ސިޓީ ކައުންސިލުން ދެއްވާ ޚިދުމަތްތަކުގެ ތެރެއިން ބައެއް ޚިދުމަތް ދެއްވުން ސަރުކާރުގެ ކަމާބެހޭ ބައެއް މުއައްސަސާތަކަށް ބަދަލުކުރެއްވުމަށް ވަޒީރުންގެ މަޖިލީހުގެ މަޝްވަރާގެ މަތިން މިއަދު ނިންމަވައިފިއެވެ.
މިގޮތަށް ނިންމެވީ، މިއަދު ބޭއްވެވި ވަޒީރުންގެ މަޖިލީހުގެ ޖަލްސާގައެވެ. ވަޒީރުންގެ މަޖިލީހުން މިގޮތަށް ނިންމެވެވުމަށް ލަފާދެއްވީ މިކަމާ ގުޅޭގޮތުން އެމަޖިލީހަށް ހުށަހެޅުއްވި ކަރުދާހާ ބެހޭގޮތުން މަޝްވާރާ ކުރެއްވުމަށްފަހުގައެވެ. މިއަދުގެ މަޝްވަރާތަކުގައި، ނިންމެވީ ދިވެހިރާއްޖެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު ގެ 3 ވަނަ އިޞްލާޙުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުންނެވެ. މިގޮތުން ގެންނަވަން ނިމްމެވި ބަދަލުތަކުގެ ތެރޭގައި، ސިޓީ ކައުންސިލުން ފޯރުކޮށްދޭ ޚިދުމަތްތަކުގެ ތެރެއިން، އާސާރީ ތަންތަން ބެލެހެއްޓެވުމާއި، ޘަގާފީ ކަންކަން ދިރުވައި ދެމެހެއްޓެވުން، ޑިޕާޓްމަންޓް އޮފް ހެރިޓޭޖަށް ބަދަލުކުރެއްވުމާއި، ގަބުރުސްތާނު ބެލެހެއްޓެވުމާއި، ކަށުކަމާކެމީގެ ކަންކަން ހަމަޖެއްސެވުން މިނިސްޓްރީ އޮފް އިސްލާމިކް އެފެއާރޒަށް ބަދަލުކުރެއްވުން ހިމެނެއެވެ.
އަދި ވަޒީރުންގެ މަޖިލީހަށް މިނިސްޓްރީ އޮފް އިކޮނޮމިކް ޑިވެލޮޕްމަންޓުން ހުށަހެޅުއްވި ހޭގް އެޕޮސްޓައިލް ކޮންވެންޝަނުގައި ދިވެހިރާއްޖެއިން ބައިވެރިވުމާ ގުޅޭގޮތުން މަޝްވަރާކުރައްވައި، މި ކޮންވެންޝަނުގައި ރާއްޖެއިން ބައިވެރިވުމަށް ވަނީ ނިންމަވާފައެވެ. މި ކޮންވެންޝަނަކީ، ބައިވެރިވާ މެންބަރު ޤައުމެއްގެ ސަރުކާރުގެ މުއައްސަސާއަކުން ނުވަތަ މުއައްސަސާތަކުން ދޫކުރާ ރަސްމީ ލިޔުންތަކުގެ ސައްޙަކަން ކަށަވަރުކުރުމަށްޓަކައި، އެ ލިޔުމެއް ދޫކުރި ޤައުމަކުން ކަނޑައަޅާފައިވާ އެ ޤައުމެއްގެ ކޮމްޕީޓަންޓް އޮތޯރިޓީ ނުވަތަ، ކޮމްޕީޓަންޓް އޮތޯރިޓީތަކުން އެ ލިޔުމެއް ދޫކުރި މުއައްސަސާއާއި، އެ ލިޔުމެއްގައިވާ ސޮޔާއި ތައްގަނޑަކީ، އެ ލިޔުމެއް ދޫކުރި ޤައުމުގެ ސަރުކާރުގެ ކަމާބެހޭ މުއައްސަސާއިން ދޫކުރި ލިޔުމެއްކަން ކަށަވަރުކުރެއްވުމުގެ އިންތިޒާމް ހަމަޖެއްސެވުމަށްޓަކައި މެންބަރުން އެއްބަސްވެ ސޮއިކޮށްފައިވާ ކޮންވެންޝަނެކެވެ.