އެކަހެރިކަން ކުޑަކުރުމަށް މުވާސަލާތީ ވަސީލަތްތަކުގެ ބޭނުން ރަށްރަށުގަ ހިފަންޖެހޭ: ވަޒީރު އާދަމް ޝަރީފް

ރާއްޖޭގެ ރަށްތަކުގެ އެކަހެރިކަން ކުޑަކުރުމަށް މުވާސަލާތީ ވަސީލަތްތަކުގެ ބޭނުން ވަރަށް ރަނގަޅަށް ހިފަންޖެހޭކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ. ވަޒީރު މިހެން ވިދާޅުވީ، މިއަދު ފާހަގަކުރަމުންދާ ދުނިޔޭގެ ޓެލެކޮމިއުނިކޭޝަން އަދި އިންފޮމޭޝަން ސޮސައިޓީ ދުވަހުގެ މުނާސަބަތުގައި ދެއްވި ޚިތާބުގައެވެ.

ދިވެހިރާއްޖެފަދަ ކުޑަ ޤައުމަކަށް މުވާސަލާތީ ވަސީލަތްތަކުގެ ތެރެއިން އީޖާދީގޮތްތަކަށް ދެމެހެއްޓެނިވި ތަރައްޤީ ގެނައުމަކީ ވަރަށް ބޭނުންތެރި ކަމެއްކަމަށް ވަޒީރު ވިދާޅުވިއެވެ. ދިވެހިރާއްޖެއަކީ މިހާރު ތަރައްޤީވަމުން އަންނަ ޤައުމެއްގެ ގޮތުގައި ބެލެވޭ ޤައުމަކަށްވިޔަސް، އެންމެ ކުޑަކޮށް ތަރައްޤީ ވެފައިވާ ޤައުމުތަކަށް ހުރި ގިނަ ގޮންޖެހުންތައް އަދިވެސް ރާއްޖެއަށް އެބަހުރިކަމަށް ވިދާޅުވިއެވެ. ކުދި ރަށްތަކެއްގެ މައްޗަށް ރާއްޖެ އެކުލެވިފައިވުމާއި، ރަށްރަށުގެ އާބާދީ މަދުވުމުގެ ސަބަބުން ދިމާވާ ގޮންޖެހުންތަކަކީ ތަރައްޤީއަށް ހުރި ހުރަސްތަކުގެ ގޮތުގައި ވަޒީރު ސިފަކުރެއްވިއެވެ.

އީޖާދީގޮތްތަކަށް، ޓެކްނޮލޮޖީގެ އެހީތެރިކަމާއެކު ރާއްޖޭގެ ރަށްތަކުގެ އެކަހެރިކަން ކުޑަކުރުމަށް ގުޅިގެން މަސައްކަތްކުރުމަށް މުވާސަލާތީ ވަސީލަތްތަކުގެ ބޭނުން ވަރަށް ރަނގަޅަށް ހިފަންޖެހޭކަމަށް ވަޒީރު ވިދާޅުވިއެވެ.
އިންފޮމޭޝަން އާއި ކޮމިއުނިކޭޝަން ޓެކްނޮލޮޖީ ނުވަތަ ޑިޖިޓަލް ޓެކްނޮލޮޖީ ތަޢާރަފްވަމުންއައި ދުވަސްތަކުގައި، އެ ވަސީލަތްތަކުގެ ބޭނުން ކުރުމަކީ ޢިޙްތިޔާރެއް ނުވަތަ ޗޮއިސް އެއް ކަމަށްވިޔަސް، ޑިޖިޓަލް ޓެކްނޮލޮޖީއާ ނުލާ ދިރިނޫޅެވޭ މިންވަރަށް އެ ސިނާޢަތް މިވަނީ ދިވެހީންގެ ދިރިއުޅުމާ ގުޅިލާމެހިފައިކަމަށް ވިދާޅުވިއެވެ.

ސަރުކާރުން ދޭ ގިނަ ޚިދުމަތްތައް ހޯދައި ފައިސާ ދެއްކުންވެސް އޮންލައިން ޕްލެޓްފޯމްތަކަށް ބަދަލުވެފައިވާކަމަށް ވަޒީރު ވިދާޅުވިއެވެ. މުސްތަޤަބަލްގައި އަންނާނެކަމަށް ކުރިން ދެކެމުންއައި އާޓިފިޝަލް އިންޓެލިޖެންސްގެ ބޭނުން މިހާރު ހިފަމުންދާކަން ވަޒީރު ފާހަގަކުރެއްވިއެެވެ.

"މިފަދަ މިންވަރަކަށް ޓެކްނޮލޮޖީ ކުރިއަރަމުންދާއިރު، މުޖުތަމައުގެ ކޮންމެ ފަރުދަކީވެސް، ޓެކްނޮލޮޖީއަށް އަހުލުވެރިވެފައިވާ މީހަކަށް ވާންޖެހޭ. ޓެކޮނޮލޮޖީގެ ބޭނުން ހިފުމުގެ މަގުތައް ޒުވާން ޖީލުތަކެކޭ އެއްފަދައިން ދޮށީ އުމުރުގެ މީހުންނާއި، ހުރިހާ ގިންތިތަކަށް، މިންތީގެ ތަފާތު ކުރުމެއް ނެތި، ފަހިވާންޖެހޭ.
1980 ގެ އަހަރުތަކުގައި ލިޔަންކިޔަން ނުދަތުން ރާއްޖެއިން ނައްތާލި ފަދައިން، ޓެކްނޮލޮޖީގެ ލިޔަންކިޔަން ނުދަތުން ނައްތާލުމަށް، ޑިޖިޓަލް ލިޓަރަސީ ޕްރޮގްރާމްތައް ހިންގުމަކީ ޓެކްނޮލޮޖީގެ ފައިދާ އެންމެންނަށް ލިބިގެންދާނެ ކަމެއް." ވަޒީރު ވިދާޅުވިއެވެ.

ޓެކްނޮލޮޖީގެ ފަސޭހަކަން ތަޖުރިބާކުރާއިރު، ހަމަ މިފަސޭހަތަކުގެ ތެރެއިން ހިނގާފާނެ ނޭދެވޭ ކަންކަމަށް ވެސް ފާރަވެރިވެ ސަމާލު ވާންޖެހޭކަމަށް ވިދާޅުވިއެވެ. ރާއްޖެއާއި ބޭރު ދުނިޔެއާއި ގުޅުމަށް އިތުރު ސަބްމެރީން ފައިބަރ އޮޕްޓިކް ކޭބަލްތައް އެޅުމުގެ މަސައްކަތް ވަރަށް ބާރަށް ދަނީ ކުރެވެމުންކަން އާދަމް ޝަރީފް ވިދާޅުވިއެވެ. އަދި ރާއްޖޭގެ އެތެރޭގެ ގުޅުންތަކަށް ބޭނުންވާ ބިނާތަކާއި ވިއުގަތައް ފުޅާކުރެވި، ފައިބަރ ނެޓްވާރކާ ގުޅާލެވޭ ރަށްތައް އެއް ދުވަހުން އަނެއް ދުވަހަށް މިދަނީ އިތުރު ކުރެވެމުންކަން ފާހަގަކުރެއްވިއެވެ.

ރައީސުލުޖުމްހޫރިއްޔާ ޑރ. މުޙައްމަދު މުޢިއްޒުގެ ވިސްނުންފުޅާއި އެއްގޮތަށް، ރާއްޖޭގެ މުވާސަލަތީ ދާއިރާގެ މިހާރުގެ ޙާލަތު ވަޒަންކުރުމާއިއެކު، ކުރިމަގުގައި ރާއްޖޭގެ މުވާސަލަތީ ދާއިރާ ބައްޓަންކުރުމާއި އުމްރާނީ ކުރިއެރުންތަކާބޭހޭގޮތުން ރާއްޖޭގެ ކަމާގުޅުންހުރި ގިނަ ފަރާތްތަކާއެކު ފުޅާދާއިރާއެއްގައި މަޝްވަރާކޮށް، ރާއްޖޭގެ މުވާސަލާތީ ދާއިރާގެ ސިޔާސަތުތައް އެކަށައެޅުމުގެ މަސައްކަތް މިހާރު އެ ވުޒާރާއިން ފަށާފައިވާކަމަށް ވިދާޅުވިއެވެ.