭގައި ލޮނު އުފައްދާ ފެކްޓްރީއަކާއި އަންނައުނު ފެކްޓްރީއެއް ޤާއިމުކުރުމުގެ މަސައްކަތް ބީސީސީން ދަނީ ކުރަމުންނެވެ. ސާމިޙް ވިދާޅުވީ، ރާއްޖޭގައި ފުރަތަމަ ފަހަރަށް އީޖާދީ އަދި ފަންނުވެރި މަސައްކަތް ކުރާ ފަރާތްތަކަށް ޚާއްސަ "ކްރިއޭޓިވް" އިކޮނޮމީއެއް ތަރައްޤީ ކުރުމަށް އިޤްތިޞާދީ ވުޒާރާގެ ލަފަޔާއެކު ބީސީސީން މަސައްކަތްތަކެއް ކުރަމުންދާކަމަށެވެ.

"ކުންފުނީގެ ތާރީޚުގައި މި ވޭތުވެދިޔަ 7 އަހަރުގެ ތެރެއިން، މި ސަރުކާރުގެ ފުރަތަމަ 6 މަސް ވެގެން މިދިޔައީ މި ކުންފީންގެ އެންމެ ބޮޑު ވިޔަފާރި ހަރަކާތް، އަދި 330 އަށްވުރެ ގިނަ ކުދި ވިޔަފާރިތަކަށް ޚިދުމަތް ފޯރުކޮށްދެމުންދާ، އޯތެންޓިކް މޯލްޑްވިސުން ދިވެހި ކުދި ވިޔަފާރިޔަކަށް ދޫކުރެވުނު ފައިސާ ރިކޯޑު އަދަކަށް އިތުރުވެގެން ދިޔަ މުއްދަތަކަށް. އެގޮތުން މިދިޔަ އަހަރުގެ މި މުއްދަތާ އަޅާ ބަލާއިރު އާމްދަނީއަށް 21 އިންސައްތައިގެ ކުރިއެރުމެއް ވަނީ ލިބިފަ." ޑެޕިއުޓީ އެމްޑީ ސާމިޙް އާދަމް ވިދާޅުވިއެވެ.

ފާއިތުވެދިޔަ 6 މަސްދުވަހު އޮތެންޓިކް މޯލްޑިވްސްއަށް ލިބިފައިވާ އާމްދަނީ އިތުރުވެފައިވަނީ ރާއްޖެއަށް ޒިޔާރަތްކުރި ފަތުރުވެރިންގެ ޢަދަދު އިތުރުވެ، އުފެއްދުންތައް މާކެޓްކުރުމަށް ބީސީސީން ކޮށްފައިވާ ގިނަގުނަ މަސައްކަތްތަކުގެ ސަބަބުންކަމަށް އެ ކުންފުނިން ވަނީ ބުނެފައެވެ. މީގެއިތުރުން ދިވެހިންނަށް އިސްކަން މި ނަމުގައި އެ ކުންފުނިން ފެށި ކެންޕެއިންގެ ސަބަބުން ފަތުރުވެރިންގެ އިތުރުން ދިވެހިންގެ މެދުގައިވެސް އޮތެންޓިކް މޯލްޑިވްސްއިން ވިއްކާ އުފެއްދުންތަކަށް އޮތް މަޤްބޫލުކަން އިތުރުވެފައިވާކަމަށް ބީސީސީން ވަނީ ބުނެފައެވެ.

އޮތެންޓިކް މޯލްޑިވްސްގެ 4 އައުޓްލެޓެއް ރާއްޖޭގެ އެކި ހިސާބުތަކުގައި ވަނީ ޤާއިމްކޮށްފައެވެ. އެއީ މާލެ، ކްރޮސްރޯޑްސް މޯލްޑިވްސް، ވެލާނާ އިންޓަރނޭޝަނަލް އެއަރޕޯޓް އަދި ގަން އިންޓަރނޭޝަނަލް އެއަރޕޯޓެވެ. އިތުރު ފިހާރަތައް ހުޅުވުމުގެ މަސައްކަތްވެސް ބީސީސީން ދަނީ ކުރަމުންނެވެ. އެގޮތުން އއ. ތޮއްޑޫގައި މި މަރުކާގެ ފިހާރައެއް ހުޅުވުމުގެ މަސައްކަތް ބީސީސީން ދަނީ ކުރަމުންނެވެ.