ދެހާސް ސާދަވަނަ އަހަރުގެ ޑިސެމްބަރު މަހުގެ 13 ވަނަ ދުވަހު ރޭގެ ވަގުތެއްގައި މއ.ބޭރުމަތީގޭގެ 6 ވަނަ ފަންގިފިލާއިން މަގުމައްޗަށް ވެއްޓި ހ.ދޫހިމެރިގެ، ނަދާލް ރަޝީދު ނިޔާވި މައްސަލައާ ގުޅިގެން 5 ދިވެހިން ހައްޔަރު ކުރައްވައިފިއެވެ.
މި މައްސަލައާ ގުޅިގެން އިއްޔެއާއި މިއަދު ހައްޔަރުކުރައްވާފައިވަނީ 20 އަހަރާއި 25 އަހަރާ ދެމެދުގެ 4 ފިރިހެނުންނާއި، 24 އަހަރުގެ އަންހެނެއް ކަމަށް މޯލްޑިވްސް ޕޮލިސް ސަރވިސްއިން ހާމަކުރައްވައެވެ. މއ. ބޭރުމަތީގޭގެ 6 ވަނަ ފަންގިފިލާއިން ނަދާލް ރަޝީދު ވެއްޓި ނިޔާވި ރޭ، އެ އެޕާޓްމަންޓްގައި ތިބި 4 މީހެއްގެ ކުޑަކަމުދާ އެއްޗިހި ނަންގަވާފައިވާ ކަމަށާއި އެމީހުންގެ ކުޑަކަމުދާ އެއްޗެހި ތަޙްލީލު ކުރެއްވިއިރު ދާއިމީ ނަތީޖާއިން މަސްތުވާތަކެތީގެ ބާވަތެއްކަމަށްވާ ކެނަބިސްއަށް ޕޮޒިޓިވް ވެފައިވާކަމަށް މީގެ ކުރިން ފުލުހުން ވަނީ ވިދާޅުވެފައެވެ.
މީގެއިތުރުން، ނަދާލް ރަޝީދު ހަށިގަނޑުން ނެގުނު ބްލަޑް ސާމަޕަލް ތަޙްލީލުކުރެއްވިއިރު މަސްތުވާތަކެތީގެ ބާވަތެއްކަމަށްވާ ކެނެބިސްއަށް ޕޮޒިޓިވް ވެފައިވާކަމަށްވެސް ފުލުހުން މިދިޔަ އަހަރު ވަނީ ވިދާޅުވެފައެވެ. ނަދާލް ރަޝީދު ހޮސްޕިޓަލަށް ގެންދެވުނުއިރު އޭނާގެ ހަށިގަނޑަށް ލިބިފައިވާ އަނިޔާތަކުގެ ސަބަބުން ނިޔާވެފައިވާ ކަމަށް އޭނާ ބެއްލެވި ޑޮކްޓަރު މަޢުލޫމާތު ދެއްވާފައިވާ ކަމަށާއި ނަދާލް ހޮސްޕިޓަލަށް ގެންދެވުނުއިރު އޭނާގެ ބޮލުފެ ފުއްކިބައިން 2 ތަނެއް ފަޅައިގެން ގޮސްފައިވާކަމަށް އޭރު ފުލުހުން ވިދާޅުވެފައިވެއެވެ. މިމައްސަލަ އަދިވެސް ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުން ދަނީ ތަޙްޤީޤު ކުރައްވަމުންނެވެ.