ޑރ. ރަމްޝާ ވަކިވެދިއުން؛ ގިނަ ބަޔަކު ހިތްދަތިކުރުވި ޚަބަރެއް
-
ރަމްޝާ ނިޔާވީ ބެންކޮކްގައި ފަރުވާހޯދަމުން ދަނިކޮށް
-
އޭނާއަކީ ކުރިން ރާއްޖޭގައި އުފެދުނު އަންހެން ދުވުންތެރިންގެ ތެރެއިން ފާހަގަކޮށްލެވޭ އެތްލީޓެއް
-
ރަމްޝާ އަކީ ކެންސަރ ސޮސައިޓީގެ ބޯޑު މެންބަރެއް
ކުޅިވަރުގެ ދާއިރާއާއި ސިއްޙީ ދާއިރާއިން މަގްބޫލުކަން ހޯދާފައިވާ ޑރ. އާމިނަތު ރަމްޝާ ކެންސަރުބަލީގައި ފަރުވާ ހޯދަމުންދަނިކޮށް އަވަހާރަވެއްޖެއެވެ.
ޑރ. ރަމްޝާ އަވަހާރަވުމާއި ގުޅިގެން ގިނަ ބަޔަކުދަނީ އޭނާގެ ޚިދުމަތްތަކާއި ބަލީގެ ހާލަތުގައިވެސް ދެއްކި ހިތްވަރު ފާހަގަކޮށް ތަޢުޒިޔާގެ މެސެޖްތައް ފޮނުވަމުންނެވެ.
އެމްބީބީއެސް ނިންމަވައި މެޑިކަލް އޮފިސަރެއްގެ ގޮތުގައި ސަރުކާރުގެ މައި ހޮސްޕިޓަލް، އައިޖީއެމްއެޗްގައި ޚިދުމަތްކުރެއްވުމަށްފަހު ޑރ. ރަމްޝާ ގަސްތުކުރެއްވީ ކަރުންމަތީގެ ބައްޔަށް ޚާއްސަވުމަށެވެ. ތައިލެންޑްގެ ވެރިރަށް ބެންކޮކްގައި ޚާއްސަވުމަށް ތަޢުލީމު ޙާސިލްކުރަމުންދަނިކޮށް ކެންސަރު ޖެހިފައިވާކަން އެނގުމުންވެސް އެނާވަނީ ފަރުވާ ހޯއްދަވަމުން ކަރުންމަތީގެ ބަލިތަކުގެ ޑޮކްޓަރަކަށްވުމުގެ ކޯސް ފުރިހަމަކުރައްވާފައެވެ.
ޑރ. ރަމްޝާއަކީ ކެންސަރ ސޮސައިޓީ އޮފް މޯލްޑިވްސް އުފެދުނީއްސުރެ އެޖަމިއްޔާއާއި އެޖަމިއްޔާގެ މެންބަރުންނާއި ގާތްގުޅުމެއް ބޭއްވި މެންބަރެކެވެ. އަދި އެފަދަ ބަލިތަކަށް މީހުން ހޭލުންތެރިކުރުމުގައި މުހިއްމު މަސައްކަތްތައްވަނީ ކުރައްވާފައެވެ.
މީގެ އިތުރުން ކޯވިޑްގެ އާލަމީ ވަބާގެ ދުވަސްވަރު ރައްޔިތުން ފުރަބަންދުގައި ތިބިއިރު ރަމްޝާވަނީ ކްލަބް ހައުސްގައި ކޯވިޑަށް މީހުން ހޭލުންތެރިކުރަމަށް މުހިއްމު މަސައްކަތްތަކެއް ކުރައްވާފައެވެ.
މީގެ އިތުރުން ޑރ. ރަމްޝާއަކީ ކުރިން ރާއްޖޭގައި އުފެދުނު އަންހެން ދުވުންތެރިންގެ ތެރެއިން ފާހަގަކޮށްލެވޭ އެތްލީޓެކެވެ. ދުވުމުގައި 800 މީޓަރާއި 1500 މީޓަރުގެ ދުވުމުން ޚާއްސަވި ޑރ. ރަމްޝާ ވަނީ ބޭރުގެ މުބާރާތްތަކުގައި ވެސް ރާއްޖެ ތަމްސީލްކުރައްވައިފައެވެ. ދުވުމުގެ އިތުރުން ރަމްޝާ ވަނީ ނެޓްބޯޅަ ވެސް ގައުމީ ފެންވަރުގައި ކުޅުއްވައިފައެވެ.
ޑރ. އާމިނަތު ރަމްޝާ އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ ތަޢުޒިޔާ ފޮނުއްވާފައެވެ.
އެކްސްގައި ޕޯސްޓެއްގައި ރައީސުލްޖުމްހޫރިއްޔާ ވިދާޅުވީ ޚިދުމަތްތެރި އަދި މަޤްބޫލު ޑޮކްޓަރު އާމިނަތު ރަމްޝާ އަވަހާރަވި ޚަބަރު އެއްސެވީ ފުން ހިތާމައާއެގައިކަމަށެވެ.
انا لله وانا اليه راجعون
— Dr Mohamed Muizzu (@MMuizzu) May 2, 2024
ޚިދުމަތްތެރި އަދި މަޤްބޫލު ޑޮކްޓަރު އާމިނަތު ރަމްޝާ އަވަހާރަވި ޚަބަރު އަޅުގަނޑު އަޑުއެހީ ފުން ހިތާމައާއެކުއެވެ.
ޤައުމަށް ގެއްލިގެން އެދިޔައީ ކުޅިވަރުގެ މައިދާނުގައި ރީތި ނަމޫނާ ދެއްކެވި މޮޅު އެތުލީޓެކެވެ. އިންސާނިއްޔަތަށް ޚިދުމަތް ކުރުމުގައި ރެޔާދުވާލު…
ރަމްޝާ އަވަހާރަވުމުން ޤައުމަށް ގެއްލިގެން އެދިޔައީ ކުޅިވަރުގެ މައިދާނުގައި ރީތި ނަމޫނާ ދެއްކެވި މޮޅު އެތުލީޓެއްކަމަށާއި، އަދި އިންސާނިއްޔަތަށް ޚިދުމަތް ކުރުމުގައި ރެޔާދުވާލު މަސައްކަތްކުރެއްވި ވާގިވެރިއެއްކަން ފާހަގަކޮށް، ޑރ. ރަމްޝާއަކީ ބަލިމީހުންނާ ނުކުޅެދޭ މީހުންނަށް ހިތްވަރުދެއްވުމުގައި އޯގާތެރި އެހީތެރިއެއްކަމަށް ރައީސްގެ މެސެޖްގައި ވިދާޅުވިއެވެ. ރައީސުލްޖުމްހޫރިއްޔާވަނީ މަރްޙޫމާ ޑޮކްޓަރު އާމިނަތު ރަމްޝާގެ ޢާއިލާއަށް ކެތްތެރިކަން މިންވަރުކުރައްވައި، ކީރިތިﷲގެ ރުއްސެވުމާ، ފުއްސެވުމާ، ސުވަރުގޭގެ ދާއިމީ ނިޢުމަތް އެ މަރްޙޫމާއަށް މިންވަރުކުރެއްވުން އެދި ދުޢާކުރައްވާފައެވެ.